Genesa 3 - Xitsonga (Bibele)

Ta ku dyoha ka vanhu.

¹ Nyoka a yi tlula hi mano swiharhi hinkwaswo swa tiko, leswi Yehovha Xikwembu a nga swi endla. Kutani yi ku eka wansati: “Kunene Xikwembu xi te: ‘Mi nga tshuki mi dya murhi ni wun'we wa ntanga!’ ”

² Kambe wansati a ku eka nyoka: “Hi nga dya mihandzu ya mirhi ya ntanga;

³ ntsena loko yi ri mihandzu ya murhi lowu nga exikarhi ka ntanga, Xikwembu xi te: ‘Mi nga ka mi nga dyi, ni ku khumba, mi nga yi khumbi, leswaku mi nga fi.’ ”

⁴ Kutani nyoka yi ku eka wansati: “Loko ku ri ku fa mi nga ka mi nga fi;

⁵ kambe Xikwembu xi tiva leswaku siku mi nga ta dya, mahlo ya n'wina ma ta pfuleka, mi ta kotisa Xikwembu, mi tiva swo saseka ni swo biha.”

⁶ Wansati, kuteloko a vona leswaku murhi a wu nandziha, ni leswaku wu navetisa mahlo, ni leswaku wu navetisa ku tlhariha, a kha mihandzu ya wona, a dya, a nyika ni nuna wa yena loyi ngi a ri na yena, kutani a dya.

⁷ Kutani mahlo ya lavambirhi ma pfuleka, va tiva leswaku va tshama ntsena; kutani va rhungelela matluka ya nkuwa, va tiendlela tinguvu.

⁸ Kutani va twa rito ra Yehovha Xikwembu loko a famba entangeni hi nkarhi wa madyambu; wanuna ni nsati wa yena va tumbela emirhini ya ntanga, va chava mombo wa Yehovha Xikwembu.

⁹ Kutani Yehovha Xikwembu a vita wanuna, a ku: “U kwihi?”

¹⁰ Yena a ku: “Ndzi twe rito ra wena entangeni, kutani ndzo chava, hikuva a ndzi ambalanga nchumu, kutani ndzo tumbela.”

¹¹ Yehovha a ku: “U byeriwile hi mani leswaku a ku ambalanga nchumu? Kumbe xana u dyile murhi lowu ndzi nga ku lerisa, ndzi ku: ‘U nga tshuki u dya?’ ”

¹² Kutani wanuna a ku: “Hi yena wansati loyi u nga ndzi nyika yena a va na mina, la nga ndzi ha murhi, ndzi dya.”

¹³ Yehovha Xikwembu a ku eka wansati: “U swi endlele yini xana?” Wansati a ku: “I nyoka leyi nga ndzi kanganyisa, kutani ndzi dya.”

¹⁴ Yehovha Xikwembu a ku eka nyoka: “Leswi u nga endlisa sweswo, u ta rhuketeriwa exikarhi ka swifuwo hinkwaswo, ni xikarhi ka swiharhi hinkwaswo swa tiko; u ta famba hi khwiri, u dya ntshuri hi masiku hinkwawo ya ku hanya ka wena.

¹⁵ Ndzi ta veka ku vengana exikarhi ka wena ni wansati, ni xikarhi ka rixaka ra wena ni rixaka ra wansati; ri ta ku faya nhloko, wena u ri luma xirhendze.”

¹⁶ Eka wansati, a ku: “Ndzi ta ku engetelela ngopfu ku vaviseka ka ku tika ka wena, u ta veleka vana hi ku vaviseka; ku navela ka wena ku ta ya eka nuna wa wena, kambe yena u ta ku fuma.”

¹⁷ Ni ka wanuna, a ku: “Leswi u yingiseke rito ra nsati wa wena, u dya murhi lowu ndzi nga ku lerisa, ndzi ku: ‘U nga tshuki u dya,’ misava yi rhuketeriwa hikwalaho ka wena. U ta dya swa yona hi ku vaviseka hi masiku hinkwawo ya ku hanya ka wena;

¹⁸ yi ta ku mirisela mitwa ni mahlwehlwe, u ta dya byanyi bya nhova.

¹⁹ U ta dya vuswa hi nyuku wa mombo wa wena, u ko u tlhelela emisaveni, hikuva u humesiwile eka yona. Hikuva u ntshuri, u ta tlhelela entshurini.”

²⁰ Adamu (munhu) a thya nsati wa yena vito ra Evha (vutomi), hikuva u ve mana wa lava hanyaka hinkwavo.

²¹ Kutani Yehovha Xikwembu a endlela Adamu ni nsati wa yena tinguvu ta madzovo, a va ambexa tona.

²² Kutani Yehovha Xikwembu a ku: “Maswivo, munhu u hundzukile, a kotisa un'wana wa hina loko ku ri ku tiva leswo saseka ni leswo biha; kambe sweswi, a nga fanekeli ku tshambuluta voko a teka na wona murhi wa vutomi, a dya, a hanya hilaha ku nga heriki.”

²³ Kavaloko Yehovha Xikwembu a n'wi humesa entangeni wa Edeni ku ya rima misava leyi a nga humesiwa eka yona.

²⁴ A hlongola munhu, a veka tlhelo ra vuxa ka ntanga wa Edeni, tikerubu leti tamelaka fumu leri vangamaka hi matlhelo hinkwawo, a ta sivela ndlela ya murhi wa vutomi.