Genesa 13 - Xitsonga (Bibele)

Ta Abrama loko a vuyela eKanana, a hambana na Lota.

¹ Kutani Abrama a suka eEgipta, a tlhelela etlhelo ra dzonga, a ri ni nsati ni hinkwaswo swa yena, na Lota a a ri na yena.

² Abrama a a fuwe ngopfu swifuwo, ni mali yo basa, ni ya nsuku.

³ Kutani a famba mimpfhuka, a suka edzongeni a fika eBetele, laha ntsonga wa yena i ngi wu dzimiwile kona eku sunguleni, exikarhi ka Betele na Ayi,

⁴ laha ngi ku ri ni gandzelo leri a ri akeke kona eku sunguleni, kutani Abrama a khongela kona vito ra Yehovha.

⁵ Lota na yena, loyi a fambaka na Abrama, a a fuwe swifuwo leswitsongo ni leswikulu, ni mitsonga.

⁶ Kambe tiko a ri nga ringananga leswaku va tshama swin'we.

⁷ Kutani ku humelela mholovo exikarhi ka varisi va mitlhambi ya Abrama ni varisi va mitlhambi ya Lota (kasi Vakanana ni Vaperesi a va ri vaaki va tiko enkarhini wolowo).

⁸ Kutani Abrama a byela Lota, a ku: “Ku nga tshuki ku humelela dzolonga exikarhi ka mina na wena, ni le xikarhi ka varisi va mina ni varisi va wena, hikuva hi vana va tata un'we.

⁹ Xana tiko hinkwaro a ri kona emahlweni ka wena xana? Hambana na mina, ndza ku khongela. Loko u teka ra ximatsi, ndzi ta ya exineneni; loko u ya exineneni, ndzi ta ya eximatsini.”

¹⁰ Kavaloko Lota a tlakusa mahlo, a vona tiko hinkwaro ra Yordani ku fika le Sowara, ri cheletiwa hinkwaro (Yehovha a nga si lovisa Sodoma na Gomora), ri fana ni ntanga wa Yehovha, ni misava ya Egipta.

¹¹ Lota a tihlawulela tiko hinkwaro ra Yordani; Lota a tifambela tlhelo ra vuxa; va avene kwalaho.

¹² Abrama a tshama etikweni ra Kanana kambe Lota a tshama emitini ya le rivaleni, a dzime mitsonga ya yena ku fika le Sodoma.

¹³ Kasi vanhu va Sodoma a va bihile ngopfu, va ri vadyohi lavakulu emahlweni ka Yehovha.

¹⁴ Kutani Yehovha a byela Abrama, loko Lota a hambene na yena, a ku: “Tlakusa mahlo u languta ku sukela laha u nga kona, tlhelo ra en'walungwini, ni le dzongeni, ni le vuxeni, ni le vupeladyambu;

¹⁵ hikuva tiko leri u ri vonaka, ndzi ta ri nyika wena ni vatukulu va wena hilaha ku nga heriki.

¹⁶ Ndzi ta andzisa vatukulu va wena va fana ni ntshuri wa misava; hileswaku loko munhu a nga hlaya ntshuri wa misava, na vona va ta hlayiwa.

¹⁷ Suka u fambafamba etikweni leri, eku leheni ka rona, ni le ku anameni ka rona, hikuva ndzi ta ku nyika rona.”

¹⁸ Kavaloko Abrama a andlamuka a ya tshama emikuhlwini ya Mamre, lowu nga Hebroni, kutani kona a akela Yehovha gandzelo.