Genesa 11 - Xitsonga (Bibele)

Ta Xihondzo xa Babele.

¹ Misava hinkwayo a yi ri ni ku vulavula kun'we, ni marito man'we.

² Kuteloko va suke evuxeni, va kuma rivala etikweni ra Xinara, va aka kona.

³ Kutani va byelana, va ku: “A hi yeni hi ya vumba switina hi swi hisa hi ndzilo.” Kutani va va ni switina ematshan'weni ya maribye, ni nhlaka ematshan'weni ya mbompfi.

⁴ Va engeta va ku: “A hi yeni hi ya tiakela muti ni xihondzo, xihlungwa xa xona xi fika etilweni, hi tiendla vito, hi nga ti tshuka hi hangalasiwa ehenhla ka misava hinkwayo.”

⁵ Kambe Yehovha a xika ku ta vona muti ni xihondzo xexo vana va vanhu a va ri karhi va xi aka.

⁶ Kutani Yehovha a ku: “Maswivo, va tiko rin'we, ni ririmi ra vona hinkwavo i rin'we ntsena; kambe leswo i ku sungula ka makungu ya vona, kutani a ku na nchumu lexi nga va sivelaka ku heta hinkwaswo leswi va swi kaneleke.

⁷ A hi yeni, hi xika, hi hambanyisa kona ku vulavula ka vona, leswaku va nga ha twanani.”

⁸ Yehovha a va hangalasa emisaveni hinkwayo; kutani va tshika ku aka muti.

⁹ Hi kwalaho va wu thya vito ra Babele, hikuva hi kona Yehovha a hambanyiseke ku vulavula ka misava hinkwayo; kutani hi kona Yehovha a va hangalaseke ehenhla ka misava hinkwayo.

¹⁰ Tinxaka ta Xeme, hi leti: Xeme, loko a ri ni dzana ra malembe, a veleka Aripakixada hi lembe ra vumbirhi endzhaku ka ndhambi;

¹¹ kuteloko Xeme a velekile Aripakixada, a hanya malembe ya 500, a veleka vana va xinuna ni va xisati.

¹² Aripakixada, kuteloko a hanyile malembe ya 35, a veleka Xela;

¹³ kuteloko Aripakixada a velekile Xela, a hanya malembe ya 403, a veleka vana va xinuna ni va xisati.

¹⁴ Xela, loko a ri ni malembe ya makume manharhu, a veleka Ebere,

¹⁵ kuteloko Xela a velekile Ebere, a hanya malembe ya 403, a veleka vana va xinuna ni va xisati.

¹⁶ Ebere, loko a ri ni malembe ya 34, a veleka Pelege;

¹⁷ kuteloko Ebere a velekile Pelege, a hanya malembe ya 430, a veleka vana va xinuna ni va xisati.

¹⁸ Pelege, loko a ri ni makume manharhu ya malembe, a veleka Rhewu;

¹⁹ kuteloko Pelege a velekile Rhewu, a hanya malembe ya 209, a veleka vana va xinuna ni va xisati.

²⁰ Rhewu, loko a ri ni malembe ya 32, a veleka Serugi;

²¹ kuteloko Rhewu a velekile Serugi, a hanya malembe ya 207, a veleka vana va xinuna ni va xisati.

²² Serugi, loko a ri ni malembe ya makume manharhu, a veleka Nahoro;

²³ kuteloko Serugi a velekile Nahoro, a hanya malembe ya 200, a veleka vana va xinuna ni va xisati.

²⁴ Nahoro, loko a ri ni malembe ya 29, a veleka Tera;

²⁵ kuteloko Nahoro a velekile Tera, a hanya malembe ya 119, a veleka vana va xinuna ni va xisati.

²⁶ Tera a hanya malembe ya 70, kutani a veleka Abrama, na Nahoro, na Harana.

²⁷ Tinxaka ta Tera hi leti: Tera a veleka Abrama, na Nahoro, na Harana, kutani Harana a veleka Lota.

²⁸ Kambe Harana a fa emahlweni ka Tera tata wa yena, etikweni leri a nga velekiwa eka rona, ku nga Uru wa Kalediya.

²⁹ Kutani Abrama na Nahoro va teka vasati; vito ra nsati wa Abrama a a ri Sarayi, vito ra nsati wa Nahoro a a ri Milika, n'wana Harana, tata wa Milika ni wa Yisika.

³⁰ Sarayi a a ri mhika, a a nga ri na vana.

³¹ Kutani Tera a teka Abrama, n'wana wa yena, na Lota, n'wana Harana, n'wana wa n'wana wa yena, na Sarayi n'wingi wa yena, nkata Abrama n'wana wakwe, kutani va huma swin'we Uru wa Kalediya, va kongoma tiko ra Kanana. Kuteloko va fike eHarana, va aka kona.

³² Masiku ya Tera a ma ri malembe ya 205, kutani Tera a fela kona eHarana.