Filemoni 1 - Xitsonga (Bibele)

Ku xeweta.

¹ Pawulo, mubohiwa wa Yesu Kriste, na Timotiya makwerhu; Eka Filemoni, murhandziwa ni mutirhi-kulorhi,

² na Afiya la rhandziwaka, na Arkipo, nakulorhi eku lweni, ni kereke leyi nga endlwini ya wena;

³ Tintswalo ni ku rhula a swi ve na n'wina, leswi pfaka eka Xikwembu Tata wa hina, ni le ka Hosi Yesu Kriste.

Ku khensa hikwalaho ka ku pfumela ni rirhandzu ra Filemoni.

⁴ Ndzi tlangela Xikwembu xa mina hi masiku loko ndzi ri karhi ndzi ku anakanya emikhongelweni ya mina,

⁵ hilaha ndzi yingisaka ku pfumela ka wena eka Hosi Yesu, ni rirhandzu ra wena eka vakwetsimi hinkwavo,

⁶ ndzi kombela leswaku ku hlangana ka ku pfumela ka wena ku tirha hi matimba, hi ku vonisisa leswo saseka hinkwaswo leswi endleriwaka Yesu Kriste eka rikwenu.

⁷ Ntsena makwerhu, hi ni ku khensa ni ku chaveleriwa lokukulu erirhandzwini ra wena, hikuva timbilu ta vakwetsimi ti rhurhise hi wena.

Muapostola Pawulo a khongelela Onesima.

⁸ Hikwalaho, hambi ndzi nga pfumeleriwa ngopfu hi Kriste ku ku lerisa leswi fanelaka,

⁹ hikwalaho ka rirhandzu, ndzi tihlawulele ku ku khongotela, mina ndzi nga Pawulo, mina la dyuhaleke, kambe sweswi ndzi nga mubohiwa hikwalaho ka Yesu Kriste,

¹⁰ ndzi khongelela eka wena Onesima, n'wananga, yeloyi ndzi n'wi velekeke ndzi ri ekhotsweni,

¹¹ loyi a nga ku pfunangiki khale, kambe sweswi, u ta ku pfuna ngopfu, kukota leswi a ndzi pfunaka, ndzi n'wi tlherisele eka wena.

¹² N'wi amukele, hikuva i ngati ya mina.

¹³ A ndzi ehleketile ku n'wi sivela, a ta tshama na mina, a ta ndzi tirhela ematshan'weni ya wena eku bohiweni ka mina hikwalaho ka Evhangeli,

¹⁴ kambe a ndzi rhandzanga ku endla nchumu, ndzi nga si tiva ku rhandza ka wena, leswaku vunene byolebyo byi nga endliwa hi wena u nga byisiwi, kambe ku va hi ku tirhandzela ka wena.

¹⁵ Hikuva kuteloko a avene na wena hi nkarhinyana, a swi ri leswaku kumbe a tlhela a va na wena hi masiku,

¹⁶ ku nga ri kukotisa khumbi, kambe a va la tlurisaka khumbi, a va ndzisana leyi rhandziwaka ngopfu hi mina, na wena u nga n'wi rhandza ku tlurisa, hambi enyameni, hambi eHosini.

¹⁷ Kutani sweswi, loko u ringanisa leswaku ndzi xaka ra wena, n'wi rhurhele kukota loko ndzi ri mina.

¹⁸ Hambi swi ri leswaku u tshama a ku onhela hi nchumu, kumbe u ni nandzu eka wena, swi lave eka mina.

¹⁹ Mina Pawulo, ndzi ku tsalela mhaka leyi, hi voko ra mina, ndzi ta ku tlherisela; hambi ndzi nga vuri leswaku u ni nandzu eka mina, wena, hi nhloko ya wena.

²⁰ Ina, makwerhu, a ndzi tsakisiwe sweswo hi wena eHosini.

²¹ Ndzi ku tsalele sweswo ndzi ri karhi ndzi tivisisa ku yingisa ka wena, kutani ndza swi tiva leswaku u ta endla ni ku tlurisa leswi ndzi swi vulaka.

²² Kambe, na swona, ndzi lunghisele yindlu; hikuva ndza tshemba leswaku ndzi ta tlheriseriwa eka n'wina hi mikhongelo va n'wina.

²³ Epafra, la bohiweke na mina hikwalaho ka Yesu Kriste, wa ku rungula,

²⁴ na Marka, na Aristarko, na Demasi, na Luka, vatirhikulorhi.

²⁵ Tintswalo ta Hosi ya hina Yesu Kriste a ti ve ni mimoya ya n'wina!