Ezekiele 42 - Xitsonga (Bibele)

¹ Kutani a ndzi humesela erivaleni ra le handle, hitlhelo ra n'walungu, a ndzi yisa emakamareni lawa vundzamaneke ni xivandla xo pfariwa, ya langutana ni khumbi hitlhelo ra n'walungu.

² Ku leha ka kona a swi ri swisungunhu swa dzana (tlhelo ra nyangwa ya n'walungu), ku anama a swi ri swa ntlhanu wa makume,

³ ku lavana ni swisungunhu swa makume mambirhi swa rivala ra le xikarhi, ni ku lavana ni maribye yo andlariwa ya rivala ra le handle; tinkupakupa ta kona a ti langutana, ti ri ta tinxaxa tinharhu.

⁴ Emahlweni ka makamara wolawo, a ku ri ni rivala ra ku famba, ra ku anama ka swisungunhu swa khume; a ku ri ni ndlela ya xisungunhu xin'we yo nghena endzeni; tinyangwa ta tona a ti languta tlhelo ra n'walungu.

⁵ Makamara ya le henhla a ma larile; hikuva tinkupakupa ta makamara ya le hansi ni ya le xikarhi a ti engetela makamara ya kona.

⁶ Hikuva a ti endlile swithezi swinharhu, a ku nga ri na timhandze kukota timhandze ta rivala; hikwalaho ku nga lala makamara ya le henhla ku tlula ya le hansi ni ya le xikarhi.

⁷ Loko ri ri khumbi leri ngi ri xaxamele ni makamara, ehandle, hitlhelo ra rivala ra le handle, ku leha ka rona a swi ri swisungunhu swa ntlhanu wa makume, laha ngi ri langutana ni makamara.

⁸ Hikuva ku leha ka makamara lawa ya languteke erivaleni ra le handle a ya ri ya swisungunhu swa ntlhanu wa makume; kasi emahlweni ka tempele a ya ri ya swisungunhu swa dzana.

⁹ Kutani ehansi ka makamara lawa, nyangwa a yi ri kona leyi languteke evuxeni; munhu a a nghena ha yona loko a humela erivaleni ra le handle.

¹⁰ Ekhumbini ra rivala ra le xikarhi leri langutaka evuxeni, eku anameni ka rona, a ku ri ni makamara na kona lawa lavaneke ni xivandla xo pfariwa ni khumbi.

¹¹ Emahlweni ka wona a ku ri ni ndlela leyi fanaka ni ndlela ya makamara ya le n'walungwini; ku leha, na kona ku anama ka wona, a swi fana ni ku leha ni ku anama ka lawaya, a swi ri tano ni timbanti ta tona ni malunghisela ya tona.

¹² Tinyangwa ta makamara ya dzonga a ti ri tin'we ni ta n'walungu; a ku ri na kona nyangwa eku sunguleni ka ndlela leyi nga ekhumbini, ku ta nghena ha yona munhu la humaka evuxeni.

¹³ Kutani a ku eka mina “Makamara ya tlhelo ra n'walungu ni makamara ya le dzongeni, lama xaxameleke ni xivandla xo pfariwa, i makamara ya vukwetsimelo, laha vaprista lava tshinelelaka Yehovha va nga ta dyela swilo swo kwetsimisisa ngopfu kona; hilaha va nga ta veka kona swilo swo kwetsimisisa, tinyiko ni magandzelo ya swidyoho, ni ya milandzu. Xivandla xi kwetsimile.

¹⁴ Loko vaprista va nghenile a va nga humi evukwetsimelweni ku nghena erivaleni ra le handle va nga si veka kona tinguvu leti va nga endla ha tona mitirho; hikuva hi leti kwetsimaka; va ta ambala tin'wanyana, kutani va ta tshinelela tiko.”

¹⁵ Kuteloko a hetile ku pima kwalaho endzeni ka yindlu, a ndzi humesa hi nyangwa leyi nga tlhelo ra vuxa, kutani a pima rirhangu ra le handle hi matlhelo hinkwawo.

¹⁶ A pima khumbi ra le tlhelo ra vuxa hi nhonga ya mpimo; swi ri swisungunhu swa ntlhanu wa madzana, swa nhonga yo pima.

¹⁷ Kutani a pima khumbi ra le tlhelo ra n'walungu, a swi ri swisungunhu swa ntlhanu wa madzana ya nhonga leyo pima.

¹⁸ Kutani tlhelo ra dzonga a pima swisungunhu swa ntlhanu wa madzana ya nhonga ya mpimo.

¹⁹ A ya tlhelo ra vupeladyambu, a pima hi nhonga ya mpimo swisungunhu swa ntlhanu wa madzana.

²⁰ Hi matlhelo ya mune, a pima khumbi leri rhendzelaka yindlu; ku leha a ku ri kantlhanu wa madzana, ni ku anama kantlhanu wa madzana, ku avanyisa lexi kwetsimaka ni lexi nga kwetsimiki.