Ezekiele 4 - Xitsonga (Bibele)

Ta ku bvumbhiwa ka ku onhaka ka Yerusalema.

¹ “Loko u ri wena, n'wana wa munhu, u teka xitina, u xi veka emahlweni ka wena, u tsala eka xona xifaniso xa muti wa Yerusalema.

² U wu sivelela hilaha va endlaka hakona enkarhini wa nyimpi, u aka khokholo, u pfuxa tinhulu eka wona, ni swo hlanhla rirhangu ra wona.

³ Kutani u teka pani ra nsimbhi u ri endla khumbi ra nsimbhi exikarhi ka wena ni xifaniso xa muti, u wu langutisisa; kutani wu ta rhendzeriwa; na wena, u wu sivela. Xona xi ta va xikombiso eka yindlu ya Israele.

⁴ “Endzhaku ka swona u ta etlela hi rivambu ra ximatsi, u veka ku homboloka ka yindlu ya Israele eka rona. Kutani u ta rhwala ku homboloka ka vona hi masiku lama ringanaka ku etlela ka wena.

⁵ Mina, ndzi ta ku ringanisela malembe ya ku homboloka ka vona hi masiku, ma va masiku ya 390; u ta rhwala sweswo ku homboloka ka yindlu ya Israele.

⁶ Loko u ma hetile, u ta engeta u etlela hi rivambu ra xinene ra wena, sweswo u ta rhwala ku homboloka ka yindlu ya Yuda hi masiku ya mune wa makume. Siku rin'wana ni rin'wana ri ringanisa lembe.

⁷ U ta languta tlhelo ra Yerusalema, lowu nga siveleriwa, u tshambuluta eka wona voko ra wena leri nga funengetiwangiki, kutani u ta bvumbha eka wona.

⁸ Vona, ndzi ta veka mapindza ehenhla ka wena leswaku u nga hundzulukeli erivambyini rin'wana, ku kondza u va u hetile masiku ya ku siveriwa ka wena.

⁹ “U teka koro, ni barley, ni tinyawa, ni swinyawana, ni mphoho, ni n'wahuva, u swi katsa swin'we embiteni, u tipfuvela vuswa ha swona, hi masiku hinkwawo ya ku etlela ka wena. U ta dya byona hi masiku ya, 390.

¹⁰ Leswi u nga ta swi dya, swi ta tika ku ringana tixikele ta makume mambirhi hi siku rin'wana ni rin'wana. U swi dya u nusa eka swona kambe na kambe.

¹¹ U ta nwa matinyana lama ringanaka magombe mambirhi hi siku; u ta ma nwa hi nkarhi, ni nkarhi.

¹² U ta dya swinkwanyana swa barley, u swi sweka hi vulongo bya munhu emahlweni ka vona.”

¹³ Kutani Yehovha u te: “Hi mukhuva lowo, vana va Israele va ta dya vuswa lebyi yilaka ematikweni laha ndzi nga ta va hlongolela kona.”

¹⁴ Kavaloko ndzi ku: “Yo! Yehovha Xikwembu, vona moya wa mina a wu nga si tinyamisa, a ndzi si dya xifuwo lexi nga fa, hambi lexi nga handzuriwa ku sukela evuntshweni bya mina ku fikela sweswi, ni nyama leyi nunh'waka a yi nghenanga enon'wini wa mina.”

¹⁵ Hilaha a nga te eka mina: “Vona, ndzi ku nyika vulongo bya homu ematshan'weni ya vulongo bya munhu, u ta sweka vuswa bya wena ha byona.”

¹⁶ Kutani a ku: “N'wana wa munhu, ndzi ta susa timbuva ta vuswa emutini wa Yerusalema, va ta dya vuswa hi mpimo, va ri karhi va hlunama; va ta nwa mati hi mpimo, va ri karhi va tshuka.

¹⁷ Va ta pfumala vuswa ni mati, va ta tshuka hinkwavo, va ta ondza eku hombolokeni ka vona.”