Ezekiele 36 - Xitsonga (Bibele)

Ta ku pfuxiwa ka Israele.

¹ “Na wena, n'wana wa munhu, profetela tintshava ta Israele, u ku: Tintshava ta Israele, yingisani rito ra Yehovha!

² Hosi Yehovha u vulavula sweswo, a ku: Leswi nala a vuleke ha n'wina, a ku: ‘Ha! Ha! Tintshava leti, leta khale, hi ti fumile kutani!’

³ Hikwalaho ka swona, profeta, u ku: Ku vula Hosi Yehovha: Kunene, leswi va rhandzeke hi matlhelo hinkwawo ku mi hlasela ni ku mi mita, leswi milomu yo biha ya vanhu, ni mahlevo ya vona swi kongomeke n'wina,

⁴ hikwalaho ka swona, tintshava ta Israele, yingisani rito ra Hosi: Hosi Yehovha u vulavula sweswo eka tintshava ni switsunga, eka mikova ni swinkobyana, eka marhumbi ya mananga, ni ka miti yo siyeriwa hi vanhu, leyi phangiweke ni ku thyathyaseriwa hi lava seleke va matiko ya le matlhelweni;

⁵ hikwalaho ka swona, ku vula Hosi Yehovha, a ku: Kunenenene endzilweni wa vukwele bya mina ndzi vulavula, ndzi wumeta lava seleke va matiko, na vona Vaedomu hinkwavo, lava tiaveleke tiko ra mina ku ri hlasela va heta, va ri ni timbilu leti tsakeke, ni ku tsan'wa emimoyeni ya vona.

⁶ Hikwalaho, profetela misava ya Israele, u byela tintshava ni switsunga, milambu ni mikova, u ku: Hosi Yehovha u vulavula sweswo, a ku: Hi mina loyi, ndzi vulavulaka hi rilondzo ra mina, ndzi vulavula hi vukari bya mina, hikuva mi rhwexiwile tingana ta matiko.

⁷ “Hikwalaho, Hosi Yehovha u vulavula sweswo, a ku: Ndzi yimisile voko ra mina, ndzi hlambanyile, ndzi ku: Matiko lama mi rhendzelaka ma ta rhwexiwa, na wona, tingana ta wona;

⁸ na n'wina, tintshava ta Israele, mi ta hlukisa marhavi ya n'wina, mi ta vekela tiko ra n'wina ra Israele mihandzu ya n'wina, hikuva ri le kusuhi ni ku vuya.

⁹ Hikuva ndzi ta eka n'wina, ndzi rhendzeleta mombo wa mina eka n'wina; mi ta rimiwa ni ku byariwa timbewu.

¹⁰ Kutani ndzi ta andzisa vanhu eka n'wina, yi ri yindlu ya Israele hinkwayo; miti yi ta tlhela yi va ni vanhu, ku ta tlhela ku akiwa marhumbi.

¹¹ Ndzi ta andzisa ehenhla ka n'wina vanhu ni swifuwo; va ta andza ni ku tala, ndzi rhandza leswaku mi va ni vaaki ku fana ni khale, ndzi ta mi endla leswinene ku tlula eku sunguleni, hilaha mi nga ta tiva leswaku hi mina Yehovha.

¹² Ndzi ta tisa ehenhla ka n'wina vanhu, ri nga tiko ra mina ra Israele va ta ku fuma, u va ndzhaka ya vona u nga ka u nga ha va heti.

¹³ “Hosi Yehovha u vulavula sweswo, a ku: Leswi va mi byelaka, va ku: ‘U dyile vanhu, u hetile tiko ra wena,’

¹⁴ hikwalaho ka swona u nga ka u nga ha dyi vanhu, u nga ka u nga ha heti tiko ra wena, ku vula Hosi Yehovha;

¹⁵ ndzi nga ka ndzi nga ha ku twisi tinhlambha ta matiko, u nga ka u nga ha khomisiwi tingana hi matiko; u nga ka u nga ha heti tiko ra wena, ku vula Hosi Yehovha.”

¹⁶ Rito ra Yehovha ri ndzi humelele, ri ku:

¹⁷ “N'wana wa munhu, va yindlu ya Israele, loko va ha tshamile etikweni ra vona, va ri nyamisile hi tindlela ta vona ni swiendlo swa vona; swiendlo swa vona, emahlweni ka mina, a swi fana ni thyaka ra wansati.

¹⁸ Kutani ndzi chulurile henhla ka vona vukari bya mina hikwalaho ka ngati leyi va nga yi halata etikweni, ni swifaniso leswi va ri nyamiseke ha swona.

¹⁹ Kutani ndzi va hangalasile exikarhi ka matiko, va khaperile ematikweni hinkwawo; ndzi va avanyisile hi tindlela ta vona ni swiendlo swa vona.

²⁰ Loko va fikile ematikweni lawa ingi va ya eka wona, va lo nyamisa vito ra mina ro kwetsima, laha ingi vanhu va ku ha vona: ‘Volavo, i tiko ra Yehovha, va humile etikweni ra yena.’

²¹ Kwalaho ndzi tsetselerile vito ra mina lero kwetsima; leri va yindlu ya Israele ingi va ri nyamisile ematikweni lawa va nga ya eka wona.

²² “Hikwalaho, byela yindlu ya Israele, u ku eka vona: Hosi Yehovha u vulavula sweswo, a ku: Ndzi endla leswi, ku nga ri hikwalaho ka n'wina, yindlu ya Israele, kambe hikwalaho ka vito ra mina lero kwetsima, leri mi ri nyamiseke ematikweni lawa mi yeke eka wona.

²³ Ndzi ta kwetsimisa vito ra mina lerikulu leri nga ni tingana exikarhi ka matiko lawa mi nga ri nyamisa eka wona, kutani matiko ma ta swi tiva leswaku hi mina Yehovha, ku vula Hosi Yehovha, loko ndzi ta kwetsimisiwa ha n'wina emahlweni ka vona.

²⁴ “Ndzi ta mi humesa ematikweni ndzi mi hlengeleta exikarhi ka matiko hinkwawo, ndzi mi vuyisa etikweni ra n'wina;

²⁵ ndzi ta mi xuva hi mati layo basa, mi ta tenga; ndzi ta mi basisa eka mathyaka ya n'wina hinkwawo ni ka swifaniso swa n'wina hinkwaswo.

²⁶ Ndzi ta mi nyika timbilu letintshwa, ndzi veka endzeni ka n'wina moya lowuntshwa, ndzi susa enyameni ya n'wina timbilu ta maribye, ndzi mi nyika timbilu ta nyama.

²⁷ Ndzi ta veka endzeni ka n'wina moya wa mina ndzi endla leswaku mi famba eku leriseni ka mina, mi va mi hlayisa milawu ya mina ni ku endla ha yona.

²⁸ Mi ta aka etikweni leri ndzi nga ri nyika vatata wa n'wina, mi va tiko ra mina, na mina ndzi va Xikwembu xa n'wina.

²⁹ Ndzi ta mi lwela eka mathyaka ya n'wina hinkwawo; ndzi ta vitana koro, ndzi yi andzisa, ndzi nga ka ndzi nga ha wisi ndlala eka n'wina.

³⁰ Ndzi ta andzisa mihandzu ya mirhi, ni leswi vekiwaka hi masimu, leswaku mi nga ha soriwi exikarhi ka matiko hikwalaho ka ndlala.

³¹ Mi ta tsundzuka tindlela ta n'wina to biha, ni swiendlo swa n'wina leswi ngi swi nga ri leswinene mi tinyenyetsa hikwalaho ka swidyoho ni manyala ya n'wina.

³² Ndzi swi endla, ku nga ri hikwalaho ka n'wina, ku vula Hosi Yehovha; swi tiveni! Mi va ni tingana, mi tisola hikwalaho ka tindlela ta n'wina, yindlu ya Israele!

³³ “Hosi Yehovha u vulavula sweswo, a ku: Siku ndzi nga ta mi basisa eka swidyoho swa n'wina hinkwaswo, ndzi ta endla leswaku miti yi va ni vanhu, ni marhumbi ma tlhela ma akiwa.

³⁴ Ni misava yo hlaseriwa yi tlhela yi rimiwa, kasi a yi ri mananga emahlweni ya vahundzi va ndlela hinkwavo.

³⁵ Va ta ku: ‘Misava yoleyo, leyi ngi yi hlaseriwile, yi hundzuke yi fana ni ntanga wa Edeni; miti leyi ingi yi endliwile marhumbi, ni mananga, ni ku nhlanhliwa, yi akiwa kutani, ma va makhokholo!’

³⁶ Matiko lama nga ta va ma sele ematlhelweni ya n'wina, ma ta tiva leswaku hi mina Yehovha, ndzi pfuxeke leswi ingi swi nhlanhliwile, ndzi byarile kambe leswi ingi swi hlaseriwile! Mina Yehovha, ndzi vulavula, ndzi va ndzi endla.

³⁷ “Hosi Yehovha u vulavula sweswo, a ku: Ku ni mhaka leyi ndza ha ta ka pfumela ku laviwa hi yindlu ya Israele, ndzi va endlela yona: Ndzi ta andzisa vanhu va fana ni mitlhambi,

³⁸ ku fana ni mitlhambi ya tinyimpfu leto kwetsima ku fana ni mitlhambi ya Yerusalema, emikhubyeni leyikulu, hi sweswo miti leyi ingi yi endliwile mananga, yi ta tala hi mitlhambi ya vanhu; hilaha va nga ta tiva leswaku hi mina Yehovha.”