Ezekiele 2 - Xitsonga (Bibele)

¹ Kutani a ku eka mina: “N'wana wa munhu, pfuka u yima, ndzi ta vulavula na wena.”

² Kan'wekan'we moya wu nghena eka mina, loko a ri karhi a vulavula, wu ndzi yimisa emilengeni, kutani ndzi twa loyi a vulavulaka na mina.

³ A ku eka mina: “N'wana wa munhu ndzi ku rhuma eka vana va Israele lava nga yingisiki, lava ndzi fularheleke va ndzi dyohele swin'we ni vatata wa vona ku fika siku ra namuntlha.

⁴ I vana lava tiarisaka, lava nga ni timbilu leti nonon'hwaka; ndza ku rhuma eka vona, u ta va byela, u ku: ‘Hosi Yehovha u ri.’

⁵ Hambi va yingisa, kumbe va nga yingisi, kasi i yindlu leyi tiarisaka, va ta swi tiva leswaku ku ni muprofeta exikarhi ka vona.

⁶ Na wena, n'wana wa munhu, u nga va chavi, u nga chavisiwi hi ku vulavula ka vona, hambi u le xikarhi ka swigatlu ni mitwa ni swipame, u nga chavi ku vulavula na vona, u nga chavi mimombo ya vona hambi va ri vanhu lava tiarisaka.

⁷ U ta va byela marito ya mina, hambi va yingisa, hambi va nga yingisi hikuva va tiarisile.

⁸ Wena, n'wana wa munhu, u yingisa leswi ndzi ku byelaka swona! U nga tiarisi kukota yindlu leyi ya vatiarisi. Ahlamisa nomu wa wena u dya leswi ndzi nga ta ku nyika swona.”

⁹ Kuteloko ndzi languta, ndzi vona voko ri tshambuluteriwele eka mina, ri tamele buku leyi songiweke.

¹⁰ A yi phurumula emahlweni ka mina; a yi tsariwile endzeni ni le handle; swirilo, ni mahlomulo, ni ku vaviseka a swi tsariwe eka yona.