Estere 7 - Xitsonga (Bibele)

Ta ku dlayiwa ka Hamani.

¹ Hosi yi ya na Hamani eswakudyeni swa nkosikazi Estere.

² Na kambe hosi yi ku eka Estere, hi siku ra vumbirhi, loko ku nwiwa vhinyo: “U kombela yini, nkosikazi Estere? U ta xi nyikiwa. U kombela yini? Ni loko ku nga va ku avanyisa ka vumbirhi ka ku fuma, u ta endleriwa swona.”

³ Nkosikazi Estere a hlamula, a ku: “Loko ngi ndzi kume tintswalo emahlweni ka wena, hosi, loko hosi yi nga pfumela, a ndzi nyikiwe ku hanya ka mina hi ku kombela ka mina, ni ku hanya ka varikwerhu hi ku kombela ka mina;

⁴ hikuva hi xavisiwile, mina ni varikwerhu, leswaku hi herisiwa hi dlawa, hi lovisiwa. Kambe; loko hi xavisiwile leswaku hi ta endliwa makhumbi ya vavanuna ni ya vavasati, ingi ndzi miyerile ndzi ku ntsee; kambe muxanisi a nga hluleka ku riha leswi hosi yi nga ta onhakelwa hi swona.”

⁵ Kutani hosi Ahasuwerusi a hlamula, a ku eka nkosikazi Estere: “La tiyeke mbilu ku endla sweswo, i mani-ke, u kwihi?”

⁶ Estere a ku: “Muxanisi ni nala, i Hamani, munhu lowo biha!” Kutani Hamani a tshuka ngopfu emahlweni ka hosi ni nkosikazi.

⁷ Hilaha hosi, eku kariheni ka yona, yi sukaka eswakudyeni, yi tiyelaka entangeni wa yindlu ya vuhosi; Hamani, yena, a yima kwalaho, a tikhongelela vutomi bya yena eka nkosikazi Estere hikuva a swi vonisisile leswaku rifu ra yena ri kaneriwile hi hosi.

⁸ Hosi yi vuya hi le ntangeni wa yindlu ya vuhosi, yi vuyela endlwini, laha ingi ku nwiwa vhinyo. Kasi Hamani a tiwisele exilawini lexi Estere a nga eka xona. Hosi yi ku: “Xana hileswaku, u pfukela nkosikazi matimba emahlweni ka mina endlwini ya mina?” Mhaka yoleyo ya ku ya ha huma enon'wini wa hosi, ku funengetiwa nghohe ya Hamani.

⁹ Ndhuna yin'wana, Harabona, yi ku eka hosi: “Vona, mhandze ya ku leha kantlhanu wa makume ya swisungunhu, leyi Hamani a yi celeleke Mordekayi la vulavuleke swinene eka hosi, yi yimisiwe endlwini ya Hamani.” Kutani hosi yi ku: “N'wi hayekeni eka yona.”

¹⁰ Kutani va hayeka Hamani emhandzeni leyi ngi yi lunghiseriwe Mordekayi, kutani vukari bya hosi byi vomba.