Esaya 60 - Xitsonga (Bibele)

Ta ku kwetsima ka Yerusalema lontshwa.

¹ “Suka u yima, u va u kwetsima, hikuva ku vonakala ka wena ku xile, kutani ku twala ka Yehovha ku humelele eka wena!

² Hikuva, waswivo, munyama wu ta funengeta misava, ni papa lera ntima ri ta va ehenhla ka matiko; kambe Yehovha u ta ku humelela, kutani ku twala ka yena ku ta voninga ehenhla ka wena.

³ Matiko ma ta famba eku vonakaleni ka wena, ni tihosi ti ta ta eku kwetsimeni ka tin'hwembeti ta wena.

⁴ Rhalarhala matlhelo hinkwawo, u languta: Va hlengeletana hinkwavo, va ta eka wena vana va wena va huma ekule, ni vana va wena va xisati va vukarhiwa etsheveni.

⁵ “U ta swi vona, kutani u ta tsaka, mbilu ya wena yi ta tlulatlula, yi va yi ahlama hi ku tsaka, hikuva rifuwo ra lwandle ri ta kongoma wena, vukosi bya matiko byi ta ta eka wena.

⁶ Tikamela to tala, ni tikamela letintshwa ta Midiyani, ni ta Efa, ti ta ku funengeta; hinkwavo va Xeba va ta ta, va ta tisa nsuku ni mirhi ya risuna, kutani va ta tlangela Yehovha.

⁷ Mitlhambi hinkwayo ya Kedari, yi ta hlengeletana ka wena, tinyimpfu ta Nebayoto ti ta ku tirhela, ti ta humesiwa egandzelweni ra mina tanihi nhlengo lowu khensiwaka, kutani ndzi ta twarisa yindlu ya ku twala ka mina.

⁸ I va mani, lava hahaka kukotisa mapapa, tanihi matuva exihahlweni xa wona?

⁹ Hikuva swihlale swi ta langutela mina, kutani tingalava ta Tarxixi ti ta rhanga ti ta ku vuyisa vana va wena hi le kule swin'we ni silivhere ya vona, ni nsuku wa vona, hi vito ra Yehovha, Xikwembu xa wena, hikwalaho ka Mukwetsimi wa Israele, la ku dzunisaka.

¹⁰ Vana va n'eni va ta aka rirhangu ra wena, kutani tihosi ta vona ti ta ku tirhela, hikuva evukarini bya mina ndzi ku bile, kambe etintswalweni ta mina, ndzi ku tsetselele.

¹¹ Tinyangwa ta wena ti ta pfuriwa hi mikarhi hinkwayo, nhlekanhi ni vusiku a ti nga pfariwi, leswaku ku ta kota ku nghena vukosi bya matiko, ni tihosi ta wona ni malandza ya tona.

¹² Hikuva matiko lama nga ku tirheliki ma ta lova, matiko lawa ma ta herisiwa.

¹³ Ku twala ka Lebanoni, ni kipresi, ni nkuhlu, ni n'wambula, swi ta ta swin'we ka wena, ku bombisa xivandla xa mina xa ku kwetsima, kutani ndzi ta twarisa xivandla lexi milenge ya mina yi yimaka ka xona.

¹⁴ Vana va vaxanisi va wena va ta ta eka wena hi ku titsongahata, kutani hinkwavo lava ku soleke va ta khinsama emilengeni ya wena; u ta vuriwa muti wa Yehovha, Siyoni wa Mukwetsimi wa Israele.

¹⁵ Kasi khale a u tshikiwile, u vengiwile, u tshamile u ri swaku, sweswi ndzi ta endla ha wena ku dzuna ka mikarhi, ni ku tsaka ka tinxaka hinkwato.

¹⁶ U ta an'wa mafi ya matiko, u ta an'wa vele ra tihosi; kutani u ta tiva leswaku mina Yehovha, ndzi muponisi wa wena, ni leswaku Lowa matimba wa Yakobo, i mukutsuri wa wena.

¹⁷ Ematshan'weni ya koporo, ndzi ta vitana nsuku, ematshan'weni ya nhumbu, ndzi ta vitana silivhere, ematshan'weni ya timhandze koporo, ni le matshan'weni ya maribye nhumbu; ndzi ta ku fumisa hi ku rhula, kambe u ta risiwa hi ku lulama.

¹⁸ “Ku nga ka ku nga ha vuriwi ta tihanyi etikweni ra wena, hambi ti ri ta ku onhaka ni ku lova emindzilekaneni ya wena; u ta thya rirhangu ra wena ‘ku hlayiseka’, ni tinyangwa ta wena ‘ku tlangela’.

¹⁹ Dyambu ri nga ha vi ku vonakala ka wena ninhlekanhi, ni n'weti wu nga ha ku voningi Yehovha u ta va ku vonakala ka wena hi masiku, Xikwembu xa wena xi ta va ku twala ka wena.

²⁰ Dyambu ra wena ri nga ka ri nga ha peli, ni n'weti wa wena wu nga ka wu nga ha fi; hikuva eka wena, Yehovha u ta va ku vonakala loku nga heriki, kutani masiku ya nkosi wa wena ma ta va ma herile.

²¹ Ku ta kumiwa lavo lulama ntsena etikweni ra wena, va ta fuma tiko hi masiku; i hluke leri ndzi ri byaleke, i ntirho wa mavoko ya mina, leswaku wu ta ndzi twarisa.

²² Lontsongo u ta va khume ra madzana, lontsongo ngopfu, u ta va tiko lera matimba. Mina, Yehovha, ndzi hatlisisa swilo leswi emikarhini ya swona.”