Esaya 47 - Xitsonga (Bibele)

Ta ku tsongahatiwa ka Babilona.

¹ Xika, u tshamisa entshurini, wena nhwanyana, n'wana wa Babilona! Tshamisa ehansi, a ku na xiluvelo, wena, n'wana wa Vakalediya! Hikuva va nga ka va nga ha ku vuri loyi a titsetselelaka ni la rhandzaka mitsako.

² Teka maribye ya ku sila, u sila mapa! Susa xisirhelo xa wena, u tlakusa nguvu ya wena; funungula milenge ya wena, pela milambu!

³ Vuhava bya wena byi ta fununguriwa, tingana ta wena ti ta voniwa. Ndzi ta tirihisela, ndzi nga ka ndzi nga tsetseleri munhu.

⁴ Mukutsuri wa hina u thyiwa Yehovha wa mavandla Muhlawuleki wa Israele!

⁵ Tshamisa, u ku ntsee, u nghena emunyameni, nhwanyana wa Vakalediya! Hikuva va nga ka va nga ha ku vuri mufumi wa matiko.

⁶ Ndzi karihele tiko ra mina, ndzi va ndzi sandza ndzhaka ya mina, kutani ndzi va nyiketa emavokweni ya wena. A ku va tsetselelanga; u tikisile joko ra wena hi ku nonon'hwa ehenhla ka swikoxa.

⁷ U tshama u ku: “Ndzi ta fuma hi masiku!” A ku anakanyanga embilwini ya wena, a ku tsundzukanga leswaku swi ta hela.

⁸ Sweswi yingisa mhaka leyi, wena la rhandzaka mitsako, wena la akeke hi ku rhula, la nga ku embilwini ya wena: “Mina, mina ntsena! Ndzi nga ka ndzi nga vi noni, ndzi nga ka ndzi nga tsoniwi vana!”

⁹ Swilo leswimbirhi swi ta ku tela kan'we, hi siku rin'we: ku tsoniwa vana ni vunoni; swi ta ku wela ehenhla hinkwako, hambi u andzisile switshungulu, hambi vungoma bya wena byi ri ni matimba.

¹⁰ A wu tshemba mona wa wena, u ku: “A ndzi voniwi hi munhu!” Vutlhari ni vutivi bya wena a byi ku xisa, u te embilwini ya wena: “Mina, mina ntsena!”

¹¹ Kambe khombo ri ta ku wela ehenhla, u nga ka u nga voni ku sungula ka rona; maxangu ma ta ku humelela, u ta hluleka ku ma sivela; kutani ku lova ku ta ta ehenhla ka wena xikan'we, loko u nga swi tivi.

¹² Tana sweswi u ri ni ku hlahluva ka wena, ni vungoma bya wena lebyi u byi tirheke evuntshweni bya wena, kumbexana byi ta ku pfuna, byi ku endla la chaviwaka hi vanhu!

¹³ U tikarhatile ku ya eku hlahluveni! A va te sweswi va ku ponisa, lava pihlaka matilo, lava languta ka tinyeleti, lava bvumbhaka loko n'hweti yi tshama, lexi nga ta ku humelela!

¹⁴ Vonani, va hundzukile byanyi, ndzilo wu va herisile va nga ka va nga ponisi vutomi bya vona eku pfurheni ka ndzilo; a hi mpfundze wo sweka vuswa bya vona, ni ndzilo wa ku tinyawusa.

¹⁵ Lava u tikarhateke swin'we na vona va tano, lava u bindzuleke na vona evuntshweni bya wena va baleka un'wana ni un'wana hitlhelo ra yena; muponisi wa wena ku hava!