Esaya 38 - Xitsonga (Bibele)

Ta vuvabyi bya Hezekiya; a engeteriwa masiku. Tintsumi ta Babilona.

¹ Enkarhini wolowo Hezekiya a vabya ku yisa eku feni. Kutani Esaya, muprofeta, n'wana Amotsi, a ta eka yena a n'wi byela, a ku: “Yehovha u ri: ‘Lerisa timhaka ta yindlu ya wena, hikuva u ta fa, u nga ha pfuki.’ ”

² Kavaloko Hezekiya a hundzulukela ekhumbini, a khongela Yehovha, a ku:

³ “Oho Yehovha! U nga anakanya leswaku ndzi hanyile emahlweni ka wena hi ku lulama, ni mbilu leyi tengeke, ndzi endlile leswinene emahlweni ka wena.” Kutani Hezekiya a rila ngopfu.

⁴ Kutani, rito ra Yehovha ri ta eka Esaya, ri ku:

⁵ “Tlhelela eka Hezekiya, u ku eka yena: ‘Yehovha, Xikwembu xa Davhida, tata wa wena, xi ri: “Ndzi yingisile xikhongelo xa wena, ndzi vonile mihloti ya wena. Waswivo, ndza engetela masiku ya wena hi malembe ya khume na ntlhanu.

⁶ Ndzi ta ku lwela evokweni ra hosi ya Asiriya, wena ni muti lowu; ndzi ta sirheleta muti lowo.

⁷ Xikombiso lexi u xi nyikiwaka hi Yehovha, leswaku Yehovha u ta endla lexi a xi vuleke, hi lexi:

⁸ Ndzi ta tlherisa hi khume ra swikhandziyo ndzhuti lowu xikeke hi dyambu eswikhandziyeni swa Akazi.” ’ ” Kutani dyambu ri tlhela hi khume ra swikhandziyo eswikhandziyeni leswi ri swi hundzeke.

⁹ Risimu ra Hezekiya, Hosi ya Yuda, leri a ri tsaleke loko a horisiwile evuvabyini bya yena.

¹⁰ A ndzi ku: “Loko ndza ha kumile ku wisa ndzi ta xikela etinyangweni ta sirha. Ndzi tsoniwe malembe ya mina lama seleke.”

¹¹ A ndzi ku: “Ndzi nga ka ndzi nga ha voni Yehovha, yena Yehovha, emisaveni ya lava hanyaka; a ndzi nga ha voni vanhu; ndzi ta tshama ni va ku fa.

¹² “Yindlu ya mina yi susiwile, yi yisiwe ekule na mina kukotisa ntsonga wa murisi. Ngoti ya vutomi bya mina yi tsemiwile swange hi muluki; wa ndzi tsemetela engubyeni leyi a yi lukaka. Ku suka ninhlekanhi ku fika nivusiku u ta va u ndzi hetile!

¹³ Ndzi miyerile ku fika nimixo; kukotisa nghala, a fayetela marhambu ya mina hinkwawo, ku suka ninhlekanhi ku fika nimadyambu u ta ba u ndzi hetile!

¹⁴ A ndzi rila kukotisa mbewulana loko yi haha; a ndzi rila kukotisa tuva; mahlo ya mina a ma karhala hi ku languta ehenhla: Oho Yehovha! Ndzi le ku vavisekeni, wa nga ndzi sirheleta!”

¹⁵ Ndzi ta ku yini? U ndzi hlamurile, kutani u tirhile! Ndzi ta famba hi ku titsongahata ku fika eku heleni ka malembe ya mina, hikwalaho ka ku vaviseka ka moya wa mina.

¹⁶ Hosi, vutomi byi kumeka evuneneni bya wena, moya wanga wu kuma ku hanya eka byona; u ta ndzi tiyisa, u va u ndzi hanyisa kambe.

¹⁷ Waswivo, mahlomulo yanga ma tirhile ku hlayiseka ka mina; hi rirhandzu ra wena u humesile moya wa mina esirheni ra swahava; hikuva u cukumetile swidyoho swa mina hinkwaswo endzhaku ka wena.

¹⁸ Hikuva a hi xivandla xa vafi lexi ku twarisaka, a hi rifu leri ku dzunisaka, lava ngheneke esirheni a va ha languteli vutshembeki bya wena.

¹⁹ Muhanyi, kunene muhanyi, hi yena la ku dzunisaka, kukotisa mina namuntlha; tata wa vanhu u ta tivisa vana va yena ku tshembeka ka wena.

²⁰ Yehovha u ndzi ponisile; hi ta pfumisa tingoti ta magubu ya hina hi masiku hinkwawo ya ku hanya ka hina, endlwini ya Yehovha!

²¹ Kutani Esaya a ku: “A ku tisiwe buwu ra makuwa, va ta ri bohelela exilondzeni, kutani Hezekiya u ta hanya.”

²² Kutani Hezekiya a ku: “Ndzi ta nyikiwa xikombiso xihi leswaku ndzi ta tlhela ndzi khandziya endlwini ya Yehova-ke?”