Esaya 15 - Xitsonga (Bibele)

Ta ku avanyisiwa ka Mowabu.

¹ Hi vusiku lebyi Ara-Mowabu a weriweke hi byona, swi herile! Hi vusiku lebyi Kiri-Mowabu a weriweke hi byona u herile!

² Va tlhandlukela etempeleni, ni le Diboni, ni le switsungeni leswi tlakukeke va ya rila kona. Mowabu wa rila ehenhla ka Nebo na Medeba: nhloko yin'wana ni yin'wana yi byewuriwile, ni malebvu hinkwawo ma byewuriwile.

³ Emintsendzeleni va tifunengeta hi maxaka; ehenhla ka tindlu ni le tihubyeni, hinkwavo va vovola, va rila hi xivitwana.

⁴ Hexiboni na Eleyale va ba pongo; marito ya vona ma twakala ku yisa eYahasi; hikwalaho tinhenha ta Mowabu ta rila, mimoya ya tona yi ni mahika.

⁵ Mbilu ya mina yi rilela Mowabu; vabaleki va yena va fika eSowara ni le Egilata-Xelixiya; hikuva va tlhandlukela va ri karhi va rila entsungeni wa Luhiti; endleleni ya Horonayimi va ba mikosi.

⁶ Hikuva mati ya Nimri ma phyile, hikuva nhova yi tshwile, byanyi bya rilambyana a bya ha ri kona, a ka ha ri na rihunga.

⁷ Hikwalaho leswi seleke, ni timbuva ta vona, va swi yisa entsungeni wa nambu wa nsekeseke.

⁸ Hikuva nkosi wa vona wu rhendzele tiko ra Mowabu, ku vovola ka vona ku twakala ku fika eEgilayimi, tihuwa ta vona ti fika eBere-Elimi.

⁹ Hikuva mati ya Dimoni ma tele ngati; kutani ndzi ta ba Dimoni hi khombo leri tlurisaka: ingi nghala ku herisa vaponi va Mowabu, ni lava seleke etikweni.