Esaya 14 - Xitsonga (Bibele)

Risimu ra Vaisraele lava tshunxiweke.

¹ Hikuva Yehovha u ta tsetselela Yakobo u ta tihlawulela Israele; u ta tlhela a va akisa etikweni ra vona, kutani vamatiko va ta hlangana na vona, va namarhela yindlu ya Yakobo.

² Vamatiko va ta va teka va va yisa ekaya ka vona; kutani yindlu ya Israele yi ta va fuma etikweni ra Yehovha, va va malandza ya vona ya xinuna ni ya xisati; va ta endla lava va va boheke makhumbi ya vona, kutani va ta fuma lava va nga va xanisa.

³ Kutakuloko Yehovha a mi wisisa eku karhaleni ka n'wina, ni le makhombyeni ya n'wina, ni le ku bohiweni loko nonon'hwa loku ingi mi xanisiwa hakona,

⁴ mi ta tidzunisa ehenhla ka hosi ya Babilona hi risimu, mi ku:

⁵ “Muxanisi u herile hi ku yini? Vuhenyi ku hava!

⁶ Yehovha u tshovile nhonga ya vabihi ni xigombo xa tihosi leti ngi ti ba matiko evukarini bya tona, hi ku ba loku nga heriki: leti nga xanisa matiko ti nga ma nyiki nkarhi!

⁷ Misava hinkwayo yi wisile, yi rhula, va endla huwa ya ku tsaka;

⁸ swi tsandza ni mirhi ya kipresi yi tsakele ku onhaka ka wena, ni tikedari ta Lebanoni, ti ku: ‘Ka ha ri mpfhuka u etlela, a ku ra loyi a taka ku ta hi tsema!’

⁹ “Ni le hansi, xivandla xa vafi xi ni nkitsikitsi wa ku hlangana na wena: xi ku pfuxela vafi, ni tihosi hinkwato ta misava; xi pfuxile eswiluvelweni swa tona tihosi hinkwato ta matiko.

¹⁰ Hinkwato ti vulavula, ti ku: ‘Kasi! Na wena u herisiwile tanihi hina, na wena u fana na hina!’

¹¹ Vubombi bya wena byi hoxiwile evafini ni miloti ya timbila ta wena; xilawu xa wena i swivungu, u funengele swivungwana!

¹² “U wise ku yini ematilweni, wena nyeleti leyi vangamaka, n'wana wa vurhonga? U wise ku yini ehansi, wena muweri wa matiko?

¹³ U kanela embilwini ya wena, u ku: ‘Ndzi ta khandziya ehenhla, ndzi tlakusa xiluvelo xa mina ehenhla ka tinyeleti ta Xikwembu; ndzi tshamisa entshaveni ya nhlengeletano, emakun'wini ya n'walungu.

¹⁴ Ndzi ta tlhandluka ehenhla ka mapapa, ndzi ko ndzi fana ni muungameri la tlakukeke.’

¹⁵ Kasi u wisiwe le xivandleni xa vafi, ekheleni leri enteke ngopfu!

¹⁶ “Lava ku vonaka va ku hlometela, va ku langutisisa ekusuhi, va ku: ‘Xana hi yena wanuna loyi a karhateke misava, a tsekatsekisa matiko,

¹⁷ la nga endla matiko emananga, la mbundzuxeke miti ya wona, la nga ka a nga tshunxanga lava bohiweke ekhotsweni ra yena xana?’

¹⁸ “Loko ti ri tihosi hinkwato ta matiko, hinkwato kunene ti lahliwile hi ku twala, un'wana ni un'wana esirheni ra yena;

¹⁹ kambe wena u cukumetiwile ekule ni sirha ra wena, tanihi hluke lero biha leri sandziwaka, tanihi nguvu ya vanhu lava dlayiweke hi fumu, lava cukumetiweke exikarhi ka maribye ya sirha, tanihi ntsumbu lowu kandziyeriwaka hi mikondzo.

²⁰ A ku averiwanga sirha na tona, hikuva u onhile misava ya wena, u dlele tiko ra wena! Rixaka ra lavo biha ri nga ka ri nga ha tshami ri vuriwa ni siku ni rin'we!

²¹ Lunghiselani vana va yena ku dlawa hikwalaho ka ku dyoha ka vatata wa vona! Va nga ti tshuka va pfuka ku fuma misava, ni ku tata misava hi miti ya vona!”

²² “Ndzi ta yima ndzi lwa na vona,” ku vula Yehovha wa tinyimpi, “ndzi ta herisa vito ra Babilona ni lava saleke va yena, rhavi ni hluke,” ku vula Yehovha!

²³ “Ndzi ta n'wi endla ndhawu ya tinhloni, ni mativa ya matsovo, ndzi n'wi kukula hi nkukulu wa ku onha, ku vula Yehovha wa tinyimpi!”

Ta Vaaxuru.

²⁴ Yehovha wa tinyimpi u hlambanyile, a ku: “Kunene lexi ndzi xi ehleketeke xi ta endlakala, ni lexi ndzi xi kaneleke xi ta humelela.

²⁵ Ndzi ta tshova Vaaxuru etikweni ra mina, ndzi va kandziyela hi mikondzo etintshaveni ta mina! Va ta tshunxiwa ejokweni ra yena; ndzhwalo wa vona wu ta susiwa ekhatleni ra vona.”

²⁶ Hi wona makungu lawa ndzi ma kaneleke ehenhla ka misava hinkwayo; hi rona voko leri tshambulutiweke ehenhla ka matiko hinkwawo!

²⁷ Hikuva Yehovha wa tinyimpi u kanerile, kutani i mani la nga alaka xana? Voko ra yena ri tshambulukile, kutani la nga ri khondlisaka i mani xana?

Ta Vafilista.

²⁸ Hi lembe ra ku fa ka Akazi, ku vuriwile rito rero:

²⁹ “Wena tiko ra Vafilista, u nga tshuki u tsaka ku tlurisisa hi leswi nhonga leyi ngi yi ku ba yi tshovekeke; hikuva erimitswini ra nyoka ku ta huma mhiri, kutani mbhandzu wa yona yi ta va dragona leyi hahaka.

³⁰ Vapfumari lava pfumalaka ngopfu va ta xurha, ni swisiwana swi ta wisa swi rhula; kambe ndzi ta lovisa rixaka ra wena hi ndlala, kutani masalela ya wena ma ta herisiwa.

³¹ “Wena nyangwa, kolola! Bana huwa, wena muti! Wena tiko hinkwaro ra Vafilista, hela mbilu! Hikuva ku ta huma musi lowu humaka en'walungwini. A ku na la nyengaka emavandleni ya valala!”

³² Va ta ku yini ka lava rhumiweke hi tiko? Va ta ku: “Yehovha u akile masungulo ya Siyoni, kutani lava khombo va tiko ra yena va chavela kona.”