Esaya 12 - Xitsonga (Bibele)

¹ Hi siku rero u ta ku: “Oho Yehovha! Ndza ku tlangela hikuva u ndzi karihele kambe vukari bya wena byi tlherile, kutani u ndzi chavelele.

² Vonani, Xikwembu i ku kutsula ka mina; ndzi ta va ni ku tshemba, a ndza ha chavi nchumu, hikuva Yehovha, Yehovha i matimba ya mina ni risimu ranga; hi yena la ndzi poniseke!

³ “Mi ta tikela mati hi ku tsaka eswihlobyeni swa ku hlayiseka,” kutani hi siku rero mi ta ku:

⁴ “Tlangelani Yehovha, khongelani vito ra yena mi tivisa matiko mahlori ya yena twarisani, mi ku: ‘Vito ra yena hi leri tlakukeke.’

⁵ Yimbelelani Yehovha, hikuva u endlile timhaka leti hlamarisaka; a ti tiviwe ematikweni hinkwawo!

⁶ N'wina la mi akeke eSiyoni mi huwelela mi tsakisisa hi tinsimu, hikuva Mukwetsimi wa Israele u nkulukumba exikarhi ka wena.”