Eksoda 37 - Xitsonga (Bibele)

Ta ku endliwa ka areka, ni tafula, ni kandelari; ni alitari ya mirhi ya risuna.

¹ Besalele a endla areka hi murhi wa munga; ku leha ka yona a swi ri swisungunhu swimbirhi ni hafu; ku anama ka yona, xisungunhu xin'we ni hafu, ni ku yima ka yona, xisungunhu xin'we ni hafu,

² a yi nameke ehandle ni le ndzeni hi nsuku lowunene, a yi endlela ni xirhendzevutana xa nsuku lexi yi rhendzelekelaka.

³ Kutani a yi chululela mune wa swingwavila swa nsuku swa milenge ya yona ya mune; swingwavila swimbirhi tlhelo rin'wana, ni swingwavila swimbirhi tlhelo rin'wana.

⁴ A yi vatlela mimpingu hi murhi wa munga, a yi nameka hi nsuku.

⁵ Kutani a nghenisa mimpingu eswingwavileni, ematlhelweni ya areka ku yi pinga ha yona.

⁶ A endla ni vukhongelelo hi nsuku lowunene; ku leha ka byona a swi ri swisungunhu swimbirhi ni hafu, ni ku anama ka byona, xisungunhu xin'we ni hafu.

⁷ Kutani a endla tikerubu timbirhi, a ti fula hi nsuku, a ti yimisa emakun'wini mambirhi ya vukhongelelo;

⁸ kerubu yin'wana yi ve makumu ya haleno, ni kerubu yin'wana emakun'wini ya hala. A endla tikerubu ti huma emakun'wini mambirhi ya vukhongelelo.

⁹ Tikerubu a ti tshambuluta timpapa ta tona ehenhla, ti funengeta vukhongelelo hi timpapa ta tona, ti ri karhi ti langutene; mimombo ya tikerubu a yi languta vukhongelelo.

¹⁰ A endla na rona tafula hi murhi wa munga; ku leha ka rona ku va swisungunhu swimbirhi, ku anama ka yona xisungunhu xin'we, ni ku yima ka yona xisungunhu xin'we ni hafu.

¹¹ A yi nameka hi nsuku lowunene, kutani a yi endlela xirhendzevutana xa nsuku lexi yi rhendzelekelaka.

¹² A yi endlela ni mbanga wa mune wa tintiho hi ku anama, ni xirhendzevutana xa nsuku hi matlhelo hinkwawo.

¹³ Kutani a yi chululela swingwavila swa mune swa nsuku, a swi veka ematlhelweni ya mune emilengeni ya mune ya yona;

¹⁴ swingwavila a swi ri kusuhi ni mbanga, leswaku va nghenisa kona mimpingu ya ku rhwala tafula.

¹⁵ A endla mimpingu hi murhi wa munga, a yi nameka hi nsuku, leswaku tafula ri rhwariwa ha yona.

¹⁶ Kutani a endla swibya swa tafula hi nsuku lowunene, a yi ri mikambana ya rona, ni mindzheko ya rona, ni magombe lawa va fanelaka ku hlamba ha wona.

¹⁷ A endla kandelari hi nsuku lowunene, yona kandelari yi endliwa hi nsuku lowu furiweke, nenge wa yona, ni nsinya wa yona; mikhava, ni mavundzu ni swiluva swi kokiwe ka yona hi vumba byin'we;

¹⁸ ku hume marhavi ya ntlhanu na rin'we ematlhelweni ya yona, marhavi manharhu ma hume tlhelo rin'wana ra kandelari; ni marhavi man'wana manharhu ma hume tlhelo rin'wana ra kandelari.

¹⁹ Mikambana minharhu leyi fanaka ni alimondi, ni nungu, ni xiluva, a swi ri kona erhavini rin'wana, ni mikambana minharhu leyi fanaka ni alimondi, ni nungu, ni xiluva, erhavini rin'wana. A swi ri sweswo emarhavini ya ntlhanu na rin'we lama humaka ekandelarini.

²⁰ Yona kandelari a yi ri na mune wa mikambana leyi fanaka ni alimondi swin'we ni tinungu ni swiluva swa yona;

²¹ nungu yin'we a yi ri hansi ka marhavi mambirhi lama humaka eka yona, nungu yin'wana a yi ri hansi ka marhavi mambirhi man'wana, ni nungu yin'wana ehansi ka marhavi mambirhi lama seleke ya marhavi ya ntlhanu na yin'we, lama humaka ekandelarini.

²² Tinungu ni marhavi a swi huma eka yona; byi ri vumba byin'we bya nsuku lowu kwetsimaka, lowu furiweke.

²³ Kutani a yi endlela mavoningo ya ntlhanu na mambirhi, ni tintlawa ta yona, ni swimbitana swa nkuma swa yona; a swi endla hi nsuku lowunene.

²⁴ A endla kandelari ni swibya hinkwaswo swa yona hi talenta ya nsuku lowo kwetsima.

²⁵ Kutani a endla alitari ya mirhi ya risuna hi murhi wa munga; ku leha ka yona a xi ri xisungunhu xin'we, ni ku anama ka yona xisungunhu xin'we; matlhelo ya yona ya mune a ma ringana, xiyimo xa yona a swi ri swisungunhu swimbirhi; timhondzo ta yona ti endle xilo xin'we na yona.

²⁶ Kutani a yi nameka hi nsuku lowo saseka ehenhla, ni matlhelo hinkwawo, ni timhondzo; a yi endlela ni xirhendzevutana xa nsuku lexi yi rhendzelekelaka.

²⁷ A yi endlela ni swingwavila swimbirhi swa nsuku ehansi ka xirhendzevutana, ematlhelweni mambirhi, emagombyeni mambirhi, ku nghenisa kona timhandze leti va nga yi rhwalaka ha tona.

²⁸ A endla tona timhandze hi murhi wa munga, a ti nameka hi nsuku.

²⁹ A endla na wona mafurha yo hlawuleka ya ku tola, ni murhi wa risuna lowu tengeke a swi endla hi mukhuva wa lava tlhariheke ha swona.