Eksoda 2 - Xitsonga (Bibele)

Ta ku velekiwa ka Muxe.

¹ Kavaloko wanuna wa yindlu ya Levhi a ya teka wanhwana wa rixaka ra Levhi.

² Nsati loyi loko a tikile, a veleka n'wana wa wanuna; kuteloko a vona leswaku i xihlangi xo saseka, a xi fihla hi tin'hweti tinharhu.

³ Kambe leswi a tsandzekaka ku engeta a xi fihla, a ya teka xirhundzu xa tinhlanga, a xi tota hi ntita ni nhlaka, kutani a nghenisa xihlangi eka xona, a xi veka exikarhi ka tinhlanga eribuwini ra nambu.

⁴ Kambe makwavo wa xihlangi, wa wanhwana, a yima ekulenyana ku languta lexi nga ta n'wi humelela.

⁵ Kutani n'wana Faro, wa wanhwana, a ngirimela enambyeni ku ya hlamba; vanhwanyana va yena a va fambafamba eribuwini ra nambu, kuteloko a vonile ngula exikarhi ka nhlanga, a rhuma nandza wa yena ku ya yi teka.

⁶ Kuteloko a yi funungurile, a vona n'wana wa wanuna a ri karhi a rila. A n'wi twela vusiwana, a ku: “I n'wana wa Vaheveru.”

⁷ Kambe makwavo wa xihlangi a ku eka n'wana wa Faro: “Xana ndzi nga ya ndzi ku vitanela muan'wisi exikarhi ka vavasati va Vaheveru, a ta ku an'wisela xihlangi-ke?”

⁸ N'wana Faro a ku eka yena: “Yana.” Kutani wanhwana a suka, a ya vitana mana wa n'wana.

⁹ N'wana Faro a ku eka yena: “Teka xihlangi lexi, u ndzi an'wisela xona; ndzi ta ku hakela.” Kutani wansati a teka xihlangi, a ya xi an'wisa.

¹⁰ Kuteloko n'wana a kurile, a n'wi yisa eka n'wana Faro, yena a n'wi endla n'wana wa yena, a n'wi thya vito ra Muxe (hileswaku la humesiweke ematini), a ku: “Hikuva ndzi n'wi humesile ematini.”

Ta Muxe loko a dlaya Muegipta, a balekela etikweni ra Midiyani.

¹¹ Emikarhini yoleyo, kuteloko Muxe a kurile, a endza eka varikwavo, a ta vona ntirho wo tika wa vona; kutani a vona wanuna wa Muegipta a ba wanuna wa rikwavo, wa Muheveru.

¹² A languta hala ni hala, kutani leswi ku nga vonakiki munhu, a dlaya Muegipta, a n'wi lahla esaveni.

¹³ Siku leri tlhandlamaka a huma kambe, a vona vavanuna vambirhi va Vaheveru va karhi va lwa; a ku eka loyi a nga ni nandzu: “U n'wi bela yini warikwenu xana?”

¹⁴ Yena a ku: “I mani la ku vekeke hosi ni muavanyisi wa hina xana? Xana u rhandza ku ndzi dlaya tani hi leswi u nga dlaya Muegipta?” Muxe a tshuka, a ku: “Kunene mhaka leyi yi twakarile.”

¹⁵ Kambe Faro loko a twa mhaka leyi, a lava Muxe ku n'wi dlaya. Kambe Muxe a balekela Faro, a ya fika etikweni ra Midiyani, a tshamisa exihlobyeni.

¹⁶ Muprista wa Midiyani a a ri ni vana va vanhwanyana va ntlhanu na vambirhi, kutani va ta eku keni ka mati, va tata switsengele ku nwisa mitlhambi ya tata wa vona.

¹⁷ Kambe varisi va fika va va hlongola; kambe Muxe a suka a yima, a va lamulela, a nwisa mitlhambi ya vona.

¹⁸ Kuteloko va tlhelele ekaya, eka Rhuwele, tata wa vona, a ku: “Mi hatlisile ha yini ku vuya namuntlha xana?”

¹⁹ Va ku: “Muegipta u hi lamulele eka varisi, a hi kelelela mati layo tala; a nwisa mitlhambi ya hina.”

²⁰ A ku eka vana va yena: “Wanuna loyi u kwihi, mi n'wi siyele yini? N'wi viteni, a ta dya swakudya.”

²¹ Kutani Muxe a pfumela ku aka ni munhu loyi, kutani a teka Sipora, n'wana wa yena.

²² Kutani Sipora a veleka n'wana wa wanuna; Muxe a n'wi thya vito ra Gerixomu (muluveri), hikuva a ku: “Ndzi muluveri etikweni ra van'wana.”

²³ Kuteloko malembe layo tala ma hundzile, hosi ya Egipta yi fa. Loko va ri vana va Israele, a va ri karhi va rila hikwalaho ka vukhumbi bya vona; va huwelela, kutani ku huwelela ka vona hikwalaho ka vukhumbi bya vona ku fika eka Xikwembu.

²⁴ Xikwembu xi yingisa ku rila ka vona, xi tsundzuka ntwanano wa xona na Abrahama, na Isaka, na Yakobo;

²⁵ kutani Xikwembu xi languta vana va Israele, xi va tiva.