Eksoda 17 - Xitsonga (Bibele)

Ta Vaisraele loko va dzumadzuma eRefidimi. Muxe a ba ribye ra Horebe.

¹ Nhlengeletano hinkwayo ya vana va Israele yi suka emananga ya Sina va ri karhi va pima mimpfhuka ya vona hi ku lerisa ka Yehovha. Va ya dzima mitsonga eRefidimi; kambe a ku nga ri na mati lawa tiko ri nga nwaka wona.

² Kavaloko tiko ri tengisa Muxe, ri ku: “Hi nyike mati hi nwa.” Kutani Muxe a ku eka vona: “Mi ndzi karihela yini? Mi ringela yini Yehovha?”

³ Tiko a ri ri ni torha hi ku pfumala mati, kutani ri holovela Muxe, ri ku: “U hi humesele yini Egipta ku ta hi dlaya hi torha, hina ni vana va hina ni tihomu ta hina?”

⁴ Kutani Muxe a huwelele eka Yehovha, a ku: “Ndzi ta endla yini hi tiko leri? Va ta lava ku ndzi khandla hi maribye.”

⁵ Yehovha a ku eka Muxe: “Rhanga emahlweni ka vanhu, u teka vakulukumba va Israele ni nhonga ya wena leyi u nga ba nambu ha yona.

⁶ Waswivo, ndzi ta yima emahlweni ka wena lahaya eribyeni ra Horebe; u ta ba ribye, kutani ri ta humesa mati; vanhu va ta nwa.” Muxe a endlisa sweswo emahlweni ka vakulukumba va Israele.

⁷ A thya xivandla lexi vito ra Masa na Meriba (Miringo ni ku tenga), hikwalaho ka ku tengisa ka vana va Israele; ni ku ringa Yehovha, va ku: “Xana Yehovha u le xikarhi ka hina, kumbe a nga kona xana?”

Ta Amaleke loko a hluriwa.

⁸ Kutani ku fika Amaleke, a ta ta lwa na Israele eRefidimi.

⁹ Muxe a ku eka Yoxuwa: “Hlawula vavanuna ku ya lwa na Amaleke; mundzuku ndzi ta yima enhlohlorhini ya ntshava, ndzi tamele nhonga ya Xikwembu.”

¹⁰ Yoxuwa a endla hilaha Muxe a n'wi byeleke hakona ku ya lwa na Amaleke. Kutani Muxe na Aroni na Huru va khandziya enhlohlorhini ya ntshava.

¹¹ Kutani kakuloko Muxe a yimisa voko, Israele a va a hlula; kambe loko voko ra yena ri karhala Amaleke a hlula Vaisraele.

¹² Kambe loko mavoko ya Muxe ma karhele va n'wi tshamisisa eribyeni; Aroni na Huru va seketela mavoko ya yena, un'wana hitlhelo rin'wana, un'wana hitlhelo rin'wana; kutani mavoko ya yena ma seketeriwa ma rhula dyambu ri ko ri pela.

¹³ Kavaloko Yoxuwa a hlula Amaleke ni tiko ra yena hi matlhari.

¹⁴ Kutani Yehovha a ku eka Muxe: “Tsala mhaka leyi ebukwini, xi va xitsundzuxo lexi hlayisiwaka, u tivisa Yoxuwa leswaku ndzi ta lovisa ku tsundzukiwa ka Amaleke ehansi ka tilo.”

¹⁵ Kutani Muxe a aka alitari, a yi thya vito ra Yehova-nisi (Yehovha i mfungho wa mina),

¹⁶ a ku: “Leswi voko ra Amaleke ri pfukeke xiluvelo xa Yehovha, Yehovha u ta lwa na Amaleke etinxakeni ta tinxaka.”