Eklesiasta 10 - Xitsonga (Bibele)

Vuhunguki byi yisa emakhombyeni.

¹ Tinhongana leti feke ti nun'hwisa ni ku borisa mafurha ya mutoti; swi tano ni vuphukuphuku lebyitsongo byi tlula vutlhari ni xidzumo.

² Mbilu ya lowo tlhariha yi le vokweni ra yena ra xinene, kambe mbilu ya xihunguki yi le ka lera ximatsi.

³ Swi tsandza ni loko xiphukuphuku xi famba hi ndlela, xi pfumala vutlhari, kutani xi vula munhu un'wana ni un'wana leswaku i xiphukuphuku.

⁴ Loko mbilu ya mufumi vi ku karihela, u nga tshuki u fularhela vutshamo bya wena, hikuva ku rhula ku sivela swidyoho leswikulu.

⁵ Ndzi vonile mhaka leyo biha ehansi ka dyambu, i xihoxo xa mufumi.

⁶ Hikuva vuphukuphuku byi vekiwa evutshan'weni lebyi tlakukeke, kutani vafuwi va tshamisa ehansi.

⁷ Ndzi vonile malandza lama khandziyaka tihanci, ni tihosana leti fambaka hi milenge kukotisa malandza.

⁸ La celaka khele u ta wela eka rona, kutani la wisaka rirhangu u ta lumiwa hi nyoka.

⁹ La tshinetaka maribye u ta khandliwa hi wona; ni la pandzaka tihunyi u ta kuma khombo.

¹⁰ Loko nsimbhi yi bvinyekile, kutani yi nga lotiwi hi la tirhaka ha yona, u ta fanela ku endla hi matimba; loko byi ri vutlhari, byona byi nga pfuxela munhu ku ya emahlweni.

¹¹ Nyoka ya luma yi nga loyiwanga, muhlevi u fana na yona.

¹² Marito lama humaka enon'wini wa lowo tlhariha ma tsakisa, kambe milomu ya xihunguki yi ta xi lovisa.

¹³ Masungulo ya marito ya nomu wa yena i vuhunguki, ni makumu ya ku vulavula ka yena i vuhlanyi lebyi onhaka.

¹⁴ Kambe xiphukuphuku xi andzisa marito. Munhu a nga ka a nga vuli leswi nga ta tumbuluka endzhaku ka yena. I mani la nga ta va endzhaku ka yena ku n'wi byela?

¹⁵ Ntirho wa vahunguki wa va karhata, hikuva a va tivi ku hlawula ndlela leyi yisaka emutini.

¹⁶ U ni khombo wena tiko leri hosi ya wena xi nga xihlangi, leri tihosana ta rona ti dyaka wa ha ri mixo!

¹⁷ Ku katekile wena tiko leri hosi ya wena a nga n'wana wa vanhu lavakulu, leri tihosana ta rona ti dyaka hi nkarhi lowu fanelaka leswaku ti va ni matimba, ku nga ri ku pyopyiwa.

¹⁸ Yindlu yi wa hi ku akiwa hi mavoko lama lolohaka, kambe yindlu yi pfuta hi ku fuleriwa hi mavoko layo loloha.

¹⁹ Nkhuvo wu endleriwa ku hleka; vhinyo yi tsakisa lava hanyaka; kutani ku kumiwa hinkwaswo hi mali.

²⁰ U nga rhuketeli hosi emiehleketweni ya wena, u nga rhuketeli munhu endlwini ya wena ya ku etlela; hikuva tinyanyana ta le henhla ti nga tshuka ti rhwala leswi vuriweke, kutani ti haha ti ya vula marito ya wena.