Eklesiasta 1 - Xitsonga (Bibele)

Vuhava bya hinkwaswo.

¹ Hi wona marito ya mudyondzisi, n'wana Davhida, hosi ya Israele.

² Vuhava bya swahava, ku vula mudyondzisi, vuhava bya swahava, hinkwaswo i vuhava.

³ Vunene hi byihi lebyi munhu a nga na byona entirhweni hinkwawo wa yena lowu a tikarhataka ha wona ehansi ka dyambu xana?

⁴ Rixaka rin'wana ra hundza, kutani ku humelela rin'wana, kambe misava yi tshama hilaha ku nga heriki.

⁵ Dyambu ra tsuvuka, kutani ri ya eku peleni hi ku hatlisa, ri ya endhawini ya rona laha ri nga tsuvuka kona.

⁶ Moya wona, wu hungela edzongeni, kutani wu tlhela wu rhendzelekela tlhelo ra n'walungu, wu hungela hinkwako hi ku rhendzeleka, kutani wu tlhelela kambe eku rhendzelekeni ka wona.

⁷ Milambu hinkwayo yi khulukela elwandle, hambiswiritano lwandle a ri tali; laha milambu yi humaka kona, hilaha yi tlhelelaka kona eku khulukeni ka yona.

⁸ Swilo hinkwaswo swa karhateka ku tlula hilaha munhu a nga vulaka hakona: tihlo a ri kolwi hi ku vona, kumbe ndleve a yi tali hi ku yingisa.

⁹ Lexi ngi xi ri kona, hi lexi nga ta va kona; lexi nga endliwa, hi lexi nga ta endliwa; a ku na lexintshwa ehansi ka dyambu.

¹⁰ Xana xilo xi kona lexi nga vuriwaka leswaku: “Languta lexi, i xintshwa”? A xi ri kona ni khale, emahlweni ka hina.

¹¹ Lexi ngi xi ri kona khale, a xi tsundzukiwi, hambi xi ri lexi nga ta ta endzhaku; lava nga ta ta endzhaku, va nga ka va nga xi tsundzuki.

¹² Mina, mudyondzisi, a ndzi ri hosi ya Israele eYerusalema.

¹³ Ndzi nyiketile mbilu ya mina ku lava ni ku lavisisa hi vutlhari swilo hinkwaswo leswi endliwaka ehansi ka tilo; i ntirho lowu vavisaka lowu Xikwembu xi wu nyikeke vana va vanhu leswaku va karhateka ha wona.

¹⁴ Ndzi vonile mitirho hinkwayo leyi endliwaka ehansi ka dyambu, kutani, vonani, hinkwaswo i vuhava, ni ku karhateka ka moya.

¹⁵ Lexi hombolokeke xi nga ka xi nga ololoki; ni lexi pfumalekaka xi nga ka xi nga hlayiwi.

¹⁶ Ndzi va ndzi ku embilwini ya mina: “Languta, ndzi kulele eku tlhariheni, ndzi yile emahlweni ku tlula munhu wihi na wihi loyi ngi a ri kona emahlweni ka mina eYerusalema, kutani mbilu yanga yi kumile vutlhari ni ku tiva lokukulu.”

¹⁷ Kambe, kuteloko ndzi nyiketile mbilu ya mina ku tiva vutlhari, ni ku tiva vuphukuphuku ni vuhunguki, ndzi vonile leswaku na swona i ku landza mheho.

¹⁸ Hikuva laha ku nga ni vutlhari lebyo tala, nhlomulo lowukulu wu kona, kutani la tiengetelaka ku tiva, u tiengetela, na kona, ku vaviseka.