Amosi 7 - Xitsonga (Bibele)

Swikombiso swa ku biwa ka Israele.

¹ Hi lexi xikombiso xa Hosi Yehovha, lexi a ndzi kombiseke xona: Vonani, u tshama a humesa tinjiya, loko byanyi byi tlhela byi hluka, endzhaku ka lebyi nga kutleriwa hosi.

² Kuteloko ti hetile ku dya byanyi hinkwabyo bya tiko, ndzi te: “Oho, Hosi, wanga rivalela! Xana Yakobo u ta yimisa ku yini, kasi u ntsongo?”

³ Yehovha a tshika mhaka yoleyo. “A yi nga endlakali,” ku vula Yehovha.

⁴ Hi lexi xikombiso, lexi Hosi Yehovha a ndzi kombiseke xona: Vonani, Hosi Yehovha a vitana ndzilo ku tshinya ha wona, wu va wu heta xidziva lexikulu, kutani wu sungula ku hisa masimu.

⁵ Kutani ndzi ku: “Hosi Yehovha, wanga tshika! Xana Yakobo u ta yimisa ku yini, kasi u ntsongo?”

⁶ Yehovha a tshika mhaka yoleyo. “Yi nga ka yi nga endlakali,” ku vula Yehovha.

⁷ Hi lexi xikombiso lexi a ndzi kombiseke xona. Ndzi vonile Yehovha Xikwembu a yimile ehenhla ka khumbi leri akiweke ri ku dzi, a a tamele ngoti ya ku ringanyeta evokweni ra yena.

⁸ Hosi yi ku eka mina: “U vona yini Amosi?” Ndzi ku: “Ndzi vona ngoti ya ku ringanyeta.” Kutani Hosi yi ku: “Vona, ndzi ta veka ngoti ya ku ringanyeta exikarhi ka tiko ra mina ra Israele; a ndzi nga ha tshami ndzi va rivalela.

⁹ Matlhelo lama tlakukeke ya Isaka ma ta onhiwa, ni swivandla leswi hlawuriweke swa Israele swi herisiwa, kutani ndzi ta pfukela yindlu ya Yerobuwamu hi tlhari.”

¹⁰ Kutani Amasiya, muprista wa Betele, a rhuma eka Yerobuwamu, hosi ya Israele, a ku: “Amosi u ku hundzukele exikarhi ka yindlu ya Israele; tiko ri nga ka ri nga koti ku yingisela marito ya yena hinkwawo.

¹¹ Hikuva Amosi u te: ‘Yerobuwamu u ta fa hi fumu, kutani Israele u ta humesiwa etikweni ra yena a yisiwa evukhumbini.’ ”

¹² Kutani Amasiya a ku eka Amosi: “Wena, n'waxikombiso, suka u tsutsumela etikweni ra Yuda; u dyela vuswa kona, u profeta kona;

¹³ kambe loko ku ri eBetele, u nga ha profeteli kona, hikuva i xivandla lexi hlawuriweke xa hosi, kambe hi yona yindlu ya vuhosi.”

¹⁴ Amosi a hlamula, a ku eka Amasiya: “Mina a ndzi muprofeta, ni loko ndzi ri n'wana wa muprofeta, ndzi murisi, ndzi hanya hi ku tikhela mihandzu ya mikuwa;

¹⁵ kambe Yehovha u ndzi khomile ndzi ri karhi ndzi risa ntlhambi, kutani Yehovha a ku eka mina: ‘Famba u ya profeta etikweni ra mina ra Israele.’

¹⁶ “Sweswi twana rito ra Yehovha, wena, u nge: ‘U nga tshuki u profetela Israele, u nga vulavuri endlwini ya Isaka!’

¹⁷ Hikwalaho Yehovha u ri: ‘Nsati wa wena u ta khomiwa exikarhi ka muti, vana va wena va xinuna ni va xisati va ta dlawa hi fumu, nsimu ya wena yi ta pandziwa mindzilekana, wena u ta fela etikweni leri nyameke, Israele, yena, u ta yisiwa evukhumbini, a susiwa etikweni ra yena.’ ”