2 Vakorinto 9 - Xitsonga (Bibele)

Ku khongotela kun'wana hikwalaho ka nhlengo.

¹ Loko wu ri nhlengo lowu humeseriwaka vakwetsimi, kumbe ndzi tlula mpimo, loko ndzi engeta ndzi mi tsalela ta wona.

² Hikuva ndzi tiva ku chivirika ka n'wina emhakeni yoleyo, ndzi ri karhi ndzi tidzunisa ha n'wina eka Vamakedoniya, hi ku va byela leswaku va Akaya va tilunghisile n'wexemu; kutani ku chivirika ka n'wina ku pfuxile lavo tala.

³ Kambe ndzi rhumile vamakwerhu leswaku ku tidzunisa ka mina ha n'wina ku nga tshuki ku hundzuka swahava; kambe mi va mi tilunghisile hilaha ndzi vuleke hakona;

⁴ swi nga ri leswaku loko Vamakedoniya van'wana va vuya, na mina, kutani va mikuma mi nga si tilunghisa, hi ta khomiwa hi tingana, kumbe ku nga va n'wina, emhakeni yoleyo hi tidzuniseke ha yona.

⁵ Hikwalaho ndzi anakanyile leswaku ndzi fanele ku khongotela vamakwerhu leswaku va rhanga va ta eka n'wina, kutani va heta ku lunghisa ku hanana ka n'wina loku mi ku vuleke, leswaku ku va ku lunghisiwile kukota ku nyika ka mbilu, wu nga ri ntirho lowu endliwaka hi rikaka.

⁶ Hikuva mhaka hi leyi: La byalaka kutsongo, u ta tshovela kutsongo; la byalaka ngopfu, u ta tshovela ngopfu, na yena.

⁷ Un'wana ni un'wana a a humese hilaha a ringaniseke hakona embilwini ya yena; ku nga ri hi ku vilela ni ku sindzisiwa, hikuva Xikwembu xi rhandza la humesaka a tsakile.

⁸ Kambe Xikwembu xi ni matimba ku mi engetelela ku nyika kun'wana ni kun'wana ka tintswalo mi ta kuma leswi mi ringanaka hi masiku ematlhelweni hinkwawo, mi va mi taleriwa hi leswi mi nga ta endla ntirho lowo saseka ha swona, hilaha ku nga tsariwa, va ku:

⁹ “U haxile, u nyike swisiwana; ku lulama ka yena ku tshama hilaha ku nga heriki.”

¹⁰ La tsetselelaka mubyari hi mbewu, ni vuswa bya ku dya, u ta mi tsetselela, u ta mi tatela hi leswi byariwaka, u ta mi engetelela mihandzu ya ku lulama ka n'wina;

¹¹ leswaku mi ta fuwa hinkwaswo, mi ta tiva ku nyika hi mukhuva lowunene, yi nga mhaka leyi nga ta yisa eku khenseni ka Xikwembu ha hina.

¹² Hikuva ku pfuna ka ntirho wolowo a ku khorwisi vapfumeri va vakwetsimi ntsena, kambe ku andzisa ngopfu ku khensa eka Xikwembu;

¹³ va ta dzunisa Xikwembu loko va vona nhlengo wolowo, hikuva, na n'wina, mi yingisa Evhangeli ya Kriste, yoleyo mi tivulaka ha yona leswaku mi va ni ku hanana ka xiviri eka vona ni ka hinkwavo,

¹⁴ na swona va mi khongelela hikuva va mi rhandza ngopfu hikwalaho ka tintswalo leto saseka ta Xikwembu leti mi taleleke.

¹⁵ A ku khensiwe Xikwembu hikwalaho ka ku nyika ka xona loku nga hlayiwiki!