2 TIKRONIKA 5 - Xitsonga (Bibele)

Ta ku khanguriwa ka tempele.

¹ Kuteloko ntirho hinkwawo lowu Solomoni a wu endleleke yindlu ya Yehovha wu herile, Solomoni a tisa leswi Davhida, tata wa yena, a swi hlawuleke: yi nga silivhere, ni nsuku ni swigotso hinkwaswo, kutani a swi veka exumeni xa yindlu ya Xikwembu.

² Kavaloko Solomoni a hlengeleta eYerusalema, vakulukumba va Israele, ni tihosana hinkwato ta tinyimba, ni tihosana ta tindlu ta vana va Israele, ku ya teka emutini wa Davhida lowu nga Siyoni, areka ya ntwanano wa Yehovha, ni ku yi tlhandlukisa.

³ Vanhu hinkwavo va Israele va hlengeletana ni hosi enkhubyeni, a yi ri n'hweti ya ntlhanu na timbirhi.

⁴ Vakulukumba va Israele, kuteloko va fikile, Valevhi va rhwala areka;

⁵ kutani va tlhandlukisa areka ni Tabernakela ya nhlengeletano, ni swigotso hinkwaswo leswi hlawuriweke leswi ngi swi ri eTabernakeleni, swi rhwariwa hi vaprista ni Valevhi.

⁶ Kutani hosi Solomoni, ni nhlengeletano hinkwayo ya Israele leyi hlengeletaneke na yona, va yima emahlweni ka areka, va endla switlhavelo swa tinyimpfu ni swa tihomu leti nga hlayiwangiki hikwalaho ka vunyingi bya tona.

⁷ Kutani vaprista va nghenisa areka ya ntwanano wa Yehovha endhawini ya yona, evukwetsimelweni bya yindlu exikwetsimisisweni, ehansi ka timpapa ta tikerubu.

⁸ Timpapa ta tikerubu ti tshambulutiwile endhawini ya areka, tikerubu ti ungamela areka ni mimpingu ya yona ehenhla.

⁹ Mimpingu a yi lehile swonghasi leswaku tinhla ta yona ti voniwa emahlweni ka areka, emahlweni ka xikwetsimisiso; kambe a ti voniwanga hi le handle; areka yi va kona ku fika ni namuntlha.

¹⁰ A ku nga ri na nchumu earekeni, loko swi nga ri swimphampha swimbirhi leswi Muxe a swi vekeke kona eHorebe, loko Yehovha a endla ntwanano ni vana va Israele, eku humeni ka vona Egipta.

¹¹ Vaprista, kakuloko va huma exikwetsimisisweni (hikuva vaprista hinkwavo lava ngi va ri kona va tibasisile va nga landzanga nawu wa mitlawa);

¹² ni vayimbeleri hinkwavo va Valevhi, Asafa, Hemani, Yedutuni, ni vana va vona ni vamakwavo, va yimile evuxeni bya alitari, va ambele tinguvu ta ntsembyana va ri ni swiphambati ni magubu ni tiharipa; ekusuhi na vona, vaprista va 120 a va yimba tinanga;

¹³ kutani lava yimbaka tinanga ni lava yimbelelaka a va fanela ku yimbelela swin'we, hi rito rin'we ku dzunisa ni ku vonga Yehovha; kutani, kakuloko va yimba tinanga ni swiphambati, ni timbila tin'wana ni loko va yimbelela, va ku: “Dzunisani Yehovha, hikuva i wa vunene, hikuva tintswalo ta yena ti kona hi masiku!” Kavaloko yindlu, yindlu ya Yehovha yi tatiwa hi papa;

¹⁴ kutani vaprista va tsandzeka ku yima kona ku tirha ntirho hikwalaho ka papa; hikuva ku twala ka Yehovha a ku tatile yindlu ya Xikwembu.