2 TIKRONIKA 28 - Xitsonga (Bibele)

Ta Akazi, hosi ya Yuda.

¹ Akazi a a ri wa malembe ya 20 loko a sungula ku fuma, kutani a fuma malembe ya 16 eYerusalema. A nga endlanga leswi lulameke emahlweni ka Yehovha, kukotisa Davhida, tata wa yena,

² kambe a famba etindleleni ta tihosi ta Israele, a endlela va Baali swifaniso leswi chuluriweke.

³ A hisa mirhi ya risuna enkoveni, wa vana va Hinomu, kutani a hisa vana va yena endzilweni, a landza manyala ya matiko lawa Yehovha a ma hlongoleke emahlweni ka vana va Israele.

⁴ A tshama a humesa magandzelo ni ku hisa mirhi ya risuna etindhawini leti tlakukeke, ni le switsungeni, ni le hansi ka mirhi hinkwayo leyi hlukeke.

⁵ Kutani Yehovha, Xikwembu xa yena, a n'wi nyiketa emavokweni ya hosi ya Siriya; Vasiriya va n'wi hlula, va khoma vanhu va yena lavo tala va va yisa eDamaska. A nyiketiwa ni le mavokweni ya hosi ya Israele, a hluriwa ngopfu hi yena.

⁶ Hikuva Peka, n'wana Remaliya, a dlaya hi siku rin'we, etikweni ra Yuda, vavanuna va 120 000, hinkwavo ti ri tinhenha, hikuva a va tshikile Yehovha, Xikwembu xa vatata wa vona.

⁷ Kavaloko Zikri, wanuna wa matimba wa Efrayimi, a dlaya Maaseya, n'wana hosi, na Azirikama, ndhuna ya yindlu ya hosi, na Elikana, la landzeke hosi hi vukulukumba.

⁸ Vana va Israele va khoma exikarhi ka vamakwavo vanhu va 200 000, va ri vavasati, ni varisanyana, ni vanhwanyana ku va endla makhumbi; va va tekela ni xuma lexikulu, kutani va yisa xuma eSamariya.

⁹ Muprofeta wa Yehovha a a ri kona, vito ra yena a a ri Odede, a huma ku ya hlangana ni nyimpi leyi tlhelaka eSamariya, a ku eka vona: “Maswivo, Yehovha, Xikwembu xa va tata wa n'wina, u karihele va Yuda, u va nyiketile emavokweni ya n'wina, mi va dlayile hi vukari, kutani mhaka leyi, yi fikile etilweni.

¹⁰ Kutani sweswi, vana va Yuda lava ni va Yerusalema, mi rhandza ku va endla makhumbi ya n'wina ya xinuna ni ya xisati! Xana na n'wina a mi na nandzu emahlweni ka Yehovha, Xikwembu xa n'wina-ke?

¹¹ Sweswi, ndzi yingiseni, mi tlherisa vakhomiwa lava mi va khomeke exikarhi ka vamakwenu, hikuva vukari bya Yehovha byi le henhla ka n'wina.”

¹² Kavaloko van'wana exikarhi ka tihosana ta vana va Efrayimi, a ri Azariya, n'wana Yohanani, na Berekiya n'wana Mexilemoto, na Yehizikiya, n'wana Xalumi, na Amasa n'wana Hadilayi, va pfukela lava tlheleke enyimpini,

¹³ va ku eka vona: “Mi nga ka mi nga nghenisi vakhomiwa lava halenu, hikuva mi rhandza ku engetela xidyoho xa hina ni milandzu ya hina, mi hi lavela nandzu emahlweni ka Yehovha hikuva nandzu wa hina wukulu, kutani vukari lebyikulu byi le henhla ka Israele.”

¹⁴ Kutani lava hlomeke va tshika vakhomiwa ni xuma emahlweni ka tihosana, ni le mahlweni ka nhlengeletano hinkwayo.

¹⁵ Kutani vavanuna lava vitaniweke hi mavito ya vona, va pfuka va teka vakhomiwa, va ambexa hinkwavo lava seleke, hi tinguvu ta le xumeni; va va ambexa, va va nyika tintanghu, va va nyika swakudya ni swakunwa, va va chela mafurha, va khandziyisa etimbhongolweni hinkwavo lava karheleke va va heleketa eYeriko, emutini wa micindzu, eka varikwavo; kutani va tlhela va muka eSamariya.

¹⁶ Enkarhini wolowo, hosi Akazi a rhumela eka tihosi ta Asiriya, a kombela ku pfuniwa hi vona.

¹⁷ Na vona Vaedomu va ta, va lwa ni va Yuda, va khoma van'wana va vona.

¹⁸ Kambe Vafilista va nghena emitini ya le nkoveni ni le dzongeni ra tiko ra Yuda, va teka Beta-Xemexe na Ayaloni, na Gederoti, na Soko, ni miti ya kona, na Timina, ni miti ya kona, na Gimizo, ni miti ya kona, va aka kona.

¹⁹ Hikuva Yehovha a a tsongahatile Yuda hikwalaho ka Akazi, hosi ya Israele, hikuva a a tshunxile milawu hinkwayo etikweni ra Yuda, a a dyohele Yehovha hi swidyoho leswo tala.

²⁰ Kutani Tiglata-Pilezere, hosi ya Asiriya, a ta n'wi pfuka, a n'wi endla nala wa yena, a nga n'wi tiyisanga.

²¹ Hikuva Akazi a phangile yindlu ya Yehovha ni tindlu ta vuhosi ni ta tihosana, kutani a nyika hosi ya Asiriya mihlengo; kambe a swi n'wi pfunanga nchumu.

²² Hambiloko a ri ekhombyeni, a engeta a dyohela Yehovha.

²³ Yena hosi Akazi a humesela swikwembu swa Damaska leswi n'wi hluleke, magandzelo, a ku: “Leswi swikwembu swa tihosi ta Siriya swi ti pfunaka, ndzi ta swi tlhavela magandzelo, swi ta ndzi pfuna.” Kambe swi pfuna ku n'wi lovisa swin'we ni Vaisraele hinkwavo.

²⁴ Akazi a hlengeleta swigotso swa yindlu ya Xikwembu kutani a fayetela swigotso swa yindlu ya Xikwembu, a pfala tinyangwa ta yindlu ya Yehovha, kutani a tiakela tialitari ematlhelweni hinkwawo ya Yerusalema.

²⁵ Hambi ku ri emitini hinkwayo ya tiko ra Yuda, a endla tindhawu leti tlakukeke ku hisela swikwembu swimbe mirhi ya risuna; sweswo a karihisa Yehovha, Xikwembu xa vatata wa yena.

²⁶ Leswi seleke swa timhaka ta yena, ni mitirho hinkwayo ya yena, leyo sungula ni leya ku hetelela, maswivo, swi tsariwile ebukwini ya tihosi ta Yuda ni ta Israele.

²⁷ Akazi a etlela ni vatata wa yena, kutani va n'wi lahla emutini, eYerusalema, hikuva a va n'wi nghenisanga emasirheni ya tihosi ta Israele. Kutani Hezekiya, n'wana wa yena, a fuma ematshan'weni ya yena.