2 TIKRONIKA 24 - Xitsonga (Bibele)

Ta Yowasi, hosi ya Yuda.

¹ Yowasi a a ri wa malembe ya ntlhanu na mambirhi, loko a sungula ku fuma; a fuma malembe ya mune wa makume eYerusalema, Vito ra mana wa yena a a ri Sibiya, wa Berexeba.

² Yowasi a endla leswi lulameke emahlweni ka Yehovha eku hanyeni hinkwako ka Yehoyada, muprista.

³ Yehoyada a n'wi tekisa vasati vambirhi, kutani a veleka vana va xinuna ni vana va xisati.

⁴ Endzhaku la sweswo Yowasi a anakanya ku tiyisa yindlu ya Yehovha.

⁵ A hlengeleta vaprista ni Valevhi, kutani a ku eka vona: “Fambani emitini ya Yuda, mi hlengeleta mali etikweni hinkwaro ra Israele ku lunghisa yindlu ya Xikwembu xa n'wina, hi lembe rin'wana ni rin'wana; mi hatlisa emhakeni leyi.” Kambe Valevhi a va hatlisanga.

⁶ Kavaloko hosi yi vitana Yehoyada, muprista lonkulu, yi ku eka yena: “A ku lerisanga ha yini Valevhi leswaku va tisa ndzuvo lowu lerisiweke ehenhla ka nhlengeletano ya Israele hi Muxe, nandza wa Yehovha, wu huma etikweni ra Yuda ni le Yerusalema, wu va wa Tabernakela ya vumbhoni?”

⁷ Hikuva Ataliya, munhu lowo biha, ni vana va yena, va phangile yindlu ya Xikwembu, swi tsandza ni mitirho hinkwayo leyi hlawuriweke ya yindlu ya Yehovha, va tirhele ha yona va Baali.

⁸ Kavaloko hosi yi lerisa leswaku va endla bokisi ku ri veka enyangweni ya yindlu ya Yehovha, ehandle.

⁹ Kutani va tivisa etikweni ra Yuda ni le Yerusalema, leswaku va tisela Yehovha ndzuvo lowu lerisiweke ehenhla ka Israele emananga, hi Muxe, nandza wa Xikwembu.

¹⁰ Tindhuna hinkwato ni tiko hinkwaro va tsakela mhaka leyi, kutani va tisa mali ya ndzuvo, va yi hoxa ebokisini va ko va heta.

¹¹ Kakuloko nkarhi wu fikile ku tisa bokisi leswaku ri kambiwa hi hosi, Valevhi va ri tisa, ni loko va vona leswaku mali yi tele, mutsari wa hosi, ni murhumiwa wa muprista lonkulu va chulula bokisi, kutani va ri tlherisa evutshan'weni bya rona; va tshama va endla sweswo hi siku rin'wana ni rin'wana, va hlengeleta mali leyo tala.

¹² Kutani hosi na Yehoyada va yi nyika mulanguteri wa mitirho ya yindlu ya Yehovha, kutani va rhamba vavatli va maribye, ni vaaki ku lunghisa yindlu ya Yehovha; va rhamba ni lava tirhaka hi tinhumbu ni koporo ku lunghisa yindlu ya Yehovha.

¹³ Valanguteri va mitirho va tirha swinene, kutani mitirho yi ya emahlweni emavokweni ya vona; va pfuxa yindlu ya Xikwembu hi ku yima ka yona, va yi tiyisa.

¹⁴ Kuteloko va hetile va tisa mali leyi seleke emahlweni ka hosi na Yehoyada; kutani va endla ha yona swigotso swa yindlu ya Yehovha, swi ri swibya swa ntirho ni swa magandzelo, ni mindzheko, ni swibya swin'wana swa nsuku ni swa silivhere. Va humesa tiholokosta hi masiku hinkwawo endlwini ya Yehovha, eku hanyeni hinkwako ka Yehoyada.

¹⁵ Yehoyada a dyuhala, a taleriwa hi masiku, kutani a fa; a a ri wa malembe ya 130 loko a fa.

¹⁶ Va n'wi lahla emutini wa Davhida swin'we ni tihosi, hikuva a a endlile le swinene etikweni ra Israele, a tirhele Xikwembu ni yindlu ya xona.

¹⁷ Endzhaku ka rifu ra Yehoyada, tihosana ta Yuda ti ta, ti khinsama emahlweni ka hosi, kutani hosi yi va yingisa.

¹⁸ Va tshika yindlu ya Yehovha, Xikwembu xa vatata wa vona, va tirhela swifaniso swa Axera ni swifaniso swin'wana; kavaloko Yehovha a karihela va Yuda ni va Yerusalema, hikuva a va dyohile emhakeni leyi.

¹⁹ Yehovha a rhuma exikarhi ka vona vaprofeta lava va layaka ku va tlherisela eka yena; kambe a va va yingisanga.

²⁰ Kutani moya wa Xikwembu wu ta eka Zakariya, n'wana Yehoyada, muprista, a yima emahlweni ka tiko, a ku eka vona: “Xikwembu xi vurisa sweswo: ‘Xana mi tlulela yini milawu ya Yehovha? Mi nga ka mi nga kateki. Leswi mi tshikeke Yehovha, u mi tshikile na yena?’ ”

²¹ Kavaloko va endla rhengu ku n'wi lovisa, kutani va n'wi khandla hi maribye exivaveni xa yindlu ya Yehovha, hi ku lerisa ka hosi.

²² Hosi Yowasi a nga anakanyanga vunene lebyi Yehoyada, tata wa Zakariya, a n'wi endleleke byona; kambe a dlaya n'wana wa yena, Zakariya; loyi, kakuloko a fa, a ku: “Yehovha a a vonisise, a a lavisise!”

²³ Lembe leri, kuteloko ri herile, nyimpi ya Vasiriya yi tlhandluka ku lwa na Yowasi, yi ta etikweni ra Yuda ni le Yerusalema; va dlaya exikarhi ka tiko tihosana hinkwato ta tiko, kutani va rhumela hosi ya Damaska xuma hinkwaxo xa vona.

²⁴ Hambi nyimpi ya Vasiriya yi fikile hi vanhu va nga ri vangani, Yehovha a nyiketa emavokweni ya vona, nyimpi leyikulu ngopfu, hikuva a va tshikile Yehovha, Xikwembu xa vatata wa vona; sweswo Vasiriya va avanyisa Yowasi.

²⁵ Kuteloko va n'wi sukerile, hikuva va n'wi tshikile eku vavisekeni lokukulu, malandza ya yena ma endla rhengu hikwalaho ka ku dlawa ka vana va Yehoyada, muprista, kutani va n'wi dlaya esangwini ra yena, a fa. Va n'wi lahla emutini wa Davhida, kambe a va n'wi lahlanga vulahlelweni bya tihosi.

²⁶ Hi vona lava n'wi endleleke rhengu: a a ri Zabada, n'wana Ximeyata, wansati wa ka Amoni, na Yozabadi, n'wana Ximriti, wansati wa ka Mowabu.

²⁷ Loko va ri vana va yena, ni vukulu bya ndzuvo lowu vekiweke ehenhla ka yena, ni ku lunghisiwa ka yindlu ya Xikwembu, timhaka leti, ti tsariwile etimhakeni ta buku ya tihosi. Kutani Amasiya, n'wanakwe, a fuma ematshan'weni ya yena.