2 TIKRONIKA 20 - Xitsonga (Bibele)

Ta Yoxafati loko a hlula Vamowabu ni Vaamoni.

¹ Endzhaku ka sweswo, vana Vamowabu, ni vana Vaamoni, va ri ni Vamehuni van'wana, va ta pfuka Yoxafati ku lwa na yena.

² Va ta byela Yoxafati, va ku: “Vunyingi lebyikulu byi ta byi sukile eEdomu, ehase ka lwandle byi lava ku lwa na wena, kutani waswivo, va le Hasasoni-Tamara,” lowu nga Eni-Gedi.

³ Yoxafati a chava, a tilunghisa ku lava Yehovha, kutani a lerisa va Yuda hinkwavo ku titsona swakudya.

⁴ Kavaloko Vayuda va hlengeletana ku lava matimba eka Yehovha, va suka ni le mitini hinkwayo ya Yuda, va ta lava Yehovha.

⁵ Yoxafati a yima enhlengeletanweni ya va Yuda ni va Yerusalema, endlwini ya Yehovha, emahlweni ka xivava lexintshwa,

⁶ kutani a ku: “Oho! Yehovha, Xikwembu xa vatata wa hina, a hi wena Xikwembu xa matilo, ni mufumi wa matiko hinkwawo xana? Evokweni ra wena ku ni matimba ni ntamu, a ku na munhu la tivaka ku lwa na wena.

⁷ Oho! Xikwembu xa hina, a hi wena la hlongoleke vaaki va tiko leri emahlweni ka tiko ra wena ra Israele, ku ri nyika hilaha ku nga heriki eka rixaka ra Abrahama, loyi a ku rhandzeke xana?

⁸ Va akile kona, kutani va akele vito ra wena vukwetsimelo kona, va te:

⁹ ‘Kungakuloko hi humeleriwa hi khombo rin'wana, kumbe matlhari, ni ku avanyisa, kumbe ntungu, kumbe ndlala, hi ta yima emahlweni ka yindlu leyi, ni le mahlweni ka wena, hikuva vito ra wena ri le ndlwini leyi; ekhombyeni ra hina hi ta huwelela eka wena, kutani u ta hi yingisa, u va u hi ponisa.’

¹⁰ Sweswi, languta vana va Amoni, ni Vamowabu, ni va ntshava ya Seyira, lava u nga pfumelelangiki Vaisraele ku nghena eka vona loko va humile etikweni ra Egipta, hikuva va va hambukele va nga va hetanga,

¹¹ hi vona lava taka ku khensa hi ku hi hlongola endzhakeni leyi u hi ngheniseke eka yona!

¹² Oho! Xikwembu xa hina! Xana u nga ka u nga va avanyisi xana? Hikuva hi pfumala matimba emahlweni ka vunyingi lebyi, lebyikulu, lebyi taka ehenhla ka hina; loko hi ri hina, a hi tivi leswi hi nga ta swi endla, kambe mahlo ya hina ma langutela wena.”

¹³ Hinkwavo va Yuda a va yimile emahlweni ka Yehovha, hambi va ri vana va vona lavatsongo, ni vasati va vona, ni vana va vona va xinuna.

¹⁴ Kutani moya wa Yehovha wu va ehenhla ka Yahaziele, n'wana Zakariya, n'wana Benaya, n'wana Yeyiele, n'wana Mataniya, Mulevhi, exikarhi ka vana va Asafa,

¹⁵ a ri enhlengeletanweni, a ku: “N'wina hinkwenu, va Yuda, ni vaaki hinkwavo va Yerusalema, na wena hosi Yoxafati, yingisani! Yehovha u mi byela sweswo, a ku: ‘Mi nga tshuki mi chava, mi nga heli timbilu emahlweni ka vunyingi lebyikulu lebyi, hikuva nyimpi a hi ya n'wina, kambe i ya Xikwembu.

¹⁶ Mundzuku, ngirimelani eka vona; vonani, va tlhandluka exitsungeni xa Sisi, mi ta hlangana na vona emakun'wini ya nkova lowu langutanaka ni mananga ya Yeruwele.

¹⁷ A hi n'wina lava mi nga ta lwa emhakeni leyi; humani, mi va kona, kutani mi ta vona ku pona ka Yehovha, la nga na n'wina.’ N'wina, va Yuda ni va Yerusalema, mi nga chaveni, mi nga heli timbilu! Mundzuku, humani, mi ya hlangana na vona, Yehovha u ta va na n'wina.”

¹⁸ Kavaloko Yoxafati a khinsama, a wa hi mombo, kutani va Yuda hinkwavo ni vaaki va Yerusalema, va wela emahlweni ka Yehovha, va khinsama emahlweni ka Yehovha.

¹⁹ Kutani Valevhi va vana va Kohata, ni va vana va Kora va pfuka ku tlangela Yehovha, Xikwembu xa Israele, hi rito lerikulu leri tlakukeke.

²⁰ Siku leri tlhandlamaka, va pfuka nimixo, va huma etlhelo ra mananga ra Tekowa; kakuloko va huma, Yoxafati a yima kona, a ku: “Ndzi yingiseni, n'wina va Yuda, na n'wina vaaki va Yerusalema! Tshembani Yehovha, Xikwembu xa n'wina, mi ta tiyisiwa; tshembani vaprofeta va yena, mi ta humeleriwa hi ku kateka.”

²¹ Kutani a endla makungu ni tiko leswaku va ta veka vanhu ku yimbelelela Yehovha ni ku n'wi dzunisa, va ambele tinguvu ta vuvombi leti hlawuliweke va ta rhangela nyimpi, va ku: “Dzunisani Yehovha, hikuva tintswalo ta yena hi leti nga heriki!”

²² Kutani kakuloko va sungula ku yimbelela hi ku tsaka ni ku dzunisa, Yehovha a vekela vana Vaamoni ni Vamowabu, ni va ntshava ya Seyira lava teke ku pfuka Yuda, varindzi, kutani va hluriwa.

²³ Kavaloko vana Vaamoni ni Vamowabu, va pfuka vaaki va ntshava ya Seyira, ku va dlaya ni ku va heta; kuteloko va hetile vaaki va Seyira, va pfunana ku herisana.

²⁴ Va Yuda, kuteloko va fikile entsungeni lowu va vonaka mananga va ri ehenhla ka wona, va languta tlhelo ra vunyingi, kutani maswivo, a yi ri mitsumbu leyi weke ehansi ku nga ponangi munhu.

²⁵ Yoxafati ni tiko ra yena va ta ku va hluvula kutani va kuma exikarhi ka mitsumbu xuma lexo tala ni mitirho leyi pfumalekaka; va swi teka swi ri leswo tala swonghasi leswaku va tsandzeka ku swi rhwala hinkwaswo. Va phanga xuma hi masiku manharhu, hikuva a xi ri lexikulu ngopfu.

²⁶ Hi siku ra vumune va hlengeletana enkoveni wa Beraka (ku khensa), hikuva va khensile Yehovha kona; hikwalaho, va thyile ndhawu leyi, vito ra nkova wa Beraka, ku fika ninamuntlha.

²⁷ Kutani va Yuda hinkwavo ni va Yerusalema, va tlhela va muka eYerusalema hi ku tsaka, Yoxafati a ri emahlweni ka vona; hikuva Yehovha u va tsakisile hi ku va ponisa eka valala va vona.

²⁸ Va nghena eYerusalema, ni le ndlwini ya Yehovha, va ri ni magubu ni tiharipa ni tinanga.

²⁹ Kutani ku chava Xikwembu ku va eku fumeni hinkwako ka matiko ya matlhelo, loko va yingisa leswaku Yehovha u lwile ni valala va Israele.

³⁰ Kwalaho ku fuma ka Yoxafati ku va ni ku rhula, Xikwembu xi n'wi nyika ku wisa ematlhelweni hinkwawo.

³¹ Yoxafati a fuma ehenhla ka va Yuda. A a ri wa malembe ya 35 loko a sungula ku fuma, kutani a fuma malembe ya 25 eYerusalema; vito ra mana wa yena a a ri Azuba, n'wana Xilihi.

³² A famba endleleni ya tata wa yena, Asa a nga yi hambukanga, a tshama a endla leswi lulameke emahlweni ka Yehovha.

³³ Ntsena switsunga, a swi susiwanga, ni vanhu va tiko a va tiyanga ku lava Xikwembu xa vatata wa vona.

³⁴ Leswi seleke swa timhaka ta Yoxafati, leto sungula ni ta ku hetelela, ti tsariwile etimhakeni ta Yehu, n'wana Hanani, ti nghenisiwile ebukwini ya tihosi ta Israele.

³⁵ Endzhaku ka sweswo, Yoxafati, hosi ya Yuda, a endla xinakulobye na Ahaziya, hosi ya Israele, la nga tshama a endla leswo biha.

³⁶ A hlangana na yena ku aka tingalava ku ti rhuma eTarxixi, va aka tingalava Esiyoni-Gebere.

³⁷ Eliezere, n'wana Dodavhahu, wa Marexa, a bvumbha emahlweni ka Yoxafati, a ku: “Leswi u hlanganeke na Ahaziya, Yehovha u onhile ntirho wa wena.” Kutani tingalava ti onheka, ti tsandzeka ku ya Tarxixi.