2 TIKRONIKA 11 - Xitsonga (Bibele)

Ta Rhobuwamu loko a tiyisa vuhosi bya yena.

¹ Rhobuwamu, kuteloko a fikile eYerusalema, a hlengeleta yindlu ya Yuda ni ya Benjamini, va ri vavanuna lava hlawuriweke va 180 000, lava humaka nyimpi; ku ya lwa ni Vaisraele, va ta tlherisela Rhobuwamu vuhosi.

² Kutani rito ra Yehovha ri ta eka Xemaya, munhu wa Xikwembu, ri ku:

³ “Byela Rhobuwamu, n'wana Solomoni, hosi ya Yuda ni Vaisraele hinkwavo lava nga etikweni ra Yuda ni ra Benjamini, u ku eka vona:

⁴ Yehovha u vurisa sweswo, a ku: ‘Mi nga tshuki mi khandziya ku ya lwa ni vamakwenu; tlhelani un'wana ni un'wana endlwini ya yena, hikuva mhaka leyi, yi huma eka mina.’ ” Kutani va yingisa marito ya Yehovha, va tlhela, va tshika ku ya lwa na Yerobuwamu.

⁵ Rhobuwamu a tshama eYerusalema, kutani a aka miti ya makhokholo etikweni ra Yuda.

⁶ A aka Betlehema, na Etamu, na Tekowa,

⁷ na Beta-Suru, na Soko, na Adulama,

⁸ na Gati, na Marexa, na Zifi,

⁹ na Adorayimi, na Lakixi, na Azeka,

¹⁰ na Sora, na Ayaloni, na Hebroni; miti leyi a yi ri etikweni ra Yuda ni ra Benjamini; miti ya makhokholo.

¹¹ A tiyisa miti leyi, a veka kona tindhuna, kutani a hlengeleta kona swakudya, ni mafurha, ni vhinyo;

¹² a veka emutini wun'wana ni wun'wana switlhangu, ni mafumu, a tiyisa swinene miti leyi. Hikuva va Yuda ni va Benjamini a va ri va yena.

¹³ Vaprista ni Valevhi lava ngi va ri etikweni ra Israele hinkwaro, va sukela miti ya vona ku ya tshama na yena;

¹⁴ Valevhi va tshika matikwana ya vona ni rifuwo ra vona, va ta etikweni ra Yuda na Yerusalema, hikuva Yerobuwamu ni vana va yena a va va humesile emitirhweni ya vona ya vuprista bya Yehovha;

¹⁵ a tivekela vaprista va switsunga ni va swiphongo, ni va marhole, leswi a swi endleke.

¹⁶ Valevhi va landziwa hi vanhu hinkwavo va tinxaka hinkwato ta Israele lava ngi va rhandza ku lava Yehovha, Xikwembu xa Israele; vona va ta eYerusalema, ku humesela Yehovha, Xikwembu xa vatata wa vona, magandzelo.

¹⁷ Sweswo, va tiyisa vuhosi bya Yuda, va nyika Rhobuwamu, n'wana Solomoni, matimba, hi malembe manharhu, hikuva va famba endleleni ya Davhida ni ya Solomoni hi malembe manharhu.

¹⁸ Rhobuwamu a teka Mahalata, n'wana Yerimoto, n'wana Davhida, ni wa Abihayili, n'wana wa wansati wa Eliyabu, n'wana Yese.

¹⁹ A n'wi velekela vana va xinuna, a ri Yewuxi, na Xemariya na Zahama.

²⁰ Endzhaku ka yena a teka Maaka, n'wana Abixalomu; yena a n'wi velekela Abiya, na Atayi, na Ziza na Xelomiti.

²¹ Rhobuwamu a a rhandza Maaka, n'wana Abixalomu, ku tlurisa vasati va yena hinkwavo ni vasati lavatsongo; hikuva a a tekile vasati va 18 ni vasati lavatsongo va 60; a veleka vana va xinuna va 28, ni vana va xisati va 60.

²² Rhobuwamu a veka Abiya, n'wana Maaka ku va hosi exikarhi ka vamakwavo hikuva a a rhandza ku n'wi endla hosi.

²³ A endla hi vutlhari, hikuva a hangalasa vana va yena va xinuna ematlhelweni hinkwawo ya Yuda ni ya Benjamini, ni le mitini hinkwayo ya makhokholo, a va nyika swakudya leswotala, kutani a va lavelela vasati lavo tala.