2 TIHOSI 25 - Xitsonga (Bibele)

Vanhu va tiko ra Yuda va yisiwa evukhumbini.

¹ Hi lembe ra ntlhanu na mune ra ku fuma ka yena, hi n'hweti ya khume, hi siku ra khume ra n'hweti, Nebukadnetsara, hosi ya Babilona, a ta ni nyimpi hinkwayo ya yena ku hlasela Yerusalema. A gova emahlweni ka wona, kutani va wu akela switsulutsulu ematlhelweni hinkwawo.

² Muti wu rhendzeriwa ku fikela lembe ra khume na rin'we ra hosi Sedekiyasi.

³ Hi siku ra ntlhanu na mune ra n'hweti, ndlala a yi ri kona emutini, vanhu va tiko a va pfumala swakudya.

⁴ Kutani rirhangu ra muti ri boxiwa, vavanuna hinkwavo va nyimpi va huma nivusiku hi ndlela ya nyangwa, exikarhi ka makhumbi mambirhi, ekusuhi ni ntanga wa hosi; kutani va famba hi ndlela ya rivala loko Vakalediya a va ri karhi va rhendzela muti.

⁵ Kambe nyimpi ya Vakalediya yi hlongorisa hosi, va yi kuma erivaleni ra Yeriko, kutani nyimpi hinkwayo ya yona yi yi tshika yi hangalaka.

⁶ Va khoma hosi, va yi yisa eka hosi ya Babilona eRibila, va yi avanyisa kona.

⁷ Va dlaya vana va Sedekiyasi emahlweni ka yena, va boxa mahlo ya Sedekiyasi kutani va n'wi boha hi tiketana ta koporo, va n'wi yisa eBabilona.

⁸ Hi n'hweti ya vuntlhanu, hi siku ra ntlhanu na mambirhi ra n'hweti (a ri ri lembe ra 19 ra ku fuma ka Nebukadnetsara, hosi ya Babilona) Nebuzaradani, ndhuna ya valanguteri, nandza wa hosi ya Babilona, a nghena eYerusalema.

⁹ A hisa yindlu ya Yehovha, ni yindlu ya hosi; a hisa tindlu hinkwato ta Yerusalema, ni tindlu hinkwato ta vakulukumba.

¹⁰ Kutani nyimpi hinkwayo ya Vakalediya leyi ngi yi ri ni ndhuna ya valanguteri, yi mbundzuxa rirhangu leri rhendzeleke Yerusalema.

¹¹ Loko va ri vanhu lava seleke, lava tshameke emutini ni lava balekeke, lava tinyiketeke eka hosi ya Babilona, ni leswi seleke swa vunyingi bya vanhu, Nebuzaradani, ndhuna ya valanguteri, a va yisa evukhumbini.

¹² Ntsena, hosi ya valanguteri, yi siya van'wana exikarhi ka swisiwana swa tiko ku hlayisa tivhinya ni ku rima masimu.

¹³ Vakalediya va faya timhandze ta koporo leti ngi ti ri endlwini ya Yehovha, ni swikhato, ni lwandle ra koporo leri ngi ri ri endlwini ya Yehovha; kutani va yisa koporo ya swona eBabilona.

¹⁴ Va teka ni timbita, ni tifoxolo, ni mikwana, ni mikombe, ni swibya hinkwaswo swa koporo leswi va tirhaka ntirho ha swona.

¹⁵ Ndhuna ya valanguteri yi teka ni swimbitana swa mirhi ya risuna ni mindzheko, hinkwaswo leswi ngi swi ri swa nsuku ni swa silivhere.

¹⁶ Loko ti ri timhandze timbirhi, ni lwandle ni swikhato leswi Solomoni a swi endleleke yindlu ya Yehovha, koporo ya swilo leswi hinkwaswo, a yi pimiwanga exikalweni.

¹⁷ Ku leha ka mhandze yin'wana ni yin'wana a swi ri swisungunhu swa 18, ni ku tlakuka ka swirhendzevutana swa koporo leswi ngi swi ri ehenhla ka tona, a swi ri swisungunhu swinharhu. Swirhendzevutana swi rhendzeriwa hi ntirho wa longwe ni magirenada, hinkwaswo a swi ri swa koporo. A swi ri tano eka mhandze ya vumbirhi.

¹⁸ Ndhuna ya valanguteri yi teka Seraya, muprista lonkulu, na Sofoniya muprista wa vumbirhi, ni valanguteri vanharhu va nyangwa;

¹⁹ emutini, a teka nandza wa mutsheniwa la ngi a ri ndhuna ya vanhu va nyimpi, ni vavanuna va ntlhanu lava tshamaka va vona mombo wa hosi, lava kumiweke emutini, ni mutsari wa ndhuna ya nyimpi la ngi a ri ni ntirho wa ku rhamba vanhu va tiko, ni vavanuna va 60 va tiko lava ngi va ri emutini.

²⁰ Nebuzaradani, ndhuna ya valanguteri, a va teka a va yisa eka hosi ya Babilona, eRibila.

²¹ Hosi ya Babilona yi va dlaya eRibila, etikweni ra Hamata. Kutani va Yuda va yisiwa evukhumbini ekule ni tiko ra vona.

²² Loko va ri vanhu lava seleke etikweni ra Yuda, lava siyiweke hi Nebukadnetsara, hosi ya Babilona, hosi yi veka ehenhla ka vona Gedaliya n'wana Ahikama, n'wana Xafani.

²³ Tindhuna hinkwato ta nyimpi, ni vanhu va tona, kuteloko va swi twile leswaku hosi ya Babilona yi vekile Gedaliya, va ta eka Gedaliya eMispa, a ri Iximaele, n'wana Netaniya, na Yohanani, n'wana Kariyaka, na Seraya, n'wana Tanahumeti, wa Netofa, na Yaazaniya, n'wana wa munhu wa Maaka, va ta ni vanhu va vona.

²⁴ Gedaliya a va hlambanyela vona ni vanhu va vona, a ku: “Mi nga chavi malandza ya Vakalediya, akani etikweni, tirhelani hosi ya Babilona, kutani mi ta tsaka.”

²⁵ Kambe, hi n'hweti ya ntlhanu na timbirhi, Iximaele, n'wana Netaniya, n'wana Elixama wa rixaka ra hosi, a ta a ri ni vavanuna va khume, va tlhava Gedaliya, kutani a fa swin'we ni Vayuda, ni Vakalediya, lava ngi va ri na yena eMispa.

²⁶ Kutani tiko hinkwaro, ku suka eka lontsongo, ku fika eka lonkulu, ni tindhuna ta nyimpi va suka va ya eEgipta, hikuva a va chava Vakalediya.

²⁷ Hi lembe ra 37, ra ku khomiwa ka Yoyakini, hosi ya Yuda, hi n'hweti ya 12, hi siku ra 27 ra n'hweti, Evhili-Merodaka, hosi ya Babilona, lembe leri a sunguleke ku fuma, a tlakusa nhloko ya Yoyakini, hosi ya Yuda, a n'wi humesa ekhotsweni.

²⁸ A vulavula na yena hi vunene, kutani a n'wi tlakusa ehenhla ka tihosi leti ngi ti ri na yena eBabilona.

²⁹ A n'wi hluvurisa tinguvu ta yena ta mukhomiwa, kutani a dya swakudya emahlweni ka hosi hi masiku hinkwawo ya ku hanyaka yena.

³⁰ Loko swi ri leswi a swi pfumaleke, a nyikiwa hi hosi siku rin'wana ni rin'wana, hi masiku hinkwawo ya ku hanya ka yena.