2 TIHOSI 24 - Xitsonga (Bibele)

¹ Enkarhini wa yena, Nebukadnetsara, hosi ya Babilona, a huma nyimpi, kutani Yoyakimi a va ehansi ka yena malembe manharhu; kambe ndzhaku a n'wi hundzukela, a n'wi pfuka.

² Kutani Yehovha a rhuma mavandla ku lwa na Yoyakimi, ma ri mavandla ya Vakalediya, ni mavandla ya Vasiriya, ni mavandla ya Mowabu, ni mavandla ya vana va Amoni; a ma rhumela eka va Yuda ku va heta, hilaha Yehovha a nga vula hakona hi malandza ya yena vaprofeta.

³ Leswi swi humelele eka va Yuda hi ku lerisa ka Yehovha ntsena, leswaku a ta va susa emahlweni ka yena hikwalaho ka swidyoho swa Manase, hilaha a endleke hinkwaswo hakona,

⁴ ni hikwalaho ka ngati leyi nga riki na nandzu leyi a yi halateke; hikuva a tatile Yerusalema hi ngati leyi nga riki na nandzu; kutani Yehovha a nga rhandzangi ku rivalela.

⁵ Timhaka leti seleke ta Yoyakimi, ni hinkwaswo leswi a swi endleke, a swi tsariwanga ebukwini ya Tikronika ta tihosi ta Yuda xana?

⁶ Yoyakimi a etlela ni vatata wa yena; kutani Yoyakini, n'wana wa yena a fuma ematshan'weni ya yena.

⁷ Hosi ya Egipta a ya ha engetanga yi huma etikweni ra yona, hikuva hosi ya Babilona a yi tekile hinkwaswo leswi ngi swi ri swa hosi ya Egipta, ku suka exinambyaneni xa Egipta ku fika enambyeni wa Yufrata.

⁸ Yoyakini a a ri wa malembe ya 18 loko a sungula ku fuma; a fuma tin'hweti tinharhu eYerusalema, vito ra mana wa yena a a ri Nehuxita, n'wana Elinatani, wa Yerusalema.

⁹ A endla leswo biha emahlweni ka Yehovha, hinkwaswo hilaha tata wa yena a endleke hakona.

¹⁰ Enkarhini wolowo malandza ya Nebukadnetsara, hosi ya Babilona, ma tlhandluka ku ta hlasela Yerusalema, kutani muti wu rhendzeriwa.

¹¹ Nebukadnetsara, hosi ya Babilona a fika emahlweni ka muti, loko malandza ya yena ma ri karhi ma wu rhendzela.

¹² Kavaloko Yoyakini, hosi ya Yuda, a huma eka hosi ya Babilona, a ri ni mana wa yena, ni malandza ya yena, ni tindhuna ta yena, ni vatsheniwa va yena. Kutani hosi ya Babilona yi n'wi teka, yi n'wi boha hi lembe ra ntlhanu na manharhu ra ku fuma ka yena.

¹³ Kutani a teka xuma hinkwaswo xa yindlu ya Yehovha, ni xuma xa yindlu ya hosi; a tsemetela swibya hinkwaswo swa nsuku leswi Solomoni, hosi ya Israele, a swi endleleke tempele ya Yehovha, hilaha Yehovha a vuleke hakona.

¹⁴ A teka vaaki hinkwavo va Yerusalema, ni tindhuna hinkwato ni vafuwi hinkwavo, a famba na vona, va ri vakhomiwa va 10 000, a teka ni vavatli hinkwavo ni vafuri; ku sala swisiwana swa tiko ntsena.

¹⁵ A yisa Yoyakini eBabilona; kutani a yisa evukhumbini mana wa hosi, ni vasati va hosi, ni malandza ya yona, ni vakulukumba va tiko, a va teka eYerusalema, ku va yisa eBabilona.

¹⁶ Ni vavanuna hinkwavo va nyimpi, va ri 7 000, ni vavatli ni vafuri, va ri 1 000, ni vavanuna hinkwavo lava tiyeke, lava hlomaka; hosi ya Babilona yi va yisa evukhumbini eBabilona.

¹⁷ Kutani hosi ya Babilona yi veka hosi ematshan'weni ya Yoyakini, Mataniya, makwa tata wa yena, kutani a hundzuluxa vito ra yena, a n'wi thya Sedekiyasi.

Ta Sedekiyasi, hosi ya Yuda, Yerusalema a herisiwa hi Nebukadnetsara.

¹⁸ Sedekiyasi a a ri wa malembe ya 21 loko a sungula ku fuma, kutani a fuma malembe ya khume na rin'we eYerusalema. Vito ra mana wa yena a a ri Hamutala, N'wa Yeremiya, wa Libina.

¹⁹ A endla leswo biha emahlweni ka Yehovha, swi ri hinkwaswo hilaha Yoyakimi a endleke hakona.

²⁰ Hikuva vukari bya Yehovha byi humelele ehenhla ka Yerusalema na Yuda, a ko a va cukumeta emahlweni ka yena. Kutani Sedekiyasi a hundzukela hosi ya Babilona.