2 SAMIELE 7 - Xitsonga (Bibele)

Ta Davhida loka a lave ku akela Yehovha yindlu.

¹ Kuteloko hosi yi akile endlwini ya yena, ni loko Yehovha a yi nyikile ku wisa ematlhelweni hinkwawo eka valala va yena,

² hosi yi ku eka Natani muprofeta: “Wa nga languta: loko ndzi ri mina, ndzi akile endlwini ya kedari, kasi areka ya Xikwembu yi tshama entsongeni.”

³ Natani a ku eka hosi: “Famba u endla hinkwaswo leswi nga embilwini ya wena, hikuva Yehovha u na wena.”

⁴ Kutani hi vusiku lebyi, rito ra Yehovha ri ta eka Natani ri ku:

⁵ “Famba, u ya byela Davhida, nandza wa mina, u ku: ‘Yehovha u te: Xana ndzi ta akeriwa hi wena yindlu leyi ndzi nga ta tshama eka yona xana?

⁶ Hikuva a ndzi tshamangi endlwini ku suka siku leri ndzi humeseke Israele eEgipta ku fika namuntlha, kutani a ndzi ri muendzi, ndzi tshamile etendeni ni le ntsongeni.

⁷ Hinkwako laha ndzi fambeke kona ni vana va Israele hinkwavo, xana ndzi vurile rito rin'we eka rin'wana ra tinyimba ta Israele leti ndzi ti leriseke ku risa Israele, tiko ra mina, ndzi te: “A mi ndzi akelanga ha yini yindlu ya kedari xana?” ’

⁸ Sweswi, u ta ya vurisa sweswo eka Davhida nandza wanga, u ku: ‘Yehovha wa mavandla u te: Ndzi ku tekile ematshangeni, exikarhi ka tinyimpfu leswaku u va mufambisi wa Israele, tiko ra mina;

⁹ a ndzi ri na wena hinkwako laha u fambeke kona, ndzi hetile valala hinkwavo va wena emahlweni ka wena; ndzi ku endlile vito lerikulu, kukotisa mavito ya vakulu lava nga emisaveni.

¹⁰ Kutani ndzi vekele tiko ra mina ra Israele ndhawu; ndzi ri simekile, kutani ri akile ekaya ka rona; kutani ri nga ka ri nga ha xanisiwi, ni vanhu vo biha a va nga ha tshuki va ri tsongahata kukotisa eku sunguleni,

¹¹ ni ku suka siku ndzi leriseke vaavanyisi etikweni ra mina ra Israele; ndzi ku nyikile ni ku wisa eka valala hinkwavo va wena, kutani Yehovha a ku tivisa leswaku Yehovha u ta ku endlela yindlu.

¹² Kutakuloko masiku ya wena ma herile, ni loko u etlerile ni vatata wa wena, ndzi ta pfuxa endzhaku ka wena mbewu leyi nga ta huma eswifungheni swa wena, kutani ndzi ta tiyisa vuhosi bya yona.

¹³ U ta va yena la nga ta akela vito ra mina yindlu, kambe ndzi ta tiyisa xiluvelo xa ku fuma ka yena hi masiku.

¹⁴ Ndzi ta va tatana eka yena, na yena u ta va n'wana wa mina, kungakuloko a endla leswo biha, ndzi ta n'wi laya hi nkhavi wa vanhu ni makhombo ya vana va vanhu;

¹⁵ kambe tintswalo ta mina ti nga ka ti nga suki eka yena, kukotisa loko ingi ndzi ti susile eka Sawulo loyi ndzi n'wi suseke emahlweni ka wena.

¹⁶ Kambe yindlu ya wena, ni vuhosi bya wena byi ta tshama hilaha ku nga heriki emahlweni ka wena: swiluvelo swa wena swi ta tiya hi masiku.’ ”

¹⁷ Natani a byela Davhida marito hinkwawo lawa, ni mahlori hinkwawo lawa.

¹⁸ Kavaloko hosi Davhida a ya tshamisa emahlweni ka Yehovha, a ku: “Ndzi mani, Hosi Yehovha, ni yindlu yanga hi yihi, leswi u ndzi fikiseke kwalaho!

¹⁹ Ntsena a yi ri mhaka leyitsongo emahlweni ka wena, Hosi Xikwembu, kambe u vurile ni mhaka ya yindlu ya nandza wa wena ya nkarhi lowu nga ekule emahlweni; kambe mhaka leyi, oho Hosi Yehovha, xana i nawu wa vanhu xana?

²⁰ Kutani Davhida a ta engeta a ku byela yini xana? Wa tiva nandza wa wena, wee Hosi Yehovha!

²¹ U endlile mhaka leyikulu leyi, hikwalaho ka rito ra wena ni mbilu ya wena, ni ku yi tivisa nandza wa wena.

²² Sweswo u nkulukumba, Yehovha Xikwembu! Hikuva a ku na un'we la fanaka na wena, kutani a ku na Xikwembu ehandle ka wena, hilaha hi nga swi twa hinkwaswo hi tindleve ta hina.

²³ Kambe i mani la kotisaka tiko ra wena ra Israele, ri nga tiko ra xiviri emisaveni, leri Xikwembu xi teke ku tikutsulela rona, xi ta va ni tiko ra xona xi ta va vekela vito ni ku va endlela xilo lexikulu, ni swilo leswi chavisaka etikweni ra wena, hi ku hlongola matiko ni swikwembu swa wona, emahlweni ka tiko ra wena leri u tikutsuleleke rona Egipta?

²⁴ Kutani u tivekele tiko ra wena ra Israele ku va tiko ra wena hi masiku; kutani wena, Yehovha, a wu ri Xikwembu xa vona.

²⁵ Sweswi Yehovha Xikwembu! Endla hi masiku hi rito leri u ri vuleke ehenhla ka nandza wa wena ni le henhla ka yindlu ya yena, u endla hilaha u vuleke hakona.

²⁶ A va dzunise vito ra wena hi masiku, va ku: ‘Yehovha wa mavandla i Xikwembu xa Israele!’ Yindlu ya nandza wa wena Davhida a yi tiyisiwe emahlweni ka wena.

²⁷ Hikuva wena, Yehovha wa mavandla Xikwembu xa Israele, u tivisile nandza wa wena, u ku: ‘Ndzi ta ku akela yindlu,’ hikwalaho nandza wa wena u tiyile mbilu ku ku khongela hi xikhongelo lexi.

²⁸ Sweswi, Hosi Yehovha, hi wena loyi u nga Xikwembu; marito ya wena hi lama tiyeke, kutani u vurisile mhaka leyinene eka nandza wa wena.

²⁹ Sweswi kambe, wanga katekisa yindlu ya nandza wa wena, leswaku yi tshama hi masiku emahlweni ka wena; hikuva hi wena, Hosi Yehovha, la nga vurisa sweswo, kutani yindlu ya nandza wa wena yi ta katekisiwa hi masiku hi ku kateka ka wena.”