2 SAMIELE 22 - Xitsonga (Bibele)

Risimu ra Davhida loko a ponisiwile emavokweni ya valala va yena.

¹ Davhida a vula eka Yehovha marito ya risimu leri, siku Yehovha a n'wi poniseke emavokweni ya valala va yena hinkwavo, ni le mavokweni ya Sawulo. A ku:

² “Oho! Yehovha ribye ra mina, ni khokholo ra mina, ni mulweri wa mina!

³ Oho! Xikwembu xa mina, ribye ra mina leri ndzi chavelaka eka rona, Xitlhangu xa mina, ni matimba lawa ndzi hlayisekaka ha wona, Ni khokholo leri tlakukeke ra mina, ni xichavelo xa mina! Muponisi wanga! U ndzi sirhelela eka lava ndzi endlaka hi matimba.

⁴ Ndzi huwelela, ndzi ku: ‘Yehovha a a vongiwe!’ Kutani ndzi lweriwa eka valala va mina.

⁵ “Hikuva magandlati ya rifu ma ndzi rhendzele, Maboboma ya lavo biha ma ndzi tshukisile;

⁶ Tinsinga ta sirha a ti ndzi rhendzele, A ndzi khomiwile emarindzini ya rifu. Emapfalweni ya mina, a vitana Yehovha, Kambe ndzi huwelela eka Xikwembu xa mina;

⁷ U yingisile rito ra mina endlwini ya yena; Ku huwelela ka mina ku fikile etindleveni ta yena.

⁸ “Kavaloko misava yi tsekatseka, yi rhurhumela, Masungulo ya matilo ma susumetiwa, Ma tsekatseka, hikuva a a karihile.

⁹ Ku tlhandluka musi, wu huma etinhompfini ta yena, Ni ndzilo lowu lovisaka emilon'wini ya yena; Ku huma eka yona ni makala lama vavamelaka,

¹⁰ A andlala matilo, a xika; Munyama a wu ri ehansi ka mikondzo ya yena.

¹¹ U khandziyile kerubu, a haha, A humelela a ri etimpapeni ta moya.

¹² A tirhendzele hi munyama, wu va ntsonga wa yena. A hlengeleta mati layo tala ni mapapa ya munyama,

¹³ Eku vonakaleni loku n'wi rhangelaka emahlweni, Ku huma makala lama vavamelaka.

¹⁴ “Yehovha a pfuma a ri ematilweni, Loyi a nga ehenhlahenhla a twakarisa rito ra yena;

¹⁵ A copa miseve ya yena, a hangalasa valala va mina hi yona, A vangamisa rihati, kutani a va hambanyisa.

¹⁶ Vuento bya lwandle byi humelela erivaleni, Masungulo ya misava ma fununguriwa, Hi ku tshinya ka Yehovha, Ni ku huhuta ka moya wa vukari bya yena.

¹⁷ “A ololoxa voko a ri henhla, a ndzi khoma, A ndzi humesa ematini lamakulu.

¹⁸ A ndzi lwela eka nala wa mina lowa matimba, Ni ka lava ndzi vengeke, lava ndzi hlulaka.

¹⁹ Va ndzi sivelele siku ndzi nga ekhombyeni; Kambe Yehovha a va xongotelo ra mina.

²⁰ A ndzi humesela erivaleni; A ndzi kutsula, hikuva a ndzi rhandzile.

²¹ “Yehovha u ndzi endlile hi ku lulama ka mina. Kambe u ndzi tlherisile hi ku basa ka mavoko ya mina;

²² Hikuva ndzi hlayisile tindlela ta Yehovha, A ndzi dyohelanga Xikwembu xa mina.

²³ Hikuva ku lerisa hinkwako ka yena ku le mahlweni ka mina, Kambe a ndzi fularhelanga milawu ya yena.

²⁴ Ndzi pfumarile xisolo emahlweni ka yena, Ndzi tihlayisile leswaku ndzi nga vi na nandzu.

²⁵ Hikwalaho Yehovha u ndzi tlherisile hi ku lulama ka mina, Ni ku basa ka mina emahlweni ka yena.

²⁶ “Lonene, u n'wi endlela vunene Munhu la lulameke, u n'wi endla hi ku lulama.

²⁷ La baseke u n'wi endla hi ku basa ka yena, Kambe lowo homboloka u n'wi endla hi ku homboloka ka yena.

²⁸ U ponisa vanhu lava nga ekhombyeni, Kambe u tsongahata mahlo lama tlakukeke.

²⁹ “Wena Yehovha, u rivoningo ra mina, Xikwembu xi vonakarisa munyama wa mina.

³⁰ Hikuva loko ndzi ri na wena ndzi nga tsutsumela vandla ra valala, Kambe hi Xikwembu xa mina ndzi nga tlula rirhangu.

³¹ “Ndlela ya Xikwembu yi lulamile, Rito ra Yehovha ri hlawulekile; I xitlhangu xa hinkwavo lava chavelaka ka yena.

³² I mani Xikwembu, loko a nga ri Yehovha? I mani ribye, loko xi nga ri Xikwembu xa hina?

³³ Xikwembu i khokholo leri tiyeke ra mina, Xi lulamisile ndlela ya mina.

³⁴ U endlile milenge ya mina leyi fanaka ni ya mhala ya ntswele, U ndzi vekile henhla ka tintshava ta mina.

³⁵ U vumbele nyimpi mavoko ya mina, Ni swandla swi mina swi kwaya vurha bya nsuku.

³⁶ “U ndzi nyikile xitlhangu xa ku hlayiseka ka wena, Vunene bya wena byi ndzi kurisile.

³⁷ U anamisile ndlela ehansi ka mikondzo ya mina, Kambe milenge ya nuna a yi rhetemuki.

³⁸ Ndzi tsutsumela valala va mina, ndzi va lovisa, A ndzi tlheli ndzi nga si va heta.

³⁹ Ndzi va hisa, ndzi va kandziyela kutani va hluleka ku pfuka; Va wa hansi ka mikondzo ya mina.

⁴⁰ Hikuva u ndzi bohile hi vamba ra matimba ra nyimpi, U ndzi tsongahatela lava ndzi pfukelaka matimba.

⁴¹ U rhendzelekisile mihlana ya valala va mina emahlweni ka mina, Kutani ndzi herisile lava ndzi vengaka.

⁴² Va languta; kambe va pfumala mulweri! Va huwelela eka Yehovha, kambe a nga va hlamuli!

⁴³ Ndzi va sirile kukotisa ntshuri wa misava, Ndzi va pyanya, ndzi va kandziyela kukotisa ndzhope wa tindlela.

⁴⁴ “U ndzi lwerile eku kanetaneni ka tiko; Kambe u ndzi vekile hosi ya matiko; Tiko leri ngi ndzi nga ri tiviki ra ndzi tirhela.

⁴⁵ Vana va valuveri va ta ndzi xengetela, Kakuloko va twile hi tindleve va titsongahata.

⁴⁶ Vana va vamatiko va ni gome, Va rhurhumela loko va huma emakhokholweni ya vona.

⁴⁷ “Yehovha wa hanya! Ribye ra mina a ri dzunisiwe! Xikwembu, ri nga ribye ra ku hlayiseka ka mina, a xi kurisiwe.

⁴⁸ Xikwembu lexi ndzi rihiselaka, Lexi ndzi tsongahatelaka matiko,

⁴⁹ U ndzi lwela eka valala va mina! U ndzi tlakusile henhla ka lava lwaka na mina; U ndzi ponisile ka wanuna wa vukari.

⁵⁰ Hikwalaho, oho Yehovha! Ndzi ta ku vonga exikarhi ka matiko! Ndzi ta yimbelela vito ra wena.

⁵¹ U ponisa hosi ya yena hi ku hlayisa lokukulu, U endla hi tintswalo eka muhlawuriwa wa yena, Eka Davhida, ni ka rixaka ra yena hi laha ku nga heriki.”