2 SAMIELE 12 - Xitsonga (Bibele)

Ta ku tshinyiwa ka Davhida; Natani.

¹ Kutani Yehovha a rhuma Natani eka Davhida. Kavaloko a ta eka Davhida, a ku eka yena: “Emutini wun'wana a ku ri ni vanhu vambirhi un'wana a a ri mufuwi, un'wana a a ri xisiwana.

² Mufuwi a a fuwe tihomu ni tinyimpfu leto tala ngopfu;

³ kasi lowa xisiwana a a fuwe xinyimpfana xi ri xin'we ntsena lexi a nga xi xava, a xi wundla, xi kula endlwini ya yena swin'we ni vana va yena, xi dya swakudya swa yena, xi nwa exidzuvulweni xa yena, xi etlela exifuveni xa yena, xi ri kukotisa n'wana eka yena.

⁴ Ku fika munhu la endzaka eka mufuwi, kutani a swi nonon'hwa eka yena ku teka xifuwo lexitsongo hambi lexikulu xa yena ku xi tlhavela muendzi la n'wi endzeleke, kutani a ya teka xinyimpfana xa xisiwana, a tlhava a lunghisela munhu la n'wi endzeleke.”

⁵ Kavaloko Davhida a karihela munhu loyi ngopfu, a ku eka Natani: “Yehovha wa hanya! La endliseke sweswo u fanekele hi ku fa!

⁶ U ta riha xinyimpfana eka mune, hi leswi a endleke mhaka leyi, a nga vanga na tintswalo.”

⁷ Kutani Natani a ku eka Davhida: “Munhu loyi hi wena! Yehovha Xikwembu xa Israele, xi vurisile, xi te: ‘Ndzi ku cherile hi mafurha leswaku u va hosi ya Israele, ndzi ku kutsurile evokweni ra Sawulo,

⁸ ndzi ku nyikile yindlu ya hosi ya wena, ndzi vekile vasati va hosi ya wena exifuveni xa wena; ndzi ku nyikile yindlu ya Israele ni ya Yuda; ni loko xi ri xilo lexitsongo, ingi ndzi ta ku engetela xilo xihi ni xihi.

⁹ U sandzise ku yini rito ra Yehovha u endla leswi biheke emahlweni ka yena? U dlayile Uriya wa ka Hiti hi tlhari, u tekile nsati wa yena u n'wi endla nsati wa wena; kambe u n'wi dlayile hi tlhari ra vana va Amoni.

¹⁰ Sweswi, tlhari ri nga ka ri nga humi endlwini ya wena ni siku ni rin'we, hikuva u ndzi sandzile, hi ku teka nsati wa Uriya wa ka Hiti u n'wi endla nsati wa wena.’

¹¹ Yehovha u vurisile; a ku: ‘Waswivo, ndzi ta humesa khombo endlwini ya wena: ndzi ta teka vasati va wena emahlweni ka wena, ndzi va nyika vanakuloni, va ta etlela ni vasati va wena emahlweni ka dyambu leri;

¹² hikuva u swi endlile eswihundleni, kambe mina ndzi ta swi endla emahlweni ka Vaisraele hinkwavo, ni le mahlweni ka dyambu.’ ”

¹³ Kutani Davhida a ku eka Natani: “Ndzi dyohele Yehovha.” Kutani Natani a ku eka Davhida: “Yehovha u hundzisile xidyoho xa wena; u nga ka u nga fi;

¹⁴ kambe leswi u tsan'wiseke Yehovha eka valala va yena emhakeni leyi, n'wana loyi u velekeriweke yena u ta fa hakunene.”

¹⁵ Kutani Natani a muka endlwini ya yena. Kavaloko Yehovha a ba n'wana loyi nsati wa Uriya a velekeleke Davhida, kutani a vabya, a lava ku fa.

¹⁶ Kambe Davhida a lava Xikwembu hikwalaho ka n'wana, a titsona swakudya, a nghena endlwini a tshama vusiku hinkwabyo a etlele hansi.

¹⁷ Vakulukumba va yindlu ya yena va pfuka va ta eka yena, va n'wi khongotela ku pfuka ehansi, kambe a ala ni ku dya swakudya na vona.

¹⁸ Kute hi siku ra ntlhanu na mambirhi, n'wana a fa, kutani malandza ya Davhida ma chava ku n'wi byela ku fa ka n'wana, hikuva a va ku: “Loko n'wana a ha hanya, a hi vulavula na yena kambe a nga yingisanga rito ra hina; xana hi ta tiya ku ya n'wi byela leswaku n'wana u file xana? U ta endla ku biha kun'wana!”

¹⁹ Kambe Davhida a vona ku n'unun'uta ka malandza ya yena, kutani Davhida a tiva leswaku n'wana a file; kutani a ku eka malandza ya yena: “N'wana u file xana?” Va ku: “U file!”

²⁰ Kavaloko Davhida a pfuka ehansi, a hlamba, a tola, a ambala tinguvu tin'wana, kutani a nghena endlwini ya Yehovha, a khinsama; a tlhela a nghena endlwini ya yena, a kombela ku phameriwa swakudya, kutani a dya.

²¹ Malandza ya yena ma ku eka yena: “U endla yini xana? Loko n'wana a ha hanya, a u titsona swakudya, u rila, kambe loko n'wana a file, u pfuka u dya!”

²² Kutani a ku: “Loko n'wana a ha hanya, a ndzi titsona swakudya, ndzi rila, hikuva a ndzi ku: ‘Ku tiva mani xana? Kumbe Yehovha u ta ndzi tsetselela, kutani n'wana u ta hanya.’

²³ Sweswi u file ndzi ta titsonela yini swakudya? Ndzi ta swi kota ku n'wi vuyisa xana? Mina ndzi ta ya eka yena, kambe yena a nga ka a nga vuyi eka mina.”

²⁴ Kutani Davhida a chavelela Batixeba, nsati wa yena; kutani a ya eka yena, a etlela na yena, kutani a veleka n'wana, loyi Davhida a n'wi thyeke vito ra Solomoni; kutani Yehovha a n'wi rhandza;

²⁵ a tivisa Davhida mhaka leyi hi Natani, muprofeta kutani yena a n'wi thya vito ra Yedidiya (murhandziwa wa Yehovha), hikwalaho ka Yehovha.

²⁶ Kutani Yowabu a lwa na Rhaba wa vana va Amoni, a teka muti wa ntsindza.

²⁷ Kutani Yowabu a rhumela Davhida tintsumi, a ku: “Ndzi lwile na Rhaba, ndzi tekile ni muti wa mati.

²⁸ Sweswi hlengeleta lava seleke va tiko, u rhendzela muti, u wu teka, leswaku loko ndzi teka muti, wu nga vitaniwi hi vito ra mina.”

²⁹ Davhida a hlengeleta tiko hinkwaro, a ya eRhaba, kutani a lwa na wona, a wu teka.

³⁰ Kutani a teka harhi ya vuhosi enhlokweni ya hosi ya vona (ku tika ka yona a yi ri talenta ya nsuku, yi ri ni maribye lama pfumariwaka) kutani yi vekiwa enhlokweni ya Davhida; a teka xuma lexikulu ngopfu emutini, a famba na xona.

³¹ Loko va ri vanhu va kona, a va humesa, a va tirhisa emasaheni ni le tipikeni ta nsimbhi, ni le swihlokeni swa nsimbhi, a va vumbisa ni switina; a endlela Sweswo miti hinkwayo ya vana va Amoni. Kutani Davhida a tlhela a muka eYerusalema ni tiko hinkwaro.