2 SAMIELE 1 - Xitsonga (Bibele)

Ta Davhida loko a rila Sawulo na Yonatani hi risimu.

¹ Kuteloko Sawulo a file, ni loko Davhida a vuyile eku hlaseleni ka Vaamaleke, Davhida a tshama masiku mambirhi eSikilaga.

² Siku ra vunharhu, ku fika munhu la humaka enyimpini, eka Sawulo, tinguvu ta yena ti handzuriwile, a a ri ni ntshuri enhlokweni; a ta eka Davhida, kutani a wela ehansi, a khinsama.

³ Davhida a ku eka yena: “U pfa kwihi?” Kutani a ku eka yena: “Ndzi balekile enyimpini ya Israele.”

⁴ Davhida a ku eka yena: “Ku humelele yini xana? Ndzi byele!” Kutani a ku: “Tiko ri chavile, ri tsutsumile enyimpini, kutani vanhu lavo tala va tiko va wile, va file; na yena Sawulo na Yonatani, n'wana wa yena, va file.”

⁵ Davhida a ku eka jaha leri n'wi vikelaka timhaka teto: “U swi tivisa ku yini leswaku Sawulo u file ni n'wana wa yena Yonatani xana?”

⁶ Kutani jaha leri n'wi vikelaka timhaka ri ku: “A ndzi tshuka ndzi hundza entshaveni ya Gilibowa; kutani waswivo, Sawulo a tiseketela hi tlhari, kutani tigolonyi ni vakhandziyi va tihanci a va n'wi susumeta ngopfu.

⁷ Kavaloko a hundzuka a ndzi vona, a ndzi vita; kutani ndzi ku: ‘Hi mina loyi!’

⁸ A ku eka mina: ‘U mani xana?’ Ndzi hlamula, ndzi ku: ‘Ndzi wa ka Amaleke.’

⁹ Kutani a ku: ‘Tshinela u ndzi dlaya, hikuva ndza titivala, hambi moya wa mina wa ha ri kona hinkwawo eka mina.’

¹⁰ Kavaloko ndzi n'wi tshinelela, ndzi n'wi dlaya, hikuva a ndzi tiva leswaku a nga ka a nga hanyi leswi a weke; kutani ndzi tekile harhi leyi ngi yi ri enhlokweni ya yena, ni sindza ra le vokweni, ndzi swi tisile halenu eka hosi yanga.”

¹¹ Kavaloko Davhida a handzula tinguvu ta yena, ni vanhu hinkwavo va yena va endlisa sweswo;

¹² kutani va rila, va endla nkosi, va titsona swakudya ri ko ri pela, hikwalaho ka Sawulo na Yonatani, n'wana wa yena, ni tiko ra Yehovha, ni yindlu ya Israele, hikuva a va wile hi tlhari.

¹³ Kutani Davhida a vutisa jaha leri n'wi runguleleke timhaka leti, a ku: “U wa ka mani xana?” A hlamula, a ku: “Ndzi n'wana wa muluveri, wa ka Amaleke.”

¹⁴ Davhida a ku eka yena: “A ku chavanga ha yini ku tlakusa voko ehenhla ka muhlawuriwa wa Yehovha ku n'wi dlaya xana?”

¹⁵ Kutani Davhida a vitana un'wana wa vanhu va yena, a ku eka yena: “Tshinela u n'wi dlaya!” Kavaloko a n'wi tlhava, a fa.

¹⁶ Davhida a ku eka yena: “Ngati ya wena yi le nhlokweni ya wena, hikuva nomu wa wena wu ku landzurile, wu te: ‘Hi mina ndzi dlayeke muhlawuriwa wa Yehovha.’ ”

¹⁷ Kavaloko Davhida a endla risimu leri, ehenhla ka Sawulo ni le henhla ka Yonatani, n'wana wa yena, a ku, a ri dyondzisiwe vana va Yuda.

¹⁸ I risimu ra vurha: “Ri tsariwile ebukwini ya La Lulameke:

¹⁹ “Mburhi ya wena Israele, yi tlhaviwile eswitsungeni swa wena! Tinhenha ti wile hi mukhuva wihi xana?

²⁰ Mi nga tshuki mi vikela Gati, Mi nga vuli mahungu emitsendzeleni ya Axikeloni. Vanhwanyana va Vafilista va nga ta tsaka, Vanhwana va vukhuna va nga ti tsakisisa.

²¹ “Tintshava ta Gilibowa! A ku nga vi na mberha ni mpfula ehenhla ka n'wina, A ku nga vi na nsimu ya mihlengo! Hikuva ku cukumetiwe kona switlhangu swa tinhenha. Xitlhangu xa Sawulo, Kukotisa loko ngi xi nga cheriwanga hi mafurha.

²² Vurha bya Yonatani a byi tlhelanga endzhaku Emahlweni ka ngati ya lava tlhaviweke, Emahlweni ka mafurha ya tinhenha; Ni banga ra Sawulo a ri tlhelanga ntsena.

²³ “Sawulo na Yonatani, varhandziwa ni lava tsakisaka evutomini bya vona, A va hambananga eku feni ka vona; A va tlula magama hi ku vevuka, A va tlula tinghala hi matimba.

²⁴ “Vanhwana va Israele! Rilani Sawulo, La mi ambexeke hi xivunguvungu, La bombiseke tinguvu ta n'wina hi nsuku.

²⁵ “Tinhenha ti wile hi ku yini enyimpini? Yonatani u dlayiwe hi ku yini eswitsungeni?

²⁶ “Mbilu yanga yi vavisekela wena Yonatani, makwerhu! A u ndzi tsakisa ngopfungopfu. Rirhandzu ra wena a ri ndzi nandzihela Ku tlula rirhandzu ra vavasati.

²⁷ “Tinhenha ti wile hi ku yini? Matlhari ya tona ma lahlekile hi ku yini?”