1 Yohane 5 - Xitsonga (Bibele)

La rhandzaka Xikwembu u hlayisa milawu ya xona.

¹ Un'wana ni un'wana la pfumelaka leswaku Yesu i Kriste, u tswariwe hi Xikwembu; kutani un'wana ni un'wana la rhandzaka mutswari wa yena, u rhandza ni la tswariweke hi yena.

² Laha hi tivaka leswaku hi rhandza vana va Xikwembu, hi loko hi rhandza Xikwembu, ni loko hi hlayisa ku lerisa ka xona.

³ Hikuva ku rhandza Xikwembu, hi loko hi hlayisa ku lerisa ka xona, kambe ku lerisa ka xona a ku tiki.

⁴ Hikuva hinkwaswo leswi tswariweke hi Xikwembu, swi hlula misava: kutani ku hlula loku hlulaka misava, i ku pfumela ka hina.

⁵ I mani la hlulaka misava, loko a nga ri loyi a pfumelaka leswaku Yesu i N'wana wa Xikwembu?

Vumbhoni lebyi tiyisaka ku pfumela ka hina.

⁶ Yesu Kriste, hi yena la nga ta hi mati ni ngati; ku nga ri hi mati ntsena, kambe hi mati ni ngati; kutani moya, hi yona mbhoni, hikuva Moya i ntiyiso.

⁷ Hikuva timbhoni ti kona, ti nga tinharhu:

⁸ Moya, ni mati, ni ngati; kutani vunharhu lebyi, i xilo xin'we.

⁹ Swi tsandza ni loko hi amukela vumbhoni bya vanhu, vumbhoni bya Xikwembu byi tlula ngopfu; hikuva hi byona vumbhoni bya Xikwembu lebyi xi vuleke N'wana wa xona ha byona.

¹⁰ La pfumelaka eka N'wana wa Xikwembu, u ni vumbhoni eka yena; la nga pfumeriki Xikwembu, u xi endla wa mavunwa; hikuva a nga pfumeri vumbhoni lebyi Xikwembu xi yimeleke N'wana wa xona ha byona.

¹¹ Kutani vumbhoni byebyo, hi lebyi nge: Xikwembu xi hi nyikile vutomi lebyi nga heriki; kutani vutomi byebyo byi le ka N'wana wa xona.

¹² La nga ni N'wana u ni vutomi, la nga riki na N'wana wa Xikwembu, a nga na vutomi.

¹³ Ndzi mi tsalerile timhaka teto, n'wina lava pfumelaka eka vito ra N'wana wa Xikwembu, mi ta tiva leswaku mi ni vutomi lebyi nga heriki.

Ku khongela loku yingisiwaka.

¹⁴ Kutani ku tshemba loku tiyeke loku hi nga na kona ka xona, hileswaku, loko hi kombela lexi rhandziwaka hi xona, xa hi yingisa.

¹⁵ Kutani loko hi tiva leswaku xa hi yingisa loko hi kombela yini na yini ha swi tiva, hikuva hi kumile leswi hi swi kombeleke eka xona.

¹⁶ Kungakuloko munhu a vona makwavo a dyoha hi ku dyoha loku nga yisiki eku feni, a a n'wi khongelele, kutani Xikwembu xi ta n'wi nyika vutomi, loko va nga ri lava dyohaka hi ku dyoha loku yisaka eku feni. Xidyoho xi kona lexi yisaka eku feni, a ndzi vuri leswaku ku khongeleriwa xona.

¹⁷ Ku homboloka hinkwako i xidyoho, kambe xidyoho xi kona lexi nga yisiki eku feni.

¹⁸ Ha swi tiva leswaku un'wana ni un'wana la tswariweke hi Xikwembu a nga dyohi; kambe la tswariweke hi Xikwembu wa tihlayisa, kutani lowo biha a nga n'wi khumbi.

¹⁹ Ha swi tiva leswaku hi va Xikwembu, ni leswaku misava hinkwayo yi tshama eku biheni.

²⁰ Ha swi tiva na swona leswaku N'wana wa Xikwembu u tile, kutani u hi nyikile ku twisisa leswaku hi tiva lowu nga ntiyiso, kutani hi va eka Loyi a nga ntiyiso, eka N'wana wa xona Yesu Kriste. Hi yena loyi xi nga Xikwembu xa ntiyiso, ni vutomi lebyi nga heriki.

²¹ Vana, chavani swifaniso swa swikwembu.