1 Vakorinto 8 - Xitsonga (Bibele)

Tinyama leti tlhaveriweke swifaniso.

¹ Loko swi ri swilo leswi tlhaveriweke swifaniso, ha swi tiva leswaku hinkwerhu hi ni ku tiva. Kambe ku tiva ku ni ku tikukumuxa, kasi rirhandzu ra akisa.

² Loko munhu a ringanisa leswaku u tiva nchumu, a nga si wu tiva hilaha a faneleke ku tiva hakona.

³ Kambe loko munhu a rhandza Xikwembu, u tiviwa hi xona.

⁴ Loko ku ri ku dya leswi tlhaveriweke swifaniso, ha swi tiva leswaku xifaniso a hi nchumu emisaveni, hikuva a ku na xikwembu ximbe loko xi nga ri xin'we ntsena.

⁵ Hikuva, hambi swi ri leswi vuriwaka swikwembu etilweni ni le misaveni, (hikuva swikwembu swi tele, ni tihosi ti tele),

⁶ hambiswiritano, eka hina, ku ni Xikwembu xin'we ntsena, a nga Tatana, xi nga lexi hinkwaswo swi humaka eka xona, na hina hi ri eka xona; kambe hi ni Hosi yi ri yin'we ntsena, a nga Yesu Kriste, loyi Hinkwaswo swi endliweke hi yena, na hina hi tumbuluxiwe hi yena.

⁷ Kambe ku tisa a ku kona eka hinkwavo, hikuva van'wana, ni sweswi, va ha dya leswi tlhaveriweke swifaniso, va ri ni ripfalo, hikuva va ringanisa leswaku swifaniso swi ni mhaka, kutani ripfalo ra vona leri tsaneke ri ni thyaka kwalaho.

⁸ Kambe swakudya a hi swilo leswi hi nga tsakisaka Xikwembu ha swona; hikuva hambiloko hi dya, a hi engeteriwi nchumu; ni loko hi nga dyi, a hi pfumari nchumu.

⁹ Kambe tivoneleni leswaku ku tshunxeka ka n'wina ku nga wisi ehansi lava tsaneke.

¹⁰ Hikuva loko un'wana a ku vona wena la nga ni ku tiva, u tshamisile u dya etempeleni ya swifaniso, xana ripfalo ra la tsaneke ri nga ka ri nga ti tiyisiwi ku dya swilo leswi tlhaveriweke swifaniso xana?

¹¹ Kutani makwenu la tsaneke, loyi Kriste a n'wi feleke, u ta lova hi ku tiva ka wena.

¹² Kutani loko mi dyohela vamakwenu hi sweswo, mi tlhava ripfalo ra lava tsaneke, mi dyohela na yena Kriste.

¹³ Hikwalaho-ke, loko swakudya leswi, swi wisa makwerhu ndzi nga ka ndzi nga ha tshami ndzi dya nyama, ni siku ni rin'we, ndzi nga ti tshuka ndzi wisa makwerhu.