1 Vakorinto 12 - Xitsonga (Bibele)

Tinyiko ta Moya.

¹ Loko ti ri tinyiko ta Moya, vamakwerhu, a ndzi rhandzi leswaku mi kohla ha nchumu.

² Ma swi tiva leswaku a mi ri vamatiko lava nga kokeriwa eka swifaniso leswi nga vulavuriki, hilaha mi nga kokiwa hakona.

³ Hikwalaho ndzi mi ti visaka leswaku a ku na munhu la vulavulaka hi Moya wa Xikwembu, a ku: “Yesu i anathema.” Na swona a ku na munhu la nga tivaka ku vula a ku: “Yesu i Hosi,” loko ku nga ri hi Moya lowo Kwetsima.

⁴ Tinyiko, tona, ti avene, Moya, wona, i wun'we.

⁵ Mitirho, na yona, yi avene; kambe Hosi, i yin'we ntsena;

⁶ ni maendlelo ma avene, kambe Xikwembu, i xin'we ntsena lexi tirhaka hinkwaswo eka hinkwavo.

⁷ Kutani un'wana ni un'wana u nyikiwa ku vona Moya, leswaku swi pfuna hinkwavo.

⁸ Hikuva un'wana u nyikiwa hi Moya marito ya vutlhari; un'wana u nyikiwa marito ya ku tiva hi Moya wolowo;

⁹ un'wana u nyikiwa ku pfumela hi wona Moya wolowo; un'wana u nyikiwa hi Moya wolowo matimba ya ku hanyisa;

¹⁰ un'wana u nyikiwa mitirho ya masingita; un'wana u nyikiwa ku profeta; un'wana ku avanyisa mimoya; un'wana u nyikiwa ku tiva tinxaka ta tindzimi; un'wana u nyikiwa ku hlamusela tindzimi.

¹¹ Kambe Moya wolowo wu ri wun'we wu tirha leswo hinkwaswo, wu ri karhi wu avela un'wana ni un'wana hi laha wu rhandzaka hakona.

¹² Hikuva kukota loko miri lowu nga wun'we, wu ri ni swirho leswo tala; kutani swirho hinkwaswo i swa miri wun'we, hambi swi tele, wu ri miri wun'we ntsena, swi tano ni le ka Kriste.

¹³ Hikuva hinkwerhu hi khuvuleriwe eMoyeni wu ri wun'we, leswaku hi ta endla miri wun'we: hambi va ri Vayuda hambi va ri Vagriki, hambi va ri lava fuyiweke, hambi va ri lava nga fuyiwangiki; kutani hinkwerhu hi nwile eka Moya wu ri wun'we.

¹⁴ Kunene miri a hi xirho xin'we ntsena, kambe i swirho leswo tala.

¹⁵ Loko ngi nenge wu ri: “Leswi ndzi nga riki voko, a ndzi wa miri;” xana a hi wa miri xana?

¹⁶ Ni loko ndleve yi ku: “Leswi ndzi nga riki tihlo, a ndzi wa miri”; xana a hi ya miri xana?

¹⁷ Loko ngi miri hinkwawo wu va tihlo, ku yingisa ku nga va kwihi-ke? Loko miri hinkwawo wu le ku yingiseni, ku twa ka tinhompfu ku nga va kwihi-ke?

¹⁸ Kutani sweswi Xikwembu xi veke xirho xin'wana ni xin'wana emirini, hilaha xi rhandzeke hakona.

¹⁹ Kutani loko ngi swirho hinkwaswo, i xin'we ntsena, miri wu ta va kwihi-ke?

²⁰ Kambe sweswi swirho swi tele, miri, wona, i wun'we.

²¹ Tihlo ri nga ka ri nga vuli ka voko, ri ku: “A ndzi vuri nchumu ha wena”; kambe nhloko yi nga ka yi nga vuri ka milenge: “A ndzi vuri nchumu ha n'wina.”

²² E-e; kambe swirho swa miri leswi ngi swi tlurisa hi ku tsana ka swona, hi leswi pfumariwaka ngopfu.

²³ Kutani swirho leswi hi ringanisaka leswaku a swi na ku chaviwa emirini, hi swona leswi hi swi funengetaka hi xichavo; kutani swirho swa hina leswi nga ni tingana, hi swona leswi nga ni xichavo lexi khorwisaka;

²⁴ hikuva swirho swa hina leswo saseka a swi lavi ku bombisiwa. Kambe Xikwembu xi hlanganisile miri hi sweswo, ku nyika xichavo ku tlurisiswa eka leswi pfumalaka xona;

²⁵ leswaku ku hambana ku nga ti tshuka ku va emirini, kambe swirho swi tsetselelana.

²⁶ Kutani xirho xin'wana, loko xi twa ku vava, swirho hinkwaswo swi twa ku vava na swona; ni loko xirho xin'wana xi dzunisiwa, swirho hinkwaswo swa tsaka na swona.

²⁷ Loko mi ri n'wina mi miri wa Kriste; un'wana ni un'wana mi swirho swa yena.

²⁸ Kutani valavo Xikwembu xi va vekeke eKerekeni, eku sunguleni i vaapostola; va vumbirhi i vaprofeta; va vunharhu i vafundhisi; kutani ku vekiwe va masingita, ni tinyiko leti hanyisaka, ni mitirho ya ku pfuna swisiwana, ni ku fambisa, ni tinxaka ta tindzimi.

²⁹ Xana hinkwavo i vaapostola-ke? Xana hinkwavo i vaprofeta-ke? Xana hinkwavo i vafundhisi-ke? Xana hinkwavo i va masingita-ke?

³⁰ Xana hinkwavo va ni ku nyika ka ku hanyisa-ke? Xana hinkwavo va vulavula tindzimi-ke? Xana hinkwavo va hundzula tindzimi-ke?

³¹ Chivirikelani tinyiko leti tlurisaka hi ku saseka; kambe ndzi ta mi komba ndlela leyo saseka ku tlurisisa.