1 Vakorinto 11 - Xitsonga (Bibele)

Mikhuva leyi lulamelaka vavasati etinhlengeletanweni.

¹ Mi va vaetisi va mina, kukota leswi na mina ndzi nga wa Kriste.

² Ndza mi khensa, vamakwerhu, hikuva mi ndzi tsundzuka eka hinkwaswo, na swona mi hlayisa tidyondzo hi laha ndzi mi nyikeke tona hakona.

³ Kambe ndzi rhandza loko mi swi tiva leswaku nhloko ya wanuna un'wana ni un'wana i Kriste; kutani nhloko ya wansati i nuna, kutani nhloko ya Kriste, i Xikwembu.

⁴ Wanuna un'wana ni un'wana la khongelaka, kumbe ku profeta, a funengerile nhloko, u tixumbadza nhloko ya yena.

⁵ Kambe wansati un'wana ni un'wana la khongelaka, hambi ku profeta, a nga funengelanga nhloko, u tixumbadza nhloko ya yena, hikuva swi fana ni loko a byewula.

⁶ Hikuva loko wansati a nga funengeli nhloko, u fanele ku tsemela misisi. Kambe loko swi ri ni tingana eka wansati ku tsemeleriwa, kumbe ku byewuriwa, a a funengete nhloko kwalaho.

⁷ Loko a ri wanuna, yena a nga faneli ku funengela nhloko, hikuva i xifaniso ni ku kwetsima ka Xikwembu; kasi wansati, i ku kwetsima ka wanuna.

⁸ Hikuva wanuna a nga humesiwanga eka wansati kambe i wansati la humesiweke ka wanuna;

⁹ kambe wanuna a nga vumberiwanga wansati; kambe i wansati la vumberiweke wanuna.

¹⁰ Hikwalaho, wansati u fanele ku va ni mfungho wa ku fumiwa enhlokweni hikwalaho ka tintsumi.

¹¹ Hambiswiritano, wanuna a nga le handle ka wansati, ni wansati a nga le handle ka wanuna eHosini.

¹² Hikuva kukota leswi wansati a nga humesiwa eka wanuna, na yena wanuna u velekiwa hi wansati, kutani hinkwaswo swi huma eka Xikwembu.

¹³ Na n'wina, mi nga avanyisa leswaku xana swa fanela leswaku wansati a khongela Xikwembu a nga funengelanga nhloko xana?

¹⁴ A ndzi ku, na wona ntumbuluko wu mi dyondzisa leswaku loko wanuna a kurisa misisi ya yena swi ni tingana eka yena;

¹⁵ kasi wansati loko a ri ni misisi yo leha, i ku kwetsima ka yena, hikuva u nyikiwile misisi ku va xisirhelelo.

¹⁶ Kambe loko munhu a rhandza ku kaneta, hina a hi na mukhuva wolowo, na tona tikereke ta Xikwembu a ti na wona.

Mikhuva leyi nga lulameriki tinhlengeletano ni xilalelo xa Hosi.

¹⁷ Kutani leswi ndzi swi vulaka, ntsena ndzi nga swi khensi, hi leswi: Loko mi hlengeletana, a hi ku tilavela vunene, kambe i ku tibihisa.

¹⁸ Hikuva eku sunguleni, loko mi hlengeletana ekerekeni, ndzi twa leswaku ku hambana ku kona eka n'wina; kambe, tlhelo rin'wana, ndzi pfumela leswaku swi tano;

¹⁹ hikuva ku hambana ku fanele ku va kona exikarhi ka n'wina, leswaku ku ta vonaka lava nga va xiviri eka n'wina.

²⁰ Kambe loko mi hlengeletana swin'we, a hi ku dya xilalelo xa Hosi;

²¹ hikuva loko mi dya, un'wana ni un'wana a sungula ku titekela xilalelo xa yena, kutani un'wana a twa ndlala, kasi un'wana u xurhile.

²² Xana a mi na tindlu ta ku dyela ni ta ku nwela kona xana? Kumbe mi sandza Kereke ya Xikwembu, kumbe mi khomisa lava nga riki na nchumu tingana xana? Ndzi to yini eka n'wina? Ndzi ta mi khensa xana? E-e, eka sweswo a ndzi mi khensi.

²³ Hikuva, na mina, ndzi amukerile eka Hosi, leswi ndzi mi byeleke swona; leswaku Hosi Yesu, hi vusiku lebyi a nyiketiweke ha byona, u teke xinkwa;

²⁴ kuteloko a khensile, a phema a ku: “Tekani mi dya; wona i miri wanga, lowu phemeriweke n'wina; endlisani sweswo mi ndzi anakanya ha swona.”

²⁵ Hi mukhuva wolowo, a teka xinwelo, loko va lalerile, a ku: “Xinwelo lexi, i ntwanano lowuntshwa engatini ya mina; endlisani sweswo hi masiku hinkwawo loko mi nwa; mi ta ndzi anakanya ha swona.”

²⁶ Hi masiku hinkwawo loko mi dya xinkwa lexi, ni loko mi nwela exinwelweni lexi, mi ta va mi vula rifu ra Hosi, a kondza a fika.

²⁷ Hikwalaho-ke, mani na mani la dyaka xinkwa lexi, kumbe la nwelaka exinwelweni xa Hosi hi mukhuva lowu nga faneriki, u ta va ni nandzu wa miri ni wa ngati ya Hosi.

²⁸ Munhu un'wana ni un'wana a a tikambele hakona, ku va kona a nga ta dya xinkwa lexi, a nwela exinwelweni lexi;

²⁹ hikuva la dyaka ni la nwaka hi mukhuva lowu nga faneriki, u dya ni ku nwa ku avanyisiwa ka yena; hikuva a nga tsundzukangi miri wa Hosi.

³⁰ Hikwalaho ku nga ni lavo tala lava nga tsakiki emirini ni lava vabyaka exikarhi ka n'wina, van'wana kambe va file.

³¹ Hikuva loko ngi ha tiavanyisa, a hi nga ti avanyisiwa;

³² kambe loko hi avanyisiwa, hi layiwa hi Hosi leswaku hi nga tshuki hi biwa kun'we ni misava.

³³ Loko swi ri tano, vamakwerhu, loko mi hlengeletana ku ta dya, yimelanani,

³⁴ kutakuloko un'wana a ri ni ndlala, a a dye ekaya, mi nga ti tshuka mi hlengeletelana eku avanyisiweni. Loko ti ri tin'wanyana, tona, ndzi ta ti lunghisa loko ndzi fikile.