1 Timotiya 3 - Xitsonga (Bibele)

Varisi va Kereke.

¹ Rito leri ri tiyile, leri nge: Munhu loko a tinavelela vurisi, u navela ntirho lowo saseka.

² Kambe swi fanele leswaku murisi a pfumala xisandzu, a va nuna wa nsati un'we, a va ni ku hiteka, ni ku tlhariha, ni mafundza, a rhandza ku amukela vaendzi, a tiva ku dyondzisa,

³ a nga vi munhu la tinyiketaka vhinyo ni la lwaka, kambe a a ve munhu wa musa, la nga rhandziki timholovo, la nga naveriki mali,

⁴ la fumaka yindlu ya yena swinene, la hlayisaka vana va yena eku yingiseni hi xichavo hinkwaxo,

⁵ hikuva loko munhu a nga tivi ku fuma yindlu ya yena, a nga risisa ku yini Kereke ya Xikwembu?

⁶ Kambe a nga tshuki a va mupfumeri lontshwa, a nga ti tshuka a tikurisa, kutani a wela eku avanyiseni ka Diyavulosi.

⁷ Swi fanele na kona leswaku a va ni vumbhoni lebyinene, lebyi humaka eka lava nga ehandle, leswaku a nga weli eku rhukiweni ni le ntlhan'wini wa Diyavulosi.

Vadiyakoni (Vatirheri va Kereke).

⁸ Na vona vadiyakoni, va ve vanhu lava fundzhekaka, va nga tshuki va va ni tindzimi timbirhi, va nga tinyiketi evhinyweni hi ku tlurisa, va nga tshuki va bindzula hi ku kanganyisa;

⁹ va hlayisa xihundla xa ku pfumela hi ripfalo leri tengeke.

¹⁰ Na vona va fanele ku kamberiwa eku sunguleni, kutani va ta vekiwa vadiyakoni, loko va nga ri na xisandzu.

¹¹ Na vona vasati va vona va ve lava fundzhekaka, va nga vi valumbeti, kambe va va ni ku hiteka, ni ku tshembeka eka hinkwaswo.

¹² Kambe vadiyakoni a va ve ni nsati un'we, va va lava fumaka vana va vona ni tindlu ta vona swinene.

¹³ Hikuva lava tirheleke Kereke swinene va kuma vutshamo lebyinene, ni ku tiya lokukulu eku pfumeleni loku nga eka Yesu Kriste.

Xihundla xa vukhongeri.

¹⁴ Ndzi ku tsalele timhaka leti, hambi ndzi tshembile leswaku ndzi ta hatlisa ndzi ta eka wena;

¹⁵ hambi ndzi nga hlwela, u ta tiva hilaha swi faneleke ku endliwa hakona endlwini ya Xikwembu lexi hanyaka, yi nga mhandze, ni masungulo ya ntiyiso.

¹⁶ Kunene xihundla xa vukhongeri hi lexikulu: Xikwembu xi tivonakisile enyameni, xi kumiwe xi lulamile eMoyeni, xi voniwile hi tintsumi, xi vuriwile ematikweni, xi pfumeriwile emisaveni, xi tlakusiwile eku kwetsimeni.