1 TIKRONIKA 4 - Xitsonga (Bibele)

Rixaka ra Yuda ni ra Simiyoni.

¹ Vana va xinuna va Yuda: Perese, Hesironi, Karimi, Huru, Xobala.

² Reyaya, n'wana Xobala a veleka Yahata; Yahata a veleka Ahumayi na Lahada. Hi tona tinyimba ta va Sora.

³ Hi vona vana va xinuna va Etamu: Yizriele, Ixima, Yidibaxa; vito ra makwavo wa vona wa wansati a a ri Haseleli-Poni.

⁴ Penuwele a a ri tata wa Gedori, na Ezere a a ri tata wa Huxa. Hi vona vana va xinuna va Huru, mativula ya Efrata, tata wa Betlehema.

⁵ Axuru, tata wa Tekowa, a a ri ni vasati vambirhi: Hela na Naara.

⁶ Naara a n'wi velekela Ahuzama, na Hefere, na Temeni na Ahaxitari. Hi vona vana va xinuna va Naara.

⁷ Vana va xinuna va Hela: Sereta, Yisihara na Etinana.

⁸ Hakosi a veleka Anuba na Sobeba, ni tinyimba ta Aharele, n'wana Harumu.

⁹ Yabese a dzunisiwa ku tlurisa vamakwavo; mana wa yena a n'wi thya Yabese (ntirho), a ku: “Ndzi n'wi velekile hi ku vaviseka.”

¹⁰ Yabese a khongela Xikwembu xa Israele, a ku: “Ingi loko u ndzi katekisa, loko u tshineta mindzilekana ya mina, ingi loko voko ra wena ri va na mina, loko u ndzi sirhelela eka leswo biha, leswaku ndzi nga tshuki ndzi twa ku vaviseka!” Kutani Xikwembu xi n'wi nyika leswi a swi kombeleke.

¹¹ Kelubi, makwa Xuwa, a veleka Mehiri la nga tata wa Exitoni.

¹² Exitoni a veleka Beta-Rhafa na Paseyaka na Tehina, tata wa muti wa Iri-Nahaxa. Hi vona vanhu va Rheka.

¹³ Vana va xinuna va Kenazi: Otiniele na Seraya. N'wana Otiniele: Hatati.

¹⁴ Meonotayi a veleka Ofira. Seraya a veleka Yowabu tata wa nkova wa vavatli; hikuva a va ri vavatli.

¹⁵ Vana va xinuna va Kalebe, n'wana Yefune: Iru, Ela na Naama, ni vana va Ela, na Kenazi.

¹⁶ Vana va xinuna va Yehaleleli: Zifi, Zifa, Tiriya na Asarele.

¹⁷ Vana va xinuna va Ezra: Yetere, Merede, Efere, na Yaloni. Hi vona vana va xinuna va Bitiya, n'wana Faro, la nga tekiwa hi Merede: a veleka Meriyamu, na Xamayi, na Yixibaka, tata wa Exitemoka.

¹⁸ Nsati wa yena wa Muyuda, a veleka Yarede, tata wa Gedori, na Hebere; tata wa Soko, na Yekutiele, tata wa Zanowaka.

¹⁹ Vana va xinuna va nsati wa Hodiya, makwa Nahamu: tata wa Keyila, Mugarimi, na Exitemoka, wa Maaka.

²⁰ Vana va xinuna va Ximoni: Aminoni na Rhina, Beni-Hanani na Tiloni. Vana va xinuna va Yixi: Zohete na Beni-Zohete.

²¹ Vana va xinuna va Xela, n'wana Yuda: Ere, tata wa Leka, na Layada, tata wa Marexa, ni tinyimba ta yindlu laha va tirhaka, wa yindlu ya Axabeya,

²² na Yokimi, ni vanhu va Kozeba, na Yowasi, na Sarafu, lava fumeke etikweni ra Mowabu na Yaxubi-Lehema. Hi tona timhaka ta khale.

²³ A va ri vavumbi lava akeke eNetayimi ni le Gedera; va akile kona ni hosi ku yi tirhela.

²⁴ Vana va xinuna va Simiyoni: Nemuwele, Yamini, Yaribi, Zera Xawulu.

²⁵ Xalumi, n'wana Xawulu; Mibisama, n'wanakwe; Mixima, n'wanakwe.

²⁶ N'wana Mixima: Hamuwele, n'wanakwe; Zakuru, n'wanakwe; Ximeyi, n'wanakwe.

²⁷ Ximeyi a va ni vana va xinuna va 16, ni vanhwanyana va 6; kambe vamakwavo a va kumanga vana va xinuna lavo tala; ni tindlu ta vona hinkwato a ti andzangi kukotisa vana va Yuda.

²⁸ A va akile Berexeba na Molada, na Hasari-Xuwala,

²⁹ na Biliha, na Esemu, na Tolada,

³⁰ na Betuwele, na Horma, na Sikilaga,

³¹ na Beta-Marikaboto, na Hasari-Susimi, na Beta-Biri, na Xaarayimi. Hi yona miti ya vona ku fika enkarhini wa ku fuma ka Davhida;

³² mitinyana ya vona a ku ri Etamu, na Ayini, na Rimoni, na Tokene, na Axani, miti ya ntlhanu,

³³ ni swimitana hinkwaswo swa vona leswi ngi swi ri ekusuhi ni miti leyi, ku fika eBaali. Hi byona vuako bya vona ni mavito ya rixaka ra vona.

³⁴ Mexobaba, na Yamileke, na Yoxa, vana va xinuna va Amasiya;

³⁵ Yuwele na Yehu, vana va xinuna va Yoxibiya, n'wana Seraya, n'wana Asiele;

³⁶ Eli-Howenayi, Yaakoba, Yexohaya, Asaya, Adiele, Yesimiele, Benaya,

³⁷ na Ziza, vana va xinuna va Xifi, n'wana Aloni, n'wana Yedaya, n'wana Ximri, n'wana Xemaya.

³⁸ Valavo, lava tsariweke hi mavito ya vona, a ti ri tihosana etinyimbeni ta vona, tindlu ta vatata wa vona ti andzile ngopfu.

³⁹ Va ya etlhelo ra Gedori ku fika etlhelo ra vuxa ra nkova, ku lava byanyi bya mitlhambi ya vona.

⁴⁰ Va kuma vudyelo lebyi noneke lebyinene, ni tiko lerikulu ematlhelweni hinkwawo, tiko ro rhula leri etleleke, hikuva lava akeke kona eku sunguleni a va ri va rixaka ra Hamu.

⁴¹ Enkarhini wa Hezekiya, hosi ya Yuda, vavanuna lava tsariweke hi mavito ya vona va ta, va hlasela mitsonga ya kona, ni Vamehuni, lava akeke kona, va va heta, va va endla anathema ku fika namuntlha; kutani va aka ematshan'weni ya vona, hikuva vudyelo bya mitlhambi ya vona a byi ri kona.

⁴² Van'wana va vona va vana va Simiyoni, va ta entshaveni ya Seyira, va ri ntlhanu wa madzana; va fambisiwa hi Pelatiya, na Neyariya, na Refaya, na Uziele, n'wana Yixi;

⁴³ kutani va hlula lava seleke Vaamaleke lava poneke va aka kona ku fika namuntlha.