1 TIKRONIKA 23 - Xitsonga (Bibele)

Ta Valevhi: ntsengo wa vona ni mitirho ya vona.

¹ Davhida, kuteloko a dyuhele, a taleriwe hi masiku, a veka Solomoni, n'wana wa yena, hosi ya Israele.

² A hlengeleta tihosana hinkwato ta Israele, ni vaprista, ni Valevhi.

³ Kutani ku hlayiwa Valevhi, ku sungula hi va malembe ya makume manharhu, ni le henhla ka wona; ntsengo wa vona, hi tinhloko ta vona, a va ri vavanuna va 38 000.

⁴ Kutani Davhida a ku: “Va 24 000 a va langutele ntirho wa yindlu ya Yehovha; va 6 000 a va ve etihubyeni ni vaavanyisi,

⁵ va 4 000 a va ve valanguteri va tinyangwa, ni va 4 000 a va dzunise Yehovha hi timbila leti ndzi ti endleke ku n'wi dzunisa.”

⁶ Davhida a va avanyisa hi mitlawa hi tinyimba ta vana va Levhi, Gerixoni, Kohata na Merari.

⁷ Va Gerixoni: Ladani na Ximeyi.

⁸ Vana va Ladani: hosana Yeyiele, na Zetamu, na Yuwele, vanharhu.

⁹ Vana va Ximeyi: Xelomoto, na Haziele, na Harana, vanharhu; hi tona tihosana ta tindlu ta Ladani.

¹⁰ Vana va Ximeyi: Yahata, na Zina na Yewuxi, na Beriya; hi vona vana va Ximeyi, mune.

¹¹ Yahata a a ri hosana, na Zina wa vumbirhi; loko a ri Yewuxi na Beriya, a va kumanga vana va vavanuna lavo tala, va endla yindlu yin'we ntsena ya vatatana entsengweni.

¹² Vana va Kohata: Amirama, Yisihara, Hebroni, Uziele, mune.

¹³ Vana va Amirama: Aroni na Muxe. Aroni a hlayiwa hitlhelo leswaku a hlawuriwa, a va loyi a kwetsimisiweke ngopfu, yena ni vana va yena hi masiku, ku humesa mirhi ya risuna emahlweni ka Yehovha, ku n'wi tirhela ni ku katekisa tiko hi vito ra yena hi masiku.

¹⁴ Loko a ri Muxe, munhu wa Xikwembu, vana va yena va hlayiwile enyimbeni ya Levhi.

¹⁵ Vana va Muxe: Gerixomu na Eliezere.

¹⁶ Vana va Gerixomu: Xebuwele, hosana.

¹⁷ Vana va Eliezere, a a ri Rehabiya hosana. Eliezere a nga vanga na vana va vavanuna van'wana, kambe vana va Rehabiya a va ri lavo tala ngopfu.

¹⁸ Vana va Yisihara Xelomiti, hosana.

¹⁹ Vana va Hebroni: Yeriya, hosana; Amariya, wa vumbirhi, Yahaziele, wa vunharhu, Yekameyamu, wa vumune.

²⁰ Vana va Uziele: Mika, hosana, na Yixiya, wa vumbirhi.

²¹ Vana va Merari: Maheli na Muxi. Vana va Maheli: Eliyazara na Kixi.

²² Eliyazara, loko a fa, a nga vanga na vana va xinuna, kambe a a ri ni vanhwanyana lava tekiweke hi vana va Kixi, vamakwavo.

²³ Vana va Muxi: Maheli na Edere, na Yeremoto, vanharhu.

²⁴ Hi vona vana va xinuna Valevhi, hi tindlu ta vatata wa vona, ti ri tihosana ta tindlu ta vatatana, hilaha va tsariweke hakona loko va hlaya mavito ya vona hi tinhloko. A va tirha ntirho wa yindlu ya Yehovha, ku sungula hi va malembe ya makume mambirhi, ni le henhla ka wona. Hikuva Davhida a a ku:

²⁵ “Yehovha, Xikwembu xa Israele, u nyikile tiko ra yena ku wisa kutani u ta aka eYerusalema, hi masiku.

²⁶ Sweswo vana va Levhi va nga ha rhwali Tabernakela ni swigotso hinkwaswo swa ntirho wa yona.”

²⁷ Ku hlayiwa ka vana va xinuna Valevhi, ku sungula hi va malembe ya makume mambirhi, ni le henhla ka wona, ku endliwile hi ku lerisa ka ku hetelela ka Davhida.

²⁸ “Hikuva va vekiwile ekusuhi ni vana va Aroni ku tirha ntirho wa yindlu ya Yehovha a va ri valanguteri va swivava ni makamara; va basisa swilo hinkwaswo leswi hlawuriweke va tirha ntirho wa yindlu ya Xikwembu;

²⁹ va hlayisa swinkwa leswi vekiwaka emahlweni ka Xikwembu, ni mapa layo saseka ya tinyiko, ni swimbhundzwana leswi nga riki na comela, ni leswi katingiweke ni leswi oxiweke; ni mimpimo hinkwayo ya leswi chuluriwaka, ni ya leswo leha;

³⁰ ehandle ka swona, a va fanela ku yima emahlweni ka Xikwembu siku rin'wana ni rin'wana, nimixo ni madyambu, ku vonga ni ku dzunisa Yehovha;

³¹ va fanele ku humesela Yehovha tiholokosta hinkwato, hi Tisavata, ni le mikarhini ya n'weti leyintshwa, ni ya tinhlengeletano hi ntsengo wa tona, hilaha ku lerisiweke hakona, hi mikarhi hinkwayo emahlweni ka Yehovha.

³² Va fanele ku hlayisa Tabernakela ya nhlengeletano, ni vukwetsimelo, ni ku pfuna vana va Aroni, vamakwavo, entirhweni wa Yindlu va Yehovha.”