1 TIKRONIKA 19 - Xitsonga (Bibele)

Ta ku sandziwa ka malandza ya Davhida hi hosi ya Vaamoni.

¹ Endzhaku ka sweswo Nahaxi hosi ya vana Vaamoni, a fa, kutani n'wana wa yena a fuma ematshan'weni ya yena.

² Davhida a ku: “Ndzi ta endla hi tintswalo na Hanunu, n'wana Nahaxi, hilaha tata wa yena a ndzi endleleke tintswalo.” Kutani Davhida a rhuma tintsumi ku n'wi chavelela hikwalaho ka tata wa yena. Kavaloko malandza ya Davhida ma ta etikweni ra vana Vaamoni, eka Hanunu ku n'wi chavelela.

³ Tindhuna ta vana va Amoni ti ku eka Hanunu: “Xana wa ehleketa leswaku Davhida u ku rhumele vachaveleri ku dzunisa tata wa wena-ke? A hi ku hlola muti ni ku wu mbundzuxa, ni ku kamba tiko leswi malandza ya yena ma teke eka wena xana?”

⁴ Kavaloko Hanunu a khoma malandza ya Davhida a ma byewula, a tsema tinguvu ta vona hi le xikarhi ku fika eswifungheni, kutani a va tlherisa.

⁵ Va ta tivisa Davhida mhaka ya vanhu lava kutani a rhuma vanhu ku ya hlangana na vona, hikuva vavanuna lava, a va ri ni tingana ngopfu; hosi yi ku eka vona: “Tshamani eYeriko, malebvu ya n'wina ma ko ma mila, kutani mi ta vuya.”

Ta ku lwa ni Vaamoni.

⁶ Vana va Amoni va vona leswaku va pfukile Davhida, kutani Hanunu ni vana va Amoni va rhumela Vasiriya va Mesopotamiya ni va Aramu-Maaka ni va Soba, titalenta ta silivhere ta 1 000 ku rhamba kona tigolonyi ni vakhandziyi va tihanci.

⁷ Va rhamba tigolonyi ta 32 000 ni hosi ya Maaka, ni tiko ra yena, kutani va ta, va gova emahlweni ka Medeba; vana va Amoni va huma emitini ya vona, va hlengeletana ku ta lwa.

⁸ Davhida, kuteloko a swi twile, a rhuma Yowabu ni nyimpi hinkwayo, ni tinhenha.

⁹ Vana Vaamoni va huma nyimpi enyangweni ya muti, kambe tihosi leti teke ku va pfuna, a ti ri etlhelweni, erivaleni.

¹⁰ Yowabu a vona leswaku a ti ri tinyimpi timbirhi, yin'wana emahlweni, yin'wana endzhaku ka yena; kutani a hlawula vavanuna lava tiyeke exikarhi ka Vaisraele hinkwavo, a va rhuma ku lwa ni Vasiriya,

¹¹ kutani a veka lava seleke va tiko emavokweni ya makwavo Abixayi, va tilunghisela ku lwa ni vana va Amoni.

¹² A ku eka yena: “Kungakuloko Vasiriya va ndzi hlula, u ta ta ndzi pfuna, kambe loko Vaamoni va ku hlula, ndzi ta ku pfuna.

¹³ Tiyani timbilu! A hi tiyeleni tiko ra hina ni miti ya Xikwembu xa hina, Yehovha u ta endla leswi lulameke emahlweni ka yena!”

¹⁴ Kavaloko Yowabu ni tiko leri ngi ri ri na yena, va famba emahlweni ku ya pfuka Vasiriya, kutani vona va tsutsuma emahlweni ka yena.

¹⁵ Vana va Amoni, kuteloko va vonile leswaku Vasiriya va tsutsumile emahlweni ka Yowabu, na vona va tsutsuma emahlweni ka makwavo Abixayi, va tlhela va nghena emutini. Kutani Yowabu a tlhelela eYerusalema.

¹⁶ Vasiriya, kuteloko va vonile leswaku va hluriwile hi Vaisraele, va rhuma tintsumi, va vitana Vasiriya lava nga ehase ka nambu; Xopaki, ndhuna ya nyimpi ya Hadadi-Esere, a a ri mufambisi wa vona.

¹⁷ Davhida a tivisiwa mhaka leyi, kutani a hlengeleta Vaisraele hinkwavo, a pela Yordani, a ya eka vona, a tilunghisa ku lwa na vona. Davhida a huma nyimpi, a ya hlangana ni Vasiriya, kutani va lwa na yena.

¹⁸ Kambe Vasiriya va baleka emahlweni ka Vaisraele, kutani Davhida a dlayela Vasiriya tihanci ta tigolonyi ta 1 000, ni vavanuna lava fambaka hi milenge va 40 000; a dlaya na Xopaki, ndhuna ya nyimpi ya vona.

¹⁹ Malandza ya Hadadi-Esere kuteloko ma vonile leswaku ma hluriwa hi Vaisraele ma kombela ku rhula eka Davhida, kutani ma fumiwa hi yena. Kutani Vasiriya a va ha rhandzangi ku pfuna vana va Amoni.