1 TIKRONIKA 14 - Xitsonga (Bibele)

Ta Davhida loko a hlula Vafilista.

¹ Hiramu, hosi ya Tiri, a rhumela Davhida tintsumi ni mirhi ya kedari ni vavatli va maribye, ni vaaki, ku n'wi akela yindlu.

² Kutani Davhida a tiva leswaku Yehovha u tiyisile vuhosi bya yena ehenhla ka Israele, ni leswaku vuhosi bya yena byi tlakukile hikwalaho ka tiko ra yena ra Israele.

³ Davhida a engeta a teka vasati eYerusalema, a engeta a veleka vana va xinuna ni va xisati.

⁴ Hi wona mavito ya vana lava velekeriweke yena eYerusalema: Xamuwa, na Xobabu, Natani na Solomoni,

⁵ na Yibehari, na Elixuwa, na Elipalete,

⁶ na Noga, na Nefege, na Yafiya,

⁷ na Elixama, na Beliada, na Elifelete.

⁸ Vafilista, kuteloko va swi twile leswaku Davhida u cheriwile mafurha ku va hosi ya Vaisraele hinkwavo, Vafilista hinkwavo va tlhandluka ku lava Davhida. Davhida a swi twa, kutani a humela emahlweni ka vona.

⁹ Vafilista va ta, va phalala enkoveni wa Varefayimi.

¹⁰ Kutani Davhida a vutisa Yehovha, a ku: “Xana ndzi ta tlhandluka ku ya lwa ni Vafilista; xana u ta va nyiketa emavokweni ya mina-ke?” Yehovha a n'wi hlamula, a ku: “Tlhandluka, ndzi ta va nyiketa emavokweni ya wena.”

¹¹ Kavaloko va tlhandlukela eBaala-Perasimi, Davhida a va hlula kona; kutani Davhida a ku: “Xikwembu xi hangalasile valala va mina hi voko ra mina kukotisa mati lama khulukelaka.” Hikwalaho va thyile ndhawu leyi vito ra Baala-Perasini.

¹² Va tshika swikwembu swa vona kona, kutani Davhida a va lerisa ku swi hisa hi ndzilo.

¹³ Vafilista va engeta, va ta va phalala enkoveni.

¹⁴ Kutani Davhida a vutisa kambe Xikwembu, kutani Xikwembu xi ku eka yena: “U nga ka u nga tlhandluki ndzhaku ka vona; kambe u va fularhela, u ta ya va kuma etlhelo ra mirhibeila.

¹⁵ Kungakuloko u twa swigingi eswicapilweni swa mirhibeila, hi kona u nga ta huma ku ya eku lweni, hikuva Xikwembu xi ta va xi humile emahlweni ka wena ku lwa ni nyimpi ya Vafilista.”

¹⁶ Davhida a endla hi laha Xikwembu xi n'wi leriseke hakona, kutani va lwa ni nyimpi ya Vafilista ku suka eGibiyoni ku fika eGezere, va yi hlula.

¹⁷ Kutani ku twala ka Davhida ku hangalaka ematikweni hinkwawo, Yehovha a chavisa matiko hinkwawo hi vito ra Davhida.