1 TIHOSI 17 - Xitsonga (Bibele)

Ta muprofeta Eliya loko a phameriwa hi mawukuwuku.

¹ Kutani Eliya, wa Tixibe, munhu wa tiko ra Giliyadi, a ku eka Akabu: “Yehovha, Xikwembu xa Israele, loyi ndzi yimaka emahlweni ka yena, wa hanya! Malembe lawa ku nga ka ku nga vi na mpfula ni mberha, loko ku nga ri hi rito ra mina.”

² Kutani rito ra Yehovha ri ya eka Eliya, ri ku:

³ “Suka u famba etlhelo ra vuxa, u ya tumbela exinambyaneni xa Keriti lexi nga emahlweni ka Yordani.

⁴ U ta nwa mati ya xinambyana; ndzi lerisile mawukuwuku ku ku phamela kona.”

⁵ Kavaloko a famba, a endla hilaha Yehovha a n'wi byeleke hakona: a ya tshama exinambyaneni xa Keriti lexi nga emahlweni ka Yordani.

⁶ Kutani mawukuwuku ma n'wi tisela vuswa ni nyama nimixo, ni vuswa ni nyama nimadyambu, a ri karhi a nwa mati ya xinambyana.

Eliya a tshama eSarepta.

⁷ Loko ku hundze masiku, xinambyana xi phya, hikuva mpfula a yi nga nanga emisaveni.

⁸ Kutani Yehovha a ku eka Eliya:

⁹ “Pfuka, u ya eSarepta wa Sidoni, u tshama kona: Waswivo, ndzi lerisile noni ku ku phamela kona.”

¹⁰ Eliya a suka a famba, a ya eSarepta. Kuteloko a fikile enyangweni ya muti, waswivo, noni a a rhotela tihunyi kona; kutani a n'wi vita, a ku eka yena: “Wa nga ndzi kela matinyana enkambaneni, ndzi nwa.”

¹¹ Kakuloko a ha ya n'wi kela, a n'wi vita, a ku: “Wa nga ndzi lavela ni xipandzwa xa vuswa.”

¹² Yena a ku: “Yehovha, Xikwembu xa wena, xa hanya! A ndzi na vuswa, ni byitsanana; ndzi ni xandla xa mapa ntsena embiteni, ni mafurhanyana exikutswini, ndzi rhotela tihunyi timbirhi, ndzi muka, ndzi ya swekela n'wananga na mina vuswanyana, kutani kutakuloko hi dyile, hi ta fa.”

¹³ Eliya a ku eka yena: “U nga chavi! Muka u endla hilaha u nga vula hakona; ntsena rhanga u ndzi swekela ximbhundzwana, u ndzi tisela xona ehandle, kutani u ya tiswekela, u swekela ni n'wana wa wena.

¹⁴ Hikuva Yehovha, Xikwembu xa Israele, a ku: ‘Mapa ma nga ka ma nga heri embiteni, ni mafurha exikutswini, Yehovha a ko a nisa mpfula emisaveni.’ ”

¹⁵ Kutani wansati a famba a ya endla hilaha Eliya a n'wi byeleke hakona; hi masiku layo tala a dya, yena, ni yindlu ya yena, na Eliya.

¹⁶ Mapa a ma helanga embiteni, ni mafurha a ma pfumariwanga exikutswini hilaha Yehovha a nga vula hakona hi Eliya.

Eliya a pfuxa n'wana wa noni.

¹⁷ Endzhaku ka leswo, n'wana wa wansati la nga n'wini wa yindlu, a vabya; vuvabyi bya yena byi kula ngopfu, a ko a nga sari na hika.

¹⁸ Kavaloko wansati a ku eka Eliya: “Ndzi ni mhaka yihi na wena, wena, munhu wa Xikwembu-ke? Xana u tile eka mina ku ndzi tsundzuxa ku dyoha ka mina, ni ku dlaya n'wana wa mina-ke?”

¹⁹ A ku eka yena: “Ndzi nyike n'wana wa wena.” A n'wi teka exifuveni xa wansati, a n'wi tlakula a ya n'wi veka endlwini ya le henhla, laha a tshamaka kona, a n'wi lata exilawini xa yena.

²⁰ Kutani a huwelela eka Yehovha, a ku: “Yehovha, Xikwembu xa nga, xana u ta tisa khombo lero tano eka wansati lowa noni, loyi a ndzi rhurheleke endlwini ya yena, leswaku n'wana wa yena a fa xana?”

²¹ Kavaloko a sivama kanharhu henhla ka n'wana, a huwelela eka Yehovha, a ku: “Yehovha, Xikwembu xanga, wanga tlherisa moya wa n'wana loyi emirini wa yena!”

²² Yehovha a yingisa rito ra Eliya, moya wa n'wana wu tlhelela emirini wa yena, a hanya.

²³ Kavaloko Eliya a teka n'wana a n'wi xikisa hi le ndlwini ya le henhla, a n'wi nyika mana wa yena.

²⁴ Kutani Eliya a ku: “Vona, n'wana wa wena wa hanya.” Wansati a ku eka Eliya: “Sweswi, ndzi tiva leswaku u munhu wa Xikwembu, ni leswaku rito ra Yehovha leri nga enon'wini wa wena ri tiyile.”