1 TIHOSI 14 - Xitsonga (Bibele)

Ta nsati wa Yerobuwamu loko a ya vutisa muprofeta Ahiya.

¹ Enkarhini wolowo, Abiya, n'wana Yerobuwamu, a vabya.

² Kutani Yerobuwamu a ku eka nsati wa yena: “Wa nga pfuka u tihundzula munhu un'wana leswaku va nga ku tivi leswaku u nsati wa Yerobuwamu, u ya eXilo, u ta kuma kona Ahiya, muprofeta loyi a ndzi byeleke leswaku ndzi ta va hosi ya tiko leri.

³ Teka emavokweni ya wena swinkwa swa khume, ni swimbhundzwana, ni mbita ya vulombe, u ya eka yena: u ta ku byela leswi nga ta humelela eka n'wana loyi.”

⁴ Nsati wa Yerobuwamu a endlisa sweswo; a suka a ya eXilo, a ya fika endlwini ya Ahiya. Ahiya a a nga voni, hikuva mahlo ya yena a ma ri ni riphume hi ku dyuhala.

⁵ Kambe Yehovha a a byerile Ahiya, a te: “Nsati wa Yerobuwamu u ta ta ku vutisela n'wana wa yena, hikuva wa vabya. U ta n'wi byela swo karhi ni swo karhi.” Kutakuloko a fikile, u ta tivula munhu un'wana.

⁶ Kuteloko Ahiya a twa swigingi swa milenge ya yena loko a nghena enyangweni, a ku: “Nghena, wee nkata Yerobuwamu! U tihundzulele yini munhu un'wana xana! Loko ndzi ri mina, ndzi rhumiwile ku ku byela mhaka leyi nonon'hwaka.

⁷ Tlhelela eka Yerobuwamu, u ku: ‘Yehovha, Xikwembu xa Israele, u te: “Ndzi ku tlakusile exikarhi ka tiko, ndzi ku vekile mufambisi wa tiko ranga ra Israele,

⁸ ndzi handzurile vuhosi, ndzi byi susa endlwini ya Davhida, ndzi ku nyika byona; kambe a ku fananga na nandza wa mina Davhida, la hlayiseke ku lerisa ka mina, la ndzi landzeke hi mbilu hinkwayo ya yena a endla ntsena leswi lulameke emahlweni ka mina;

⁹ u tlurile hinkwavo lava ku rhangeleke hi ku dyoha; u ya tiendlela swikwembu swin'wana ni swifaniso leswi chuluriweke ku ndzi hlundzukisa, kambe mina, u ndzi fularherile:

¹⁰ Hikwalaho ndzi ta tisela endlwini ya Yerobuwamu khombo, ndzi ta susa munhu un'wana ni un'wana wa Yerobuwamu la bohiweke ni la tshunxiweke eIsraeleni, ndzi ta kukula yindlu ya Yerobuwamu hi mukhuva lowu va kukulaka thyaka ri ko ri hela.

¹¹ Munhu wa Yerobuwamu la nga ta fa emutini, u ta dyiwa hi timbyana, ni loyi a nga ta fa enhoveni u ta dyiwa hi tinyanyana ta le tilweni; hikuva Yehovha u vurisile.” ’

¹² Loko u ri wena, suka u famba endlwini ya wena: kutakuloko u nghene emutini, n'wana u ta fa.

¹³ Vaisraele hinkwavo va ta n'wi rila, va n'wi lahla; hikuva hi yena ntsena wa yindlu ya Yerobuwamu la nga ta nghena esirheni, hikuva eka yena ntsena wa yindlu ya Yerobuwamu, ku kumiwile leswinene emahlweni ka Yehovha, Xikwembu xa Israele.

¹⁴ “Yehovha u ta veka ehenhla ka Israele hosi leyi nga ta heta yindlu ya Yerobuwamu hi siku lero! Ndzi ri yini xana? Hi sweswisweswi!

¹⁵ Yehovha u ta ba Israele! Kukotisa rihlanga loko ri tsekatsekisiwa ematini, u ta susa Israele ehenhla ka tiko lerinene leri a ri nyikeke vatata wa vona, u ta va hangalasa ehase ka nambu, hikuva va tiendlele swifaniso swa swikwembu, va ri karhi va hlundzukisa Yehovha.

¹⁶ Kutani Yehovha u ta nyiketa Israele hikwalaho ka swidyoho swa Yerobuwamu leswi a swi endleke ni leswi a dyohiseke Israele ha swona.”

¹⁷ Kavaloko nsati wa Yerobuwamu a suka a famba, a ya fika eTirisa. Kuteloko a fikile exikhandziweni xa yindlu, n'wana a fa.

¹⁸ Va n'wi lahla, Vaisraele hinkwavo va n'wi rila hi laha Yehovha a nga vula hakona hi nandza wa yena, Ahiya, muprofeta.

Ku fa ka Yerobuwamu.

¹⁹ Leswi seleke swa timhaka ta Yerobuwamu, hilaha a humeke nyimpi ni ku fuma hakona, swi tsariwile ebukwini ya Tikronika ta tihosi ta Israele.

²⁰ Yerobuwamu a fuma malembe ya makume mambirhi na mambirhi. Kutani a tilata ni vatata wa yena, Nadabu, n'wana wa yena, a fuma ematshan'weni ya yena.

Ta ku fuma ka Rhobuwamu.

²¹ Rhobuwamu, n'wana Solomoni, a fuma etikweni ra Yuda. A a ri ni malembe ya 41 loko a vekiwa hosi, kutani a fuma malembe ya 17 eYerusalema, muti lowu Yehovha a wu hlawuleke exikarhi ka tinyimba hinkwato ta Israele ku veka vito ra yena kona. Vito ra mana wa yena a a ri Naama, wa ka Amoni.

²² Va Yuda va endla leswo biha emahlweni ka Yehovha, va n'wi vilerisa ku tlurisa vatata wa vona hi swidyoho leswi va swi endleke.

²³ Va tiakela, na vona, tindlu eswitsungeni, ti ri ni swifaniso swa Axera va endla sweswo ehenhla ka switsunga hinkwaswo leswi tlakukeke, ni le hansi ka mirhi hinkwayo leyi hlukeke.

²⁴ Etikweni ra Yuda a ku ri ni vavanuna lava hlawuleriweke vuoswi. Va etisa manyala hinkwawo ya matiko lawa Yehovha a ma hlongoleke emahlweni ka vana va Israele.

Xixaka, hosi ya Egipta a ta hlasela Yerusalema.

²⁵ Hi lembe ra vuntlhanu ra ku fuma ka Rhobuwamu, Xixaka, hosi ya Egipta, a tlhandluka ku ta hlasela Yerusalema.

²⁶ A teka xuma xa Yindlu ya Yehovha, ni xuma xa yindlu ya hosi; a teka hinkwaswo. A teka ni switlhangu swa nsuku leswi endliweke hi Solomoni.

²⁷ Rhobuwamu a endla ematshan'weni ya swona switlhangu swa koporo, a swi veka emavokweni ya tindhuna ta vatsutsumi leti hlayisaka nyangwa ya yindlu ya hosi.

²⁸ Emikarhini hinkwayo leyi hosi yi sukeke ku ya endlwini ya Yehovha, vatsutsumi a va swi teka, va swi tamela, kutani va swi vuyisa endlwini ya vatsutsumi.

Ku fa ka Rhobuwamu.

²⁹ Leswi seleke swa timhaka ta Rhobuwamu, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Yuda?

³⁰ Emikarhini hinkwayo, ku lwa a ku ri kona exikarhi ka Rhobuwamu na Yerobuwamu.

³¹ Rhobuwamu a tilata ni vatata wa yena, kutani a lahliwa ni vatata wa yena emutini wa Davhida. Vito ra mana wa yena a a ri Naama, wa ka Amoni. Kutani Abiyama, n'wana wa yena, a fuma ematshan'weni ya yena.