1 SAMIELE 17 - Xitsonga (Bibele)

Ta ku hluriwa ka Goliyadi hi Davhida.

¹ Kutani Vafilista va hlengeleta tinyimpi ta vona ku ya eku lweni. Va hlengeletana eSoko, lowu nga wa Yuda; va gova exikarhi ka Soko na Azeka, ku nga eEfese-Damimi.

² Sawulo ni vavanuna va Israele va hlengeletana na vona; va ya gova enkoveni wa mikanyi, kutani va huma nyimpi, va langutene ni Vafilista.

³ Vafilista vona, va ri entshaveni, hitlhelo rin'wana, nkova a wu ri exikarhi ka vona.

⁴ Ku huma emixaxeni ya Vafilista wanuna la tiyeke, lo va nge i Goliyadi; a a ri wa Gati; xiyimo xa yena a xi ri xa swisungunhu swa ntlhanu na xin'we, ni xandla xin'we.

⁵ Enhlokweni ya yena a a ri ni xihuku xa koporo, a ambele nkhancu wa tihakatimba, kutani ku tika ka nkhancu a ti ri tixikele ta koporo ta 5 000.

⁶ A a ri ni makausi ya koporo emilengeni, ni ntlhuvana wa nhumbu ekhatleni.

⁷ Mbhingo wa tlhari ra yena a wu fana ni mhandze ya muluki wa tinguvu, kambe nsimbhi ya tlhari ra yena a yi ri ni ku tika ka tixikele ta 600; kutani la tamelaka xitlhangu xa yena a a famba emahlweni ka yena.

⁸ Kutani a a yima a huwelela eka tinyimpi ta Israele, a ku: “Xana mi humele yini nyimpi? Ndzi Mufilista xana? Kambe a mi malandza ya Sawulo xana? Hlawulani exikarhi ka n'wina wanuna la nga ta lwa na mina!

⁹ Loko a ndzi hlula a ndzi dlaya, hi ta fumiwa hi n'wina. Kambe loko mina ndzi n'wi hlula, ndzi n'wi dlaya, mi ta fumiwa hi hina, mi hi tirhela.”

¹⁰ Kutani Mufilista a ku: “Namuntlha ndzi rhukana tinyimpi ta Israele! Ndzi humeseleni nhenha hi ta lwa swin'we!”

¹¹ Sawulo ni Vaisraele hinkwavo va twa marito ya Mufilista, kutani va hela timbilu va chava ngopfu.

¹² Davhida a a ri n'wana wa Muefrata wa Betlehema wa Yuda lo va nge i Yese; munhu loyi a a ri ni vana va vavanuna va ntlhanu na vanharhu, kambe enkarhini wa Sawulo a a ri wa khale swinene.

¹³ Vana vanharhu lavo rhanga va Yese a va landzile Sawulo enyimpini; kutani vana lavanharhu lava humeke nyimpi a va thyiwa sweswo: lowa hosi, Eliyabu, wa vumbirhi, Abinadaba, wa vunharhu, Xama.

¹⁴ Davhida a a ri ndzisana, kuteloko lavanharhu va tihosi ta yena va landzile Sawulo,

¹⁵ Davhida a suka eka Sawulo, a tlhelela ekaya ku ya risa tinyimpfu ta tata wa yena eBetlehema.

¹⁶ Mufilista a a humela emahlweni nimixo ni madyambu; a tshama a humelela sweswo hi masiku ya mune wa makume.

¹⁷ Kutani Yese a ku eka Davhida, n'wana wa yena: “Wa nga tekela vamakwenu efa leyi ya mavele lama kantingiweke, ni swinkwa leswi swa khume swa barley, u hatla u swi yisa emixaxeni eka vamakwenu.

¹⁸ U ta yisa ni machizi lawa ya khume ya ntswamba eka ndhuna ya vona ya khume ra madzana; u ta famba u ya xeweta vamakwenu, kutani u ta ndzi vuyisela mahungu lama tiyeke.”

¹⁹ Sawulo a a ri na vona, ni vavanuna hinkwavo va Israele, enkoveni wa nkanyi, va ri karhi va lwa ni Vafilista.

²⁰ Kutani Davhida a pfuka nimixo, a siya ntlhambi eka murisi un'wana, kutani a teka ndzhwalo wa yena, a famba hilaha Yese a n'wi byeleke hakona. Kakuloko a fika emixaxeni ya tigolonyi, nyimpi yi ri karhi yi huma ku ya tilunghisa eku lweni, yi be huwa ya ku lwa.

²¹ Sweswo Vaisraele ni Vafilista va huma va longoloxa tinyimpi ta vona, va langutene.

²² Davhida a tshika ndzhwalo wa yena emavokweni ya mulanguteri wa timpahla, kutani a tsutsumela etinxaxeni ta nyimpi. A fika, kutani a vutisa vamakwavo e ta ku hanya ka vona.

²³ Kakuloko a ha vulavula na vona, nhenha lo va nge i Goliyadi, wa le Gati, a huma etinxaxeni ta Vafilista, a ya emahlweni, a vula marito walawo ya masiku, Davhida a va a n'wi yingisa.

²⁴ Vavanuna hinkwavo va Israele, kuteloko va vonile wanuna loyi, va baleka emahlweni ka yena, va chava ngopfu.

²⁵ Kutani vanhu va Israele va ku: “Xana a mi vonanga wanuna la fambaka emahlweni? U humile ku sandza Israele. La nga ta n'wi dlaya, hosi yi ta n'wi nyika xuma lexikulu, yi n'wi nyika ni wanhwana wa yena, kutani yi ta tshunxa yindlu ya tata wa yena eIsraeleni.”

²⁶ Davhida a ku eka vavanuna lava yimeke ekusuhi na yena: “Xana va ta endla yini eka loyi a nga ta hlula Mufilista loyi, a susa xisandzu ehenhla ka Israele? I mani Mufilista loyi, la nga yimbangiki, leswi a sandzaka mavandla ya Xikwembu lexi hanyaka?”

²⁷ Va n'wi byela marito lawa, va ku: “Hi swona leswi nga ta endleriwa loyi a nga ta n'wi hlula.”

²⁸ Kambe hosi ya yena, Eliyabu, a n'wi yingisa loko a vulavula ni vanhu lava, kutani a karihela Davhida ngopfu, a ku eka yena: “Xana u tele yini kwala, u siye na mani tinyimpfunyana leti nga kole mananga? Ndza tiva ku tikurisa ka wena, ni vutlhari bya mbilu ya wena. U tile ku ta vona nyimpi!”

²⁹ Davhida a hlamula, a ku: “Ndzi endle yini-ke? Nandzu wu kwihi loko ndzi vula sweswo xana?”

³⁰ Kutani a n'wi fularhela, a ya vulavula ni un'wana a n'wi vutisisa timhaka teto, kutani vanhu va n'wi hlamula kukotisa eku sunguleni.

³¹ Kambe marito lama nga vuriwa hi Davhida, ma yingisiwile, kutani va ya tivisa Sawulo; kavaloko yena a n'wi vita.

³² Davhida a ku eka Sawulo: “Mbilu ya munhu ni un'we yi nga tshuki yi hela hikwalaho ka yena! Nandza wa wena u ta ya lwa ni Mufilista loyi.”

³³ Kutani Sawulo a ku eka Davhida: “U nga ka u nga lwi ni Mufilista loyi, hikuva u ntsongo, kambe yena a a ri muhlomi ni le vutsongwaneni bya yena.”

³⁴ Davhida a ku eka Sawulo: “Nandza wa wena a a risa swifuwana swa tata wa yena, loko nghala yi ta, na yona bere, yi teka nyimpfu ya ntlhambi;

³⁵ kutani ndzi yi hlongorisa, ndzi yi ba, ndzi namurhuta swifuwo enon'wini wa yona; kuteloko yi yime mahlweni ka mina, ndzi yi khoma hi tinhlaya, ndzi ba, ndzi yi dlaya.

³⁶ Sweswo nandza wa wena u dlayile nghala hambi yi ri bere, kutani Mufilista loyi, wa khuna u ta kotisa xin'wana xa swona, hikuva u sandzile tinyimpi ta Xikwembu lexi hanyaka.”

³⁷ Davhida a engeta, a ku: “Yehovha la ndzi poniseke evokweni ra nghala ni le vokweni ra bere, u ta ndzi ponisa, a ri yena, emavokweni ya Mufilista loyi.” Kutani Sawulo a ku eka Davhida: “Famba, Yehovha a a ve na wena.”

³⁸ Sawulo a ambexa Davhida tinguvu ta yena, a n'wi vehela xihuku xa koporo enhlokweni, a n'wi ambexa ni nkhancu wa nsimbhi.

³⁹ Kutani Davhida a bohela banga ra Sawulo ehenhla ka tinguvu ta yena, kutani a ringeta ku famba, hikuva a a nga si ringeta. Kavaloko a ku eka Sawulo: “A ndzi swi koti ku famba ha tona, hikuva a ndzi si swi ringeta.”

⁴⁰ Kutani Davhida a hluvula a teka nhonga ya yena evokweni, a ya exinambyaneni, a hlawula maribye ya ntlhanu layo tshwulungeka, a ma veka enkwameni wa yena wa murisi, kutani a tshinelela Mufilista a ri ni xipelupelu evokweni ra yena.

⁴¹ Yena Mufilista a suka a famba, a tshinelela Davhida. Kambe munhu la rhwaleke xitlhangu xa yena a a famba emahlweni ka yena.

⁴² Kuteloko Mufilista u vonile Davhida, a n'wi sandza hikuva a a ri ntsongo, a a ri wa ribungwanyana, a sasekile emahlweni.

⁴³ Kavaloko Mufilista a ku eka Davhida: “Xana ndzi mbyana, leswi u taka ka mina hi tinhonga!” Kutani Mufilista a rhuketela Davhida hi swikwembu swa yena.

⁴⁴ Mufilista a engeta a ku eka Davhida: “Tana eka mina, ndzi ta nyika tinyanyana ta tilo ni swivandzana swa nhova nyama ya wena.”

⁴⁵ Davhida a hlamula a ku eka Mufilista: “U tile eka mina hi banga, ni tlhari, ni ntlhuvana, kambe mina ndzi ta eka wena hi vito ra Yehovha wa mavandla, ni ra Xikwembu xa tinyimpi ta Israele leti u ti sandzeke.

⁴⁶ Namuntlha Yehovha u ta ku nyiketa emavokweni ya mina; ndzi ta ku tlhava, ndzi ku tsema nhloko; namuntlha ndzi ta nyika tinyanyana ta tilo ni swivandzana swa misava mitsumbu ya nyimpi ya Vafilista: misava hinkwayo yi ta tiva leswaku Xikwembu xa Israele xi kona.

⁴⁷ Nhlengeletano hinkwayo leyi, yi ta tiva leswaku Yehovha wa ponisa, kambe ku nga ri hi banga ni matlhari; hikuva ku lwa ni ku hlula, i ka Yehovha, kutani u mi nyiketile emavokweni ya hina.”

⁴⁸ Kavaloko Mufilista a suka a famba, a lava ku ya hlangana na Davhida; kambe Davhida a hatlisa a tsutsumela eku lweni, a a ya hlangana ni Mufilista.

⁴⁹ Kutani Davhida a yisa voko enkwameni, a teka ribye, a ri hoxa hi xipelupelu, a tlhava Mufilista emombyeni; ribye ri nghena emombyeni wa yena, kutani a wa hansi emahlweni ka yena.

⁵⁰ Sweswo Davhida a hlula Mufilista hi xipelupelu ni ribye, a n'wi dlaya, Kambe Davhida a a nga ri na banga.

⁵¹ Kutani Davhida tsutsuma, a ya eka Mufilista; a teka banga ra yena a ri hlomula enkotlotweni, a n'wi dlaya, a n'wi tsema nhloko. Vafilista, kuteloko va vonile leswaku nhenha ya vona yi file, va baleka.

⁵² Kutani vanhu va Israele ni va Yuda va pfuka va ba huwa, va hlongorisa Vafilista ku fika eku sunguleni ka nkova, ni le tinyangweni ta Ekroni; mitsumbu ya Vafilista yi andlarile ndlela ya Xaarayimi, ku fika eGati ni ku fika eEkroni.

⁵³ Kutani vana va Israele va tlhela va vuya eku hlongoriseni ka Vafilista, va phanga mixaxa ya vona.

⁵⁴ Kutani Davhida a teka nhloko ya Mufilista, a yi yisa eYerusalema, loko ma ri matlhari ya yena, a ma veka entsongeni wa yena.

⁵⁵ Kakuloko Sawulo a vona Davhida a huma ku ya hlangana ni Mufilista, a ku eka Abinere, ndhuna ya nyimpi: “Wandzisanyana loyi i n'wana mani, Abinere?” Abinere a hlamula, a ku: “Hi ku hanya ka wena, wee hosi, a ndzi n'wi tivi.”

⁵⁶ Kutani hosi yi ku: “Vutisa xana jaha leri i n'wana mani-ke.”

⁵⁷ Kakuloko Davhida a vuya eku dlayeni ka Mufilista, Abinere a n'wi teka a n'wi yisa emahlweni ka Sawulo, a ha khomile nhloko ya Mufilista evokweni ra yena.

⁵⁸ Sawulo a ku eka yena: “Wee jaha, un'wana mani xana?” Davhida a ku: “Ndzi n'wana wa nandza wa wena Yese, wa Betlehema.”