Santiago 4 - Nuevo Testamento Toba Sombrero Negro

Noqopich'i 'me ua'ña jena'me aleua

¹ ¿Jach'e joga'me chiyoĝogue joga'me nalada't nataq'aen da'me aueloiquiitapega't da'me ami? Jona'me jo'ne ja no'en 'me namaico jo'ne nach'e eta't deloquitapega'ajalo 'me uetauelo jona'me adai'lidi'.

² Ami jo'ne jetaque 'uo ga'me ami ua'ajopa, qalaĝaja ja auaqanachichi, nataq'aen aualataĝañi, 'uo da'me adepatenaĝanaĝaqui gamachaqaega jo'ne 'uo nale, qama'le da'me ja auaqanachichi ta'le ami ua'ajopa, qama'le analachitapega't nataq'aen da'me auauoyi joga'me nalada't. Ja auaqanachichi ta'le auañiya joga'me jo'ne jetaque anaviquila't qa'a ja auajelai joñe'me Dios.

³ Uotaĝa te'me aua'ajelai, qalaĝaja ja auacoñiyeguet qa'a ja yataĝalegue joda'me adajelaĝanaĝaqui, queda'me 'uo da'me adelnataĝaqui jo'ne ch'e jetaque auacoñiyeguet qaedi aueñi tayilo daa'me anejiyaĝauayaĝaqui lamaico.

⁴ ¡Ja ami 'te yataqatelo'te! ¿Qo'li ja auayachiñe joda'me qom anoqopicheguet jena'me ua'ña jena'me aleua qama'le nach'e ami jo'ne laute'u joñe'me Dios? Gamachaqaega jo'ne en lelnataĝac da'me noqopita nataq'aen da'me 'yamaqate'n jena'me jo'ne ua'ña jena'me aleua, nach'ega 'viyelaĝaguet da'me en lauteua joñe'me Dios.

⁵ 'Uo da'me jo'ne 'yaĝatetac jonaa'me nedii's, eet'oi: “Yataqachiñe 'uo da'me lep'aguenataĝanaĝac ñe'me qadepaqal jo'ne qoyanaue jona'me qadauel.”

⁶ Qalaĝaja ñe'me Dios yataqata qo'mi lecochiyalo qa'a 'uo da'me lichoĝodenataĝanaĝac jo'ne let'adaic, qama'le naa'me nedii's eet'oi: “Dios ja 'yamaqate'n jogaa'me 'yoĝodenaĝayaqa, qalaĝaja yanema da'me lichoĝodenataĝanaĝac jogaa'me jo'ne joĝodayaqa naa'me lai'li.”

⁷ Auoqochiiya joñe'me Dios, nataq'aen da'me a'nañaĝachiyeguet ñe'me payac, qama'le ñe'me ami dajoo'yema qomle.

⁸ Aueñi qoyoqo'ta joñe'me Dios, qaedi joñe'me en ami qoyode'talo, nataq'aen da'me aviyoyii jonaa'me adoua'adi jo'ne uetayelo jonaa'me adoecodi', choqoda'me auemedegue jona'me paĝachigui jo'ne uetayelo naa'me adai'lidi', qa'a ami jo'ne jetaque adoqopichiya joñe'me Dios nataq'aen jena'me ua'ña jena'me aleua.

⁹ Anachoĝodeñitapeguem nataq'aen da'me anoyeñetac nataq'aen a'ualaqaitac. 'Noota qom da'me adajaĝanaĝaqui neleguemaĝata na'me adachi'y da'me yataqata anoyeñetac, nataq'aen joda'me adamaiqui neleguemaĝata joda'me adachoĝodequi.

¹⁰ 'Noota qom auanaqae'ñejop da'me auajoyiya'aguet joñe'me Jaliaĝanec, qaedi joñe'me ami namaĝalo joga'me jo'ne let'adaic 'me 'lamaqatenataĝanaĝac.

Ena'te analoqochiñe ga'me loec ga'me adaqayai

¹¹ Ami yaqaya'olqa, 'noota qom nach'e eta't da'me a'uamaqachiñe' gaa'me adaqayadi', qa'a joga'me jo'ne en ja no'en na'me 'laqatac 'me yachalegue joga'me jo'ne mach'e laqaya, choqoda'me naloqote'n, nach'ega jo'ne nach'e ena'am da'me en ja no'en ga'me 'laqatac q'aen da'me yejouetac da'me Dios lamaĝajoĝonaĝac, queda'me ya'uo da'me mach'e laloqotenaĝanaĝac da'me dojo' namaĝajoĝonaĝac. Qama'le nach'ega jo'ne ja yoqo'cha da'me dojo' Dios 'laqatac.

¹² 'Uo ñe'me jo'ne onolec 'me yanegue da'me namaĝajoĝonaĝac nataq'aen da'me daloqotenaĝan, nach'eñe jo'ne yayaten da'me dec'alaqataĝanac nataq'aen da'me ya'uo da'me le'uaĝanaĝanaĝac. Qama'le ¿jach'e am da'me analoqoten ga'me loec joga'me jo'ne mach'e adaqaya?

¹³ Nayi auomachiiya da'me dojo' jenaac: ami jo'ne 'uo da'me adelnataĝaqui nale jo'ne eetac: “Jenjo' nolo' uotaĝa qom nete' qama'le jajoĝogue di'me noic let'adaic, qama'le cha'li jouaqa'ta ga'me onolec uo'e queda'me jauoqo da'me qanemenec, qaedi 'uo jaga'me qadomataĝanaqate jo'ne laicaua.”

¹⁴ ¡Yataqachiñe ja auayachiñe ga'me nolo' jo'ne male yovita da'me loiquiaqa' da'me anejiyaĝauayaĝaqui! Ami jo'ne aueñiya'am ga'me je'vi jo'ne di'yoq nale, qalaĝaja ja nach'e eta't ta'le 'uo.

¹⁵ Dite da'me anenaĝachiyegue naq'aeta: “Qom ñe'me Jaliaĝanec 'yamaqaten da'me cha'li qadec'aletaye, qama'le jaqanatetaq ta'le jauoqo da'me dojo', choqoga'me jetaque jauoqo laqaya.”

¹⁶ Qalaĝaja da'me ami auepaquitapega da'me a'uaĝachetac da'me jo'ne mach'e adepitaqataĝanaĝaqui, qama'le da'me dojo' 'loyaĝac da'me nepitaqataĝanaĝac, nach'eda jo'ne chiyaqayi yema da'me ja no'en.

¹⁷ Chane'eja, ga'me jo'ne yayaten da'me ye'et da'me jo'ne onaĝaic, qama'te ja 'ye'et, nach'ega jo'ne ya'uo da'me mach'e loec.