Santiago 3 - Nuevo Testamento Toba Sombrero Negro

Jena'me mach'e qadachaĝat

¹ Ami yaqaya'olqa, 'noota qom ena'te auauoyi da'me jo'ne qayoĝode' jogaa'me paĝaguenataĝanaĝayaqa, qa'a auayachiñe da'me qo'mi jo'ne qo'mi paĝaguenataĝanaĝayaqa, 'uo qomle da'me qanec'atenaguec jo'ne 'uo da'me laqalaic, ja jenaqa'am ga'me qadayi.

² Yema da'me qo'mi qadejomac nale, qalaĝaja qom 'uo ga'me jo'ne qaya'te lepatenaĝanaĝac nale doje, nach'ega jiyaĝaua jo'ne yataqachiñe yataqatelegue, nataq'aen yaqanatet ta'le yelo'ogue yema joda'me jo'ne mach'e nejiyaĝauayaĝac.

³ Ena'am da'me qom janaqayelo ga'me qa' leque'te joga'me nedegaĝat joga'me pegaq qaedi qo'mi yoqocha'alo nataq'aen da'me jaqanatetaq da'me jenaĝa ta'ya joga'me ladic nataq'aen joda'me ñaloqotenaq joda'me 'loyaĝac.

⁴ Nataq'aen auec'achiñe jaga'me licota: mate mane'e lat'edai nataq'aen joga'me layat jo'ne vichaĝaguet 'me yataqata 'uo da'me 'lañaĝac, qalaĝaja joga'me licota lo'ol 'uo ga'me loqolegaĝanaĝat jo'ne jaleca 'me en yelo'ta gamachaqaega jo'ne jetaque qoyen ta'ya.

⁵ Qama'le nach'e ena'am joda'me eeta joga'me nachaĝat jo'ne ja let'adaic joda'me 'loyaĝac; qalaĝaja 'uo da'me yaqanatet jo'ne let'adaic. ¡Yataqata let'adaic joga'me viaq yaqanatet da'me yavic yema qa'a yajouaĝat joga'tae'me dole' jo'ne jaleca!

⁶ Nataq'aen jena'me qadachaĝat, nach'ena jo'ne dole'. Jena'me jo'ne ja no'en joda'me 'lonatac 'me nayi qoyen joda'me qanejiyaĝauayaĝac, qama'le 'naĝat yema na'me qadapat nataq'aen en edañgui joda'me qanejiyaĝauayaĝac. Qaya'te loiquiaqa' joda'me lauaqayaĝac joga'me dole', qa'a nach'edi di'me payac 'lachaqa' jo'ne en edañgui.

⁷ Joga'me jiyaĝadipi yaqanate't da'me nalo'ogueta yema jogaa'me yodapecache jo'ne yejidipi jo'ne diquiya'ape, choqogaa'me mayodipi nataq'aen jogaa'me nanayaqa, yejidi jo'ne noĝop laje', naa'me naajo' jo'ne joote nalo'ogueta.

⁸ Qalaĝaja qaya'te ta'le yaqanatet da'me nalo'oguet joga'me nachaĝat, nach'ega jo'ne ja no'en nataq'aen qaleuaĝaic, choqoda'me jaqachigui joga'me ne'uenaĝanaĝat jo'ne neleuaĝat.

⁹ Jena'me qadachaĝat nach'ena jo'ne 'ñonaĝataĝaye nale joñe'me Qanedios jo'ne Qadet'a, nataq'aen jejouena' nale jogaa'me jiyaĝa'u jo'ne 'lonataqa ñe'me Dios da'me ena'am q'aen joda'me mach'e lajoĝo'j.

¹⁰ Jena'me jo'ne mach'e qanedegaĝat na'ya joga'me qadichoĝodenataĝanaĝaco nataq'aen joda'me qadejouenaĝanaĝac. Ami yaqaya'olqa, jena'me jenjo' ja 'noota qom naq'aeta.

¹¹ Jaga'me nopi'yaĝaiqui jo'ne naje'ma joga'me noĝop jo'ne chiyaqa'ña di'me p'añe jena'me aleua, ¿qo'li yaqanatet ta'le naje'ma joga'me noĝop jo'ne jama nataq'aen joga'me noĝop 'noua jaga'me jo'ne onole nopi'yaĝaiqui?

¹² Ami yaqaya'olqa, jaga'me higuera lichidic ja yaqanatet ta'le en jala jaga'me aceituna, nach'e ena'am jaga'me lichidic jaga'me uva ja yaqanatet ta'le jala jaga'me higo. Chane'eja nach'e ena'am jaga'me nopi'yaĝaiqui ja yaqanatet ta'le naje'ma ga'me noĝop jo'ne jama nataq'aen 'noua jena'me le'ec.

Da'me yataqatelegue nayatenaĝanaĝac

¹³ Qom 'uo ga'me ami uetauelo jo'ne yatenaĝanaĝaic nataq'aen da'me yayatenegueta ena'uac, 'noota qom da'me 'loyaĝac en di'yo't jodaa'me 'lonataqa jo'ne onaĝayaqa, queda'me qaya'te da'me li'yoĝodenaĝac 'me chiyaqayi da'me layatenaĝanaĝac.

¹⁴ Qalaĝaja da'me ami qom auauoyi joda'me ladiiuo da'me nep'aguenataĝanaĝac jo'ne yalemataĝanaĝa'n jonaa'me adai'lidi' nataq'aen auauoyi da'me jo'ne ja 'namaqatenataĝanaĝac qama'le 'noota qom ena'te ch'e ani'yoĝodeñiyeguet joda'me adayatenaĝanaĝaqui, qa'a ch'e anoqoviñetapela't nataq'aen ena'am ta'le ja ami 'te uetauelo joda'me yataqatelegue eja.

¹⁵ Qa'a jena'me jenjo' nayatenaĝanaĝac ja naqaena ta'le chiyoĝogue joñe'me Dios, dite da'me chiyaqa'a jena'me jenjo' aleua, ch'e lelnataĝaco ga'me jiyaĝadipi nataq'aen joñe'me payac.

¹⁶ Joga'me jo'ne ueta'ña da'me nep'aguenataĝanaĝac nataq'aen da'me jo'ne qaya'te neyamaqataĝanaĝac, nach'e ena'am qaya'te 'nemaĝac qa'a uo'oe yodapecache jogaa'me 'nonataqa jo'ne ja 'noe'n.

¹⁷ Qalaĝaja jogaa'me jo'ne ue'tajopa joda'me nayatenaĝanaĝac jo'ne chiyaqaje'ma joñe'me Dios, 'uaeñe da'me nedo'ta't yema joda'me 'loyaĝac, nataq'aen da'me joĝodaic choqoda'me onaĝaicaloec, nataq'aen choĝodenataĝanaĝayaqa nataq'aen da'me yataqatelegue ya'uo da'me lecochaĝac jo'ne onaĝaic, nataq'aen da'me ja ch'e noqovila't, choqoda'me onaĝaic joda'me ya'uo.

¹⁸ Nataq'aen joga'me jo'ne yepaquetedapega joda'me 'nemaĝac nach'e eta't yaadiñi joda'me 'nemaĝac qaedi qom daqataĝan qama'le 'uo joga'me jala jo'ne ja 'nalegue.