Santiago 2 - Nuevo Testamento Toba Sombrero Negro

Ja qoniquiyaye jena'me jiyaĝadipi

¹ Ami yaqaya'olqa, da'me auep'iiya'a ñe'me Qadejaliaĝanec Jesucristo jo'ne 'uo da'me 'lonaĝa, ena'te jetaque auauoyi adiquiyaĝanaĝaqui ga'me onolec adaqayai, qom ja nach'e ena'ama gaa'me adaqayadi' laqaya'.

² Qom 'uo ga'me ademaĝaqui, qama'le nach'e ena'am novi' ga'me jiyaĝaua laqaya jo'ne 'uo da'me leuoyaĝac, yatañe jaga'me nechijaĝa jo'ne oro choqoga'me louo jo'ne yaqaselecalo'te, qama'le nach'e ena'am novi' ga'me jiyaĝaua laqaya jo'ne qaya'te leuoyaĝac, yatedañe gaa'me louo' jo'ne toĝoyaqa,

³ qom nach'ega ga'me neuoyaq jo'ne aueñi onolec da'me yataqachiñe aviyamaĝachetac da'me aueñiyaac: “Auañiya'ña jena'me onaĝaic 'nachaqa',” qalaĝaja qom novi' ga'me choĝodaic qama'le aueñiyaac: “Am qamqa'me am qaya'a ga'me anechateta'ña, uotaĝa oneta'ña na'me nojo' jo'ne p'añe,”

⁴ qama'le aueyochiyapecache gaa'me adaqayadi' nataq'aen da'me male auauoyi da'me adaloqotenaĝanaĝaqui choqoda'me adelnataĝaqui jo'ne ja no'en.

⁵ Ami yaqaya'olqa jo'ne ñauotaĝa'u, anaquiaĝañiya da'me dojo': Dios en liquiyac ga'me jiyaĝaua jo'ne qaya'te leuoyaĝac, qama'le en neuoyac da'me nepe'e, qama'le nach'e ena'am da'me en yaconeguet da'me jo'ne mach'e en loĝot jo'ne nejaliaĝa, da'me jo'ne joote 'yaĝatema gaa'me jo'ne eja da'me yataqachiñe noqopideta joñe'me.

⁶ Qalaĝaja da'me ami qamqa'me, ja adoqopichiyalo jogaa'me jo'ne choĝodache. ¿Qo'li ja nach'egaua gaa'me neuoyaĝadi jo'ne ja ami 'te 'yamaqate'n, gaa'me jo'ne ami dachinataĝalo'te qama'le ami yauecoto gaa'me nejaliaĝanaqa?

⁷ ¿Qo'li ja nach'egaua gaa'me neuoyaĝadi jo'ne yojouetedac da'me lenaĝat jo'ne onaĝaic joñe'me Jaliaĝanec, da'me lenaĝat jo'ne joote ami qoyanema ca'li auacoñiyeguet da'me ami qonec'alaĝatedegue?

⁸ Da'me auauoyi jo'ne onaĝaic da'me ami, qom yataqachiñe aueñi eja yepaquichigui da'me namaĝajoĝonaĝac jo'ne p'ajaye, qama'le nach'ena na'me 'yaĝatetedac naa'me naajo' nedii's jo'ne eet'oi: “Queda'me yataqata anoqopitela't, qama'le 'noota qom nach'e ena'am da'me adoqopita joga'me adaqaya.”

⁹ Qalaĝaja qom auauoyi da'me jo'ne a'nonaĝachiyegui ga'me onolec jiyaĝaua, qama'te ja a'nonaĝachiyegui ga'me jiyaĝaua laqaya, qama'le nach'eda jo'ne chiyaqayi da'me joote uo'oe naa'me adoecodi', nataq'aen da'me naqa'ami jo'ne 'uo da'me adaviyaĝaje'che, da'me male ami naloqote'n da'me lamaĝajoĝonaĝac joñe'me Dios.

¹⁰ Qa'a qom 'uo ga'me jiyaĝaua jo'ne yoqocha'alo yemeda daa'me namaĝajoĝonaĝaco, qalaĝaja mate ja yoqocha'a ga'me onolec jo'ne chiyaqayi da'me namaĝajoĝonaĝac, nach'eda 'me 'uo da'me laviyaĝajet, qom male dajoya'agueta yemeda jogaa'me Dios lamaĝajoĝonaĝaco.

¹¹ Qa'a nach'eñe joñe'me Dios da'me enaac: “Ena'te adeuaua gamachaqaega jo'ne ja adoua,” qama'le nach'e ena'am da'me enaac: “Ena'te aualataĝan.” Chane'eja, qom 'uo ga'me jiyaĝaua jo'ne te'me 'uo da'me 'lamaqatenataĝanaĝac da'me ja leuaua jaga'me jo'ne ja loua, qalaĝaja ma'te dalataĝan, qama'le joote 'naĝat da'me Dios lamaĝajoĝonaĝac.

¹² Chane'eja da'me ami, 'noota qom aniyamaĝachila't da'me a'uaqataĝañetac, qaedi di'yoq da'me male auachitaque da'me anec'atenaguequi jo'ne chiyaqayi da'me namaĝajoĝonaĝac jo'ne e'n ami uojotedañi.

¹³ Qa'a jogaa'me jo'ne ja yichoĝode'n gaa'me laqaya', qom 'uo da'me nec'atenague'j, qama'le nach'e ena'am da'me ja qoyichoĝode'n qomle. Qalaĝaja gaa'me jo'ne 'uo da'me lichoĝodenataĝanaĝa'j nach'egaua jo'ne 'uo da'me lomataĝanaĝa'j qom male yovita ga'me nolo' da'me male 'uo da'me nec'atenaĝanaĝac.

Da'me qadepi'iyaĝac nataq'aen da'me yiyamaqachiñe 'lonataĝanaĝac

¹⁴ Ami yaqaya'olqa, qom 'uo ga'me jo'ne eetapela't 'uo da'me lepe'e, ¿jach'e ga'me yachiyoĝotayi qom ja yaloĝon ga'me jo'ne mach'e chiyaqayi 'me 'lonataĝanaĝac? ¿Qo'li yaqanatet da'me nec'alaĝategue da'me lepe'e?

¹⁵ Qama'le da'me qom jenaqa'tem da'me 'uo ga'me qadaqaya uotaĝa 'uo jaga'me qadaqayole jo'ne youetapiye ga'me lepaĝalegue da'me 'loyaĝac jo'ne louo, nataq'aen ga'me yalic jo'ne youetaque ga'me onolec nolo';

¹⁶ qama'te 'uo ga'me onolec da'me ami jo'ne eetac: “Onaĝaic adeuoĝoc ga'me auajoyi, auaidiñe ga'me adouo nataq'aen da'me aualic yema ga'me jo'ne mach'e a'uamaqaten”, qalaĝaja ja naqa'am ta'le auanem ga'me youetaque da'me nejiyaĝauayaĝac, qama'le ¿jach'e ga'me 'noota jo'ne auen chiyaqayi?

¹⁷ Qama'le naq'aeta da'me eeta da'me qadepe'e: qom ja yaloĝon ga'me jo'ne mach'e 'lonataĝanaĝac, nach'ena nepe'e jo'ne ja nec'alegue.

¹⁸ Qama'le 'uo ga'me jo'ne eetac: “Am, 'uo da'me adepe'e, qama'te da'me jayem, 'uo jena'me 'yonataĝanaĝac. Chane'eja jayem aualoĝona da'me adepe'e jo'ne qaya'te 'lonataĝanaĝac, qama'le da'me jayem am ji'iyelaĝateguet da'me am jaloĝona da'me mach'e yepe'e jo'ne en uo'oe naa'me 'yonataqa.

¹⁹ Am ¿qo'li auen eja da'me 'uo ñe'me onolec Qanedios? Qama'le qom naq'aeta onaĝaic da'me aua'uo; qalaĝaja nach'e ena'ama jogaa'me payagodipi yataqata yayate'n queda'me eja 'uo ñe'me Dios jo'ne onolec, qalaĝaja yiviloĝolaqate't q'ae'n da'me loqolanaqa'.

²⁰ Qama'le ena'te ami chiyoĝo's, dite da'me yataqata auetadeñiyac da'me qom 'uo ga'me jo'ne ue'tajop ga'me lepe'e, qalaĝaja ja nach'e ena'am yapoteneguet ga'me jo'ne mach'e en 'lonatac, qama'le nach'eda nepe'e jo'ne qaya'te chiyaqayi.

²¹ Dios yaconeguet ñe'me Abraham qa'a jiyaĝaua jo'ne nalo'ta't da'me onaĝaic, ñe'me jo'ne nach'eñe mach'e jachiyojoĝoguet, qa'a da'me jo'ne ya'uo joca'li 'yaĝatem joñe'me Jaliaĝanec da'me en lajaqajec ñe'me jo'ne mach'e lec'oĝot Isaac.

²² Qama'le naqaeda 'me auec'achiñe, da'me jo'ne ya'uo ñe'me Abraham da'me yaloĝon da'me jo'ne mach'e chiyaqayi da'me lepe'e, qama'le da'me jo'ne mach'e 'lonatac yovidaĝa'ta da'me en yataqatelegue da'me lepe'e.

²³ Chane'eja naq'aeta en yepaquichigui da'me jo'ne qoyediñe ca'li 'me enaac: “Abraham p'iya'a joñe'me Dios, qama'le yajouaĝat da'me lepe'e Dios yaconeguet queda'me jiyaĝaua jo'ne yataqatelegue.” Chane'eja ñe'me Abraham qoyen naigaĝaua joñe'me Dios.

²⁴ Da'me ami, joote auañiya da'me jo'ne Dios doqotenaĝanec yataqatelegue ga'me jiyaĝaua, qalaĝaja nach'e ena'am uo'oe gaa'me jo'ne mach'e 'lonataqa, ja nach'edata da'me en onolec da'me lepe'e.

²⁵ Qama'le nach'e ena'am jañe'me yauo jo'ne quejeguetaĝai, Rahab, Dios yaconeguet jañe'me yauo qa'a en yataqatelegue da'me 'lonatac, yauo'oe 'lachaqa'te jogaa'me Dios 'laqataĝanaĝanaqa, nataq'aen da'me lecochiyalo da'me en tade'ga ga'me naq'aec laqaya.

²⁶ Da'me male qonaloqotena't da'me dojo', qom naq'aeta da'me yeleu da'me qanejiyaĝauayaĝac qom male ca'e ñe'me lepaqal, qama'le nach'e ena'am da'me qadepe'e, qom ja qoyapotenegueta gaa'me 'nonataqa qama'le ena'am ta'le ja nec'alegue.