Romanos 5 - Nuevo Testamento Toba Sombrero Negro

Dojo' di'yoq q'aen da'me Dios qo'mi noqopitalo

¹ Qama'le queda'me Dios joote qo'mi e'n yataqatelo'te, yajouaĝat da'me qadepi'iyaĝac, male 'uo da'me qat'emaĝac 'me chiyoqo'ot ñe'me Dios, qa'a na'ya q'aen ñe'me Qadejaliaĝanec Jesucristo.

² Chane'eja chiyaqayi da'me qadepe'e, ñe'me Jesucristo qo'mi yanema da'me qadadiiuo qaedi jaqanatetaq da'me jec'ataĝa ñe'me Dios, nach'eñe jo'ne yataqata qo'mi yichoĝode'n, qama'le qo'mi t'añidañe nataq'aen ñi'yoĝodenaqatapela't queda'me 'uo da'me qadeuataqataĝanaĝac da'me jouaqaue qomle da'me 'lañaĝac ñe'me Dios.

³ Nataq'aen ja jaldata da'me dojo', dite da'me nach'e ena'am ñi'yoĝodetapela't da'me uo'oe gaa'me qadachoĝodeco; qa'a jayatenaq queda'me qadachoĝodec qo'mi yanema da'me qadalo'oguet da'me qanapogaĝadenaĝac.

⁴ Qama'le da'me qo'mi t'añidañe, male qo'mi e'n mataĝanaĝayaqa, nataq'aen da'me qo'mi na'yalo q'ae'n da'me qadeuataqataĝanaĝac.

⁵ Qama'le da'me dojo' qadeuataqataĝanaĝac ja qo'mi 'te yoqovi'n, qa'a ñe'me Dios najaqachiguilo q'ae'n naa'me qadai'li da'me loqopich'i na'ya q'aen ñe'me Lepaqal jo'ne qo'mi yanema.

⁶ Qa'a ca'li qo'mi ja jaqanatetaq ta'le mach'e ñec'alaĝataĝala't, Cristo ga'me mach'e laloqo' q'aen, yeleu ca'li nep'aĝanegueta gaa'me loeco lo'olpi.

⁷ Qalaq da'me dojo' ta'le 'uo ga'me najetoue da'me qoyalat jo'ne nep'aĝaneguet ga'me jiyaĝaua laqaya; uotaĝa ta'le najetoue da'me nep'aĝaneguet ga'me jiyaĝaua 'me yataqatelegue; mate mane'e 'uo gamachaqaega yaqanatet ga'me jo'ne jalcote 'noota ga'me 'yetec qama'le nemenoue da'me leleuaĝa.

⁸ Qalaĝaja Dios di'yoq q'aen da'me qo'mi noqopitalo, chaqaeda da'me maliaĝa qolaqatauelo gaa'me qadoeco ca'li, yajouaĝa't qo'mi ca'li yeleu ñe'me Cristo.

⁹ Qama'le nayi, Dios joote qo'mi e'n yataqatelo'te q'ae'n chiyaqayi da'me yeleu ca'li ñe'me Cristo, qama'le p'ajaye eja da'me qo'mi qonec'alaĝatedegue ga'me nolo' p'ategue 'me 'uo da'me nec'atenaĝanaĝac jo'ne na'ya q'aen joñe'me.

¹⁰ Qa'a joñe'me Dios, ca'li maliaĝa qo'mi laute'upi joñe'me mach'eñe qo'mi yadalaĝateque da'me yitaĝa qo'mi yaconegueta.

¹¹ Nataq'aen ja jaldata da'me dojo', dite da'me nach'e ena'am 'ñonaĝataĝaye ñe'me Dios yajouaĝat ñe'me Qadejaliaĝanec Jesucristo, qa'a nach'eñe ñe'me Cristo jo'ne chiyaqayi da'me jaconaĝaguet nayi da'me qo'mi qoyadalaĝa't.

Qodaloqotenaĝana di'me Adán nataq'aen Jesucristo

¹² Chane'eja naq'aeta, qa'a chiyaqayi ga'me onolec jiyaĝaua da'me 'uo ga'me loec jena'me aleua, nataq'aen jouaĝat da'me noec 'uo da'me neleuaĝa, qama'le naq'aeta da'me neleuaĝa tauelo ena'uac, qa'a ena'uac nach'e ena'am tauelo daa'me loeco.

¹³ Ca'li maliaĝa ja qoyauanalo naa'me namaĝajoĝonaĝaco qanach'e joote 'uo da'me ja no'en 'me ue'ta jena'me aleua; mate mane'e temaqaedi da'me ja qoyoqo'cha qom qaya'te namaĝajoĝonaĝac.

¹⁴ Qalaĝaja chiyoqotelegue ca'li gaa'me noloqo'ote da'me 'uo di'me Adán chayovida'a ca'li 'uo di'me Moisés, da'me dojo' neleuaĝa nejaliaĝatelo'te gaa'me jo'ne tauelo gaa'me loeco, mate mane'e da'me loe'j jogaa'me ja naqaeda da'me ta'le chiyoĝotayi da'me yenoĝon ga'me onolec namaĝajoĝonaĝac, naq'aeta ga'me ya'uo ca'li di'me Adán, jo'ne nach'edi lequi'i ñe'me na'ya quena.

¹⁵ Qalaĝaja da'me yajouaĝat di'me Adán, ja nalo'taguet da'me qonaloqotenaĝaneguet da'me lachetaĝanaĝac 'me qo'mi yanema ñe'me Dios. Qa'a da'me lajouaĝac ga'me onolec jiyaĝaua yajouaĝat da'me jalcote dia'me yele'u; qalaĝaja da'me lachetaĝanaĝac ñe'me Dios 'me qaya'te lajo'vi q'aen da'me qo'mi yanema jo'ne chiyaqayi q'aen ñe'me onolec jiyaĝaua, nach'eñe ñe'me Jesucristo, yataqachiñe jalcote let'adaic yiyamaĝatem gaa'me qayoĝode'.

¹⁶ Dojo' lejamaĝataĝac ñe'me onolec jiyaĝaua ja nalo'taguet ta'le qonaloqotenaĝaneguet da'me lachetaĝanaĝac ñe'me Dios, qa'a qom jouaĝat da'me onolec ga'me nejamaĝataĝac novidaĝat da'me qo'mi qoyegue'm; qalaĝaja da'me lec'alaqataĝanaĝac ñe'me Dios qoyachiyoĝotauelo gaa'me qayoĝode' loecopi ga'me jiyaĝaua da'me qoyen yataqatelegue q'aen.

¹⁷ Qa'a ta'le da'me neleuaĝa 'uo da'me lejaliaĝa, da'me chiyaqayi ga'me lejamaĝataĝac ñe'me onolec jiyaĝaua, ¿qo'li ja yataqachiñe p'ajaye da'me lichoĝodenataĝanaĝac 'me qaya'te lajo'vi q'aen, yataqatelo'te q'ae'n jogaa'me qoyanema da'me nejaliaĝa qomle da'me dalaĝaic 'noyaĝac 'me chiyaqayi ñe'me onolec jiyaĝaua, Jesucristo?

¹⁸ Qama'le naq'aeta da'me dojo' Adán ca'li yenoĝon ga'me namaĝajoĝonaĝac 'yetema da'me qoyegue'm ena'uaque gaa'me jiyaĝadipi, nach'e naq'aeta nataq'aen da'me onaĝaic lajoĝoc ñe'me Jesucristo neda'a jena'me jiyaĝadipi qaedi 'uo da'me 'loyaĝa'j.

¹⁹ Chane'eja, jouaĝat da'me ja yoqo'cha ga'me 'naqatac ñe'me onolec jiyaĝaua, qayoĝode' gaa'me loeco lo'olpi; qalaĝaja nach'e ena'am naq'aeta da'me jouaĝat da'me yoqo'cha ga'me 'naqatac ñe'me onolec jiyaĝaua qanach'e qayoĝode' gaa'me qoye'n yataqatelo'te.

²⁰ Da'me qoyapeteneuo da'me napaĝaguenataĝanaĝac qaedi yañodelo'te gaa'me loeco ga'me jiyaĝadipi; qalaĝaja ca'li ma'ejama'le nichidegue gaa'me noeco, qama'le ñe'me Dios yaloĝon da'me lichoĝodenataĝanaĝac.

²¹ Qama'le naq'aeta queda'me 'uo da'me 'lañaĝac ga'me noecopi novidaĝat da'me neleuaĝa, nataq'aen ena'am naq'aeta da'me lichoĝodenataĝanaĝac ñe'me Dios 'uo da'me lañoqotaĝanaĝac da'me qo'mi e'n yataqatelo'te nataq'aen qo'mi yanema da'me qat'oyaĝac jo'ne ja 'naidena'a, chiyaqayi ñe'me Qadejaliaĝanec Jesucristo.