Romanos 3 - Nuevo Testamento Toba Sombrero Negro

¹ Chane'eja, ¿jach'e ga'me naqachiñe netaye da'me judío le'ec uotaĝa da'me am netaye da'me nichaĝajoĝonaĝac?

² Yataqata jalcote ga'me chiyaqayilo. Da'me 'uaeñe, yaje'tema jogaa'me judiopi da'me yanema da'me 'laqataĝanaĝac.

³ Chane'eja ¿jach'e ga'me eeta? Qom uo'oe gaa'me ja yataqatelo'te, ¿qo'li Dios yaĝañi da'me yepaquichigui ga'me 'laqatac?

⁴ ¡Qa'ejo' ja naq'aeta! Dite da'me nach'eda yataqatelegue ñe'me Dios da'me 'tonataĝan, mate mane'e qovinaĝanaĝaic ga'me ch'e jiyaĝaua; qa'a naa'me nedii's eet'oi: “Am qo'ene'tem yataqatelegue ga'me anenaĝategue. Qama'le 'uo da'me adomataĝanaĝac qom am qonemitaque ga'me adajouaĝajet.”

⁵ Qalaĝaja qom da'me ja no'en 'me qo'mi netayelo en di'yoq da'me yataqatelegue ñe'me Dios, ¿jach'e ga'me jenaqaac? ¿Qo'li ja yataqatelegue ñe'me Dios nale ya'uo da'me qane'uaĝanaguec? (Qalaĝaja dojo' 'yaqatac ena'am ta'le ch'e jiyaĝaua lelnataĝac.)

⁶ ¡Qa'ejo' ja naq'aeta! Qa'a ta'le Dios ja yataqatelegue, ¿qo'li nalo'oguet da'me naloqoten jena'me aleua?

⁷ Qalaĝaja ta'le da'me yoqovinaĝanaĝac chiyaqayi da'me qaedi da'me eja yataqatelegue chiyaqayi ñe'me Dios chiyaqayi da'me 'lonaĝac, ¿toqoch'e jayem qo'ene'tem loeco lo'o qom jayem qonemit?

⁸ Qama'le qom naq'aeta, ¿toqoch'e ja ja'uo ga'me ja no'en qaedi naq'aeta da'me jayem novita ga'me 'noota? Dojo' yataqachiñe uo'oe gaa'me eetapela'ajalo naq'aeta da'me japaĝaguenataĝanec; qalaĝaja joga'me jiyaĝa'u 'me naq'aeta da'me lelnataĝa'j, tayet da'me qoyamaĝadoue da'me ne'uaĝanague'j.

Yema loeco lo'olpi

⁹ ¿Je'te eeta? Da'me qo'mi judiopi ¿qo'li ñapagaqalo'te ja jenaqa'ama gaa'me qadaqaya'olqa? ¡Aja'y! ¡Ja naq'aeta! Qa'a joote jaloĝonatac da'me ena'uaque nach'e naq'aeta ga'me judiopi le'ec choqoga'me ja judiopi uetalo'te lañoqotaĝanaĝac daa'me loeco.

¹⁰ Qa'a naa'me nedii's eet'oi: “¡Qaya'te ch'e onolec yataqatelegue!

¹¹ Qaya'te gamachaqaega netaque da'me letadenataĝanaĝac, Qaya'te gamachaqaega netaque ñe'me Dios.

¹² Ena'uaque tade'ga ga'me ladi'j 'me lejomaĝa'j, ena'uaque nichiyoĝojoĝola'ajalo. Ena'uac nalo'ta't da'me t'aĝanataĝana'ape. ¡Qaya gamachaqaega ya'uo da'me 'noota! ¡Yataqachiñe nedo'ta't, qaya'te ch'e onolec!

¹³ Naa'me nedegaqa'te ena'am jaga'me napa'l lae't 'me qo'youatetaye, qovinaĝanaĝayaqa nale naa'me lachaĝa't. Naa'me nedegaqa'te uetauelo gaa'me dalataĝanac ena'am gaa'me nanayaqapi.

¹⁴ Najaqachiguilo naa'me nedegaqa'te, nach'edata da'me yachalegue da'me ne'uaĝanaguec ga'me laqaya, nataq'aen qaya'te jama naa'me 'laqataqa.

¹⁵ Ja t'añi'y paja'a dalemata'y qama'le naqalego' qaedi dalataĝa'n.

¹⁶ Naya'ac da'me nolaĝachiñe ga'me laqaya, nataq'aen yachoĝoden.

¹⁷ Nataq'aen ja yateto'n ga'me ladic da'me 'nemaĝac.

¹⁸ Ja yayate'n ta'le tayapiye lauel ñe'me Dios qaedi t'oiyapega.”

¹⁹ Qa'a da'me qo'mi yataqachiñe jayatenaq yema ga'me uaye jaga'me nede jo'ne uedaye da'me namaĝajoĝonaĝacpi, yeloĝonaĝachiguilo da'me tachiguilo da'me enapegalo ga'me uetedo'ot gaa'me naqataĝaco, qaedi qaya gamachaqaega eetapela't qaya'te lajouaĝajet, qaedi qom 'uo da'me lec'atenaĝanaĝac ñe'me Dios qama'le nach'e ena'am uetedaue yema ga'me jiyaĝadipi.

²⁰ Qa'a qaya'te gamachaqaega eetapela't yedalegue da'me Dios yiyamaĝaden qa'a jouaĝat da'me que'teguelo daa'me namaĝajoĝonaĝaco, qa'a daa'me namaĝajoĝonaĝaco nach'edata da'me qo'mi yayatenaĝaneque da'me nach'e ena'am 'uo ga'me qadajouaĝajet.

Jep'iyaqa joñe'me Jesucristo

²¹ Qalaĝaja nayi, ja qopacapegalo daa'me namaĝajoĝonaĝaco, Dios qo'mi yaloĝonalo da'me lajoĝoc q'aen da'me qo'mi yiyamaĝadete' joñe'me, qama'le nach'enaua naa'me namaĝajoĝonaĝaco nataq'aen naa'me ledii's gaa'me Dios 'laqataĝanaĝanaqa jo'ne qo'mi yayatenaĝanaĝaneque da'me dojo'.

²² Chiyaqayi da'me jep'iyaqa ñe'me Jesucristo, Dios e'n yataqatelo'te ena'uaque jogaa'me p'iida'a. Chane'eja qaya'te yaguegue, uotaĝa judiopi uotaĝa ja judiopi.

²³ Qa'a ena'uaque qo'mi loeco lo'olpi qama'le qo'mi qaya'alo da'me 'lonaĝac ñe'me Dios.

²⁴ Qalaĝaja Dios, da'me lichoĝodenataĝanaĝac 'me qaya'te lajo'viyaĝac en qo'mi yataqatelo'te q'ae'n, chiyaqayi da'me nec'alaqataĝanaĝac 'me ya'uo ca'li ñe'me Cristo Jesús.

²⁵ Cristo naliñi jaga'me letauo' ca'li; nach'eda Dios 'yetem da'me lo'o q'aen da'me qoyapalaĝa't jodaa'me qadoeco. Dojo' napalaqataguec joga'me noecopi, chiyaqayi da'me nepe'e da'me maqachaĝa qoyovidalegue. Naq'aeta da'me jetaque yaloĝon ñe'me Dios da'me qo'mi e'n yataqatelo'te; yapalaĝa't gaa'me qadoeco jo'ne joote jauoqo'oe ca'li.

²⁶ Qa'a ja yalaĝadaic ñe'me Dios. Ñe'me jetaque yaloĝon da'me qo'mi e'n yataqatelo'te q'ae'n ga'me nolo' jo'ne tachigui q'aen; qa'a naq'aeta queda'me yataqatelegue ñe'me qama'le e'n yataqatelo'te jogaa'me jo'ne p'iida'a ñe'me Jesús.

²⁷ Qama'le ¿jach'e ga'me ua'ague da'me ni'yoĝodenot ñe'me Dios ga'me jiyaĝaua? ¡Yataqachiñe qoyeguem! ¿Jach'e ga'me chiyaqayi? Ja jouaĝat da'me que'teguelo daa'me namaĝajoĝonaĝaco, dite da'me yajouaĝat da'me p'iya'alo.

²⁸ Naq'aeta da'me jovitaĝa da'me loiquiaqa'yaĝac: yataqatelegue q'aen ñe'me Dios ga'me jiyaĝaua jo'ne 'uo da'me lepe'e, ja yauaqa'a ta'le chiyaqalegue da'me qodique'teguelo daa'me namaĝajoĝonaĝaco.

²⁹ Ñe'me Dios, ¿qo'li nach'edata Nedios jogaa'me judiopi? ¿Qo'li ja nach'e ena'am yema jena'me aleua laje'pi? Qa'ejo' nach'e ena'am jaĝa'te yema joga'me jiyaĝadipi.

³⁰ Qama'le qaya'te uoja'ega Dios laqaya: ñe'me Dios jo'ne e'n yataqatelo'te jogaa'me jo'ne 'uo da'me lepe'e', ja uenate'ta ta'le netayelo uotaĝa ja netayelo ga'me nichaĝajoĝonaĝac.

³¹ Chane'eja da'me 'uo da'me qadepe'e, ¿qo'li ja jenaĝa 'te lajo'vi da'me namaĝajoĝonaĝaco? ¡Qa'ejo' ja naq'aeta! Dite da'me jachimaĝataĝañi da'me lajo'viyaĝa'j naa'me namaĝajoĝonaĝaco.